Read DIOSPA QHELQACHISQ Quechua MATEO 5 Bible Online

MATEO 5 - DIOSPA QHELQACHISQ Quechua bible

MATEO 5

¹Runakunata rikuspanmi Jesusqa orqoman wicharqan. Chaypi tiyaykuqtintaq yachachisqankunaqa payman asuykurqanku.

²Paykunata yachachispataq nirqan:

³— Kusisamiyoqmi huch'uyyaykukuspa Diosta maskhaqkunaqa, paykunapaqmi hanaq pacha qhapaqsuyuqa.

⁴Kusisamiyoqmi llakisqa sonqoyoqkunaqa, paykunataqa Diosmi sonqochanqa.

⁵Kusisamiyoqmi llamp'u sonqoyoqkunaqa, paykunaqa kay pacha hallp'atan herenciapaq chaskinqaku.

⁶Kusisamiyoqmi chanin-kaymanta yarqachikuqkunaqa, ch'akichikuqkunaqa, paykunaqa saksachisqan kanqaku.

⁷Kusisamiyoqmi khuyapayakuqkunaqa, paykunatapas Diosmi khuyapayallanqataq.

⁸Kusisamiyoqmi ch'uya sonqoyoqkunaqa, paykunan Diosta rikunqaku.

⁹Kusisamiyoqmi thak-kaypi kawsanapaq allipunachiqkunaqa, paykunaqa Diospa wawankunan kanku.

¹⁰Kusisamiyoqmi chaninkaqta ruwasqamanta qatiykachasqakunaqa, paykunapaqmi hanaq pacha qhapaqsuyuqa.

¹¹Kusisamiyoqmi kankichis, ñoqarayku k'amisuqtiykichispas qatiykachasuqtiykichispas, hinallataq tukuy mana allinkunata llullakuspa qankunamanta rimaqtinkupas.

¹²Kusikuychis q'ochukuychis, hanaq pachapi premioykichisqa hatunmi, chay hinatapunin qankunamanta ñawpaq profetakunatapas qatiykacharqanku, nispa.

¹³Jesusqa nillarqantaqmi: — Qankunan kay pachapi runakunapaq kachi kankichis, kachitaqchus q'aymayapunman chayri, ¿imapaqñataq valenman? Manan imapaqpas valenmanñachu, aswanpas hawaman wikch'unallapaqñan, hinaspa runakunaq sarusqan kananpaq.

¹⁴Qankunan runakunapaq k'anchay kankichis. Orqo patapi llaqtataqa manan imapas pakanmanchu.

¹⁵Lamparata hap'ichispaqa manan raki ukhumanchu churanku, aswanpas k'anchana patamanmi, wasipi kaqkunata llapanta k'anchananpaq.

¹⁶Chay hinata k'anchayniykichis runakunaq ñawpaqenpi k'anchachun, allin ruwasqaykichista rikuspa, hanaq pachapi kaq Yayaykichista yupaychanankupaq, nispa.

¹⁷Jesusqa nillarqantaqmi: — Ama yuyaychischu Diospa kamachikuynin simitapas profetakunaq qelqasqantapas p'akinaypaq hamusqaytaqa, manan p'akinaypaqchu hamuni, aswanpas hunt'anaypaqmi.

¹⁸Cheqaqtan niykichis, hanaq pacha kay pacha tukukunankama, kamachikuy simimantaqa manan huk ch'iñillanpas huk seq'ellanpas chinkanqachu llapan hunt'akunankama.

¹⁹Pipas kay kamachikuymanta huk huch'uy kaqllatapas p'akinman, chaytataq runakunaman yachachinman chayqa hanaq pacha qhapaqsuyupin sinchi pisipaq hap'isqa kanqa, pipas hunt'an hinaspa yachachin chaymi ichaqa hanaq pacha qhapaqsuyupi ancha allinpaq hap'isqa kanqa.

²⁰Niykichismi, manachus kamachikuy simita yachachiqkunaqmantapas fariseokunaqmantapas chanin kawsayniykichis aswan allin kanqa chayqa, manan hanaq pacha qhapaqsuyumanqa haykunkichischu, nispa.

²¹Jesusqa nillarqantaqmi: — Uyarirqankichismi ñawpa runakunaman: “Aman pitapas wañuchinkichischu, pipas runata wañuchiqqa juzganapaqñan kanqa”, nisqa kasqanta.

²²Ñoqataq ichaqa niykichis, pipas wawqenpaq phiñakuqqa juzganapaqñan kanqa, pipas wawqenta k'amiqqa juzganapi taripanapaqñan kanqa, pipas wawqenta ñakaqqa infierno ninapi juzganapaqñan kanqa.

²³Chay hinaqa ofrendaykita Diospa altarninman apaspa, chaypi wawqeykiq qan contra imapas kasqanta yuyarispaykiqa,

²⁴altar qayllaman ofrendaykita saqeykuy, hinaspa kutiriy, wawqeykiwanraq ñawpaqtaqa allipunamuy, kutimuspaykitaq ofrendaykita hayway.

²⁵Awqaykichus gobernadorman apasunki chayqa, ñanta rishaspallaykiraq paywan allipunapuy, juezman hap'iykachisunki chayqa, juezqa guardiamanmi hap'iykachisunkiman, hinaspan carcelpi rikukuwaq.

²⁶Cheqaqtan niyki, chaymantaqa manan lloqsimunkichu llapallan manukusqaykita kutichipunaykikama, nispa.

²⁷Jesusqa nillarqantaqmi: — Uyarirqankichismi: “Aman wasanchankichu”, nisqa kasqanta.

²⁸Ñoqataq ichaqa niykichis, pipas huk warmita munapakuspa qhawaqqa ñan sonqonpi chay warmiwan wasanchay huchata ruwanña.

²⁹Chayrayku, paña ñawiykichus huchaman urmachisunkiman chayqa, horqokuspa wikch'uy, aswan allinmi qanpaq huknin ñawiykiq chinkanan, llapan cuerpoykiq infiernoman wikch'uykusqa kananmantaqa.

³⁰Paña makiykitaqchus huchaman urmachisunkiman chayqa, kuchurqospa wikch'uy, aswan allinmi qanpaq kanman huknin makiykita wit'upunayki, llapan cuerpoykiq infiernoman wikch'uykusqa kananmantaqa, nispa.

³¹Jesusqa nillarqantaqmi: — Ñawpaqmantañan nisqa karqan: “Pipas warminmanta t'aqakuqqa t'aqanakuy qelqata qochun”, nispa.

³²Ñoqataq ichaqa niykichis: Mana qhelli huchapi purishaqtin warminmanta t'aqakuqqa, warmintan wasanchay huchaman tanqaykun. Pipas t'aqanasqa warmiwan casarakuqqa wasanchay huchatan ruwan, nispa.

³³Jesusqa nillarqantaqmi: — Uyarillarqankichistaqmi ñawpa runakunaman: “Aman llullakuspa jurankichu, aswanmi jurasqaykita Señor Diospaq hunt'anki”, nisqa kasqanta.

³⁴Ñoqataqmi ichaqa niykichis: Amapunin jurankichu. Aman jurankichu hanaq pacharaykupas, Diospa kamachikuna tiyananmi chayqa.

³⁵Aman jurankichu kay pacharaykupas, Diospa chaki sarunanmi chayqa. Aman jurankichu Jerusalenraykupas, ancha hatun Reypa llaqtanmi chayqa.

³⁶Aman jurankichu umaykiraykupas, manan atiwaqchu huk chukchallatapas yuraqyachiyta yanayachiytapas.

³⁷Aswanpas rimayniykichisqa kachun: “Arí” nisqaqa, “arí” nisqallapuni, “manan” nisqapas, “manan” nisqallapuni, chaykunamanta huk-hina niyqa saqraq yuyaychasqanmi, nispa.

³⁸Jesusqa nillarqantaqmi: — Uyarirqankichismi ñawpa runakunaman: “Runamasinpa ñawinta horqoqpaqqa paypa ñawinpas horqosqallataq kanqa, kirun horqoqpaqpas paypa kirunmi horqosqallataq kanqa”, nisqa kasqanta.

³⁹Ñoqataqmi ichaqa niykichis: Ama mana allin ruwaqniykichistaqa tupapakuychischu, aswanqa pipas paña uyaykipi ch'aqlasunki chayqa, lloq'e uyaykitapas kutirichiy.

⁴⁰Pipas juezman quejakuspa camisaykita qechuyta munaqmanqa capaykitawanpas qoykapuy.

⁴¹Pipas kuskan leguata riysinaykipaq pusachikuqniykitaqa, huk leguata riysiy.

⁴²Mañakuqniykimanqa qoy, qanmanta manukuyta munaqmanpas amataq “manan” niychu, nispa.

⁴³Jesusqa nillarqantaqmi: — Uyarillarqankichistaqmi: “Runamasiykitan munakunki, awqaykitataq cheqnikunki”, nisqa kasqanta.

⁴⁴Ñoqataq ichaqa niykichis: Munakuychis awqaykichiskunata, [saminchaychis ñakaqniykichiskunata, allinta ruwapuychis cheqnikuqniykichiskunapaq][3] mañapuychis k'amiqniykichiskunapaqpas qatiykachaqniykichiskunapaqpas.

⁴⁵Ahinapin hanaq pachapi kaq Yayaykichispa wawankuna kankichis, payqa intintan lloqsichimun allinkunapaqpas mana allinkunapaqpas, parachimullantaqmi chaninkunapaqpas mana chaninkunapaqpas.

⁴⁶Munakuqnillaykichista munakuwaqchis chayqa, ¿ima premioyoqtaq kawaqchis? ¿Manachu contribución cobraqkunapas chay hinallatataq ruwanku?

⁴⁷Wawqeykichiskunallatachus napaykunkichis chayqa, ¿hukkunaq ruwasqanmantaqa astawanchu ruwashankichis? ¿Manachu Diospi mana iñiqkunapas chay hinallatataq ruwashanku?

⁴⁸Imaynan hanaq pachapi Taytaykichispas chaninpuni, chay hinallataq qankunapas chaninpuni kaychis, nispa.