Read DIOSPA QHELQACHISQ Quechua MARCOS 16 Bible Online

MARCOS 16 - DIOSPA QHELQACHISQ Quechua bible

MARCOS 16

¹Samana p'unchay qhepatataq Magdalá llaqtayoq María, Jacoboq maman Mariapiwan, Salomepiwan q'apaq hawinakunata rantirqanku, Jesuspa cuerponta hawimunankupaq.

²Hinan semana qallariy p'unchaypi tutallamanta rispa inti lloqsimuqtinña aya p'ampanaman chayarqanku.

³Hinaspan paykunaqa ninakurqanku: — ¿Pitaq aya p'ampana punkumanta wisq'ana rumitaqa suchurichipuwasunchis? nispa.

⁴Qhawarispankutaq rumi suchuchisqataña rikurqanku. Chay rumiqa sinchi hatunmi karqan.

⁵Aya p'ampanaman haykuspataq yuraq qoysu p'achayoq waynata paña ladopi tiyashaqta rikurqanku, hinaspan mancharikurqanku.

⁶Chay waynataq warmikunata nirqan: — Ama mancharikuychischu, ¿chakatasqa kaq Nazaret llaqtayoq Jesustachu maskhashankichis? Payqa kawsarimpunmi, manan kaypiñachu. Qhawaykuychis payta churasqanku cheqasta.

⁷Riychis, hinaspa yachachisqankunaman Pedromanwan willamuychis, Jesusqa ñawpaqeykichistan Galilea provinciaman rishan, chaypin nisqasuykichisman hina payta rikunkichis, nispa.

⁸Warmikunataq aya p'ampanamanta lloqsispa ayqerqanku khatatatay mancharikuypiwan paykunata hap'iqtin. Hinaspan manchakusqankurayku mana pimanpas imatapas nirqankuchu. [

⁹Jesusqa semana qallariy p'unchaypi tutallamanta kawsarimpuspan, ñawpaqta Magdalá llaqtayoq Mariaman rikhurirqan. Paymantan qanchis supaykunata qarqosqa.

¹⁰Paymi Jesuspa yachachisqankunaman rispa willamurqan, paykunaqa llakisqan waqasharqanku.

¹¹Hinan paykunaqa Jesuspa kawsarimpusqanta Mariaq rikusqantawan uyarispa mana creerqankuchu.

¹²Chay qhepatataq iskay yachachisqankunaman Jesusqa huk-niraq rikch'ayniyoq rikhurirqan, paykunan campoman risharqanku.

¹³Hinan paykunapas kutispa wakin yachachisqankunaman willamurqanku, manallataqmi paykunatapas creerqankuchu.

¹⁴Chay qhepatataq Jesusqa chunka hukniyoq yachachisqankunaman rikhurirqan, mikhunankupaq tiyashaqtinku, hinaspan mana creesqankumanta, rumi sonqo kasqankumanta, kawsarimpusqanta rikuqkunatapas mana creesqankumantawan anyarqan.

¹⁵Hinaspan paykunata nirqan: — Kay pachantinta riychis, allin willakuykunata llapa runaman willamuychis.

¹⁶Pipas iñispa bautizachikuqmi qespichisqa kanqa, mana iñiqtaqmi huchachasqa kanqa.

¹⁷Ñoqapi iñiqkunaqa kay milagrokunatan ruwanqaku: Sutiypin supaykunata qarqonqaku, mosoq rimaykunatan rimanqaku,

¹⁸mach'aqwaykunatan makinkupi hap'inqaku, venenotapas ukyanqaku chayqa, manan paykunata imananqapaschu, onqosqakuna patamanmi makinkuta churaykunqaku, hinan qhaliyanqaku, nispa.

¹⁹Paykunaman rimaykusqanmantañan Señor Jesusqa hanaq pachaman hoqarisqa karqan, hinaspan Diospa paña ladonpi tiyaykurqan.

²⁰Yachachisqakunataq puririspa hinantinpi willamurqanku, kikin Señortaq paykunata yanapaq, milagrokunata ruwaspa willasqankutapas cheqaqchaq.][9]