Read DIOSPA QHELQACHISQ Quechua MARCOS 2 Bible Online

MARCOS 2 - DIOSPA QHELQACHISQ Quechua bible

MARCOS 2

¹Pisi p'unchaykunamantan wakmanta Jesusqa Capernaúm llaqtaman haykurqan, wasipi kashasqantataq yacharqorqanku.

²Hinan askha huñunakamurqanku, chay hinapin punkupas manaña ayparqanchu sayaykunankupaq, paykunamantaq Jesusqa allin willakuykunata willarqan.

³Hinaqtinmi wakin runakunaqa payman hamurqanku huk such'uta tawamanta wantumuspa.

⁴Askha runa kasqanraykun Jesusman mana asuykuyta atirqankuchu, chaymi paypa kashasqan cheqas wasi patata paskaspa t'oqospanku ima, puñunapi sirishaqta such'uta uraykachirqanku.

⁵Jesustaq paykunaq iñiyninkuta rikuspa, such'uta nirqan: — Churíy, huchaykikunatan pampachayki, nispa.

⁶Kamachikuy simita wakin yachachiqkunataq chaypi tiyasharqanku, paykunan sonqonkupi yuyaykuspa

⁷nirqanku: ¿Imaraykutaq kayri chay hinata riman? ¡Diosta pisichaspan riman! ¿Pitaq huchakunata pampachaytari atinman, manachu Dioslla? nispa.

⁸Hinan sonqonkupi chay hina yuyaykusqankuta Jesusqa yachaspa paykunata nirqan: — ¿Imaraykun chay hinata sonqoykichispi yuyaykunkichis?

⁹¿Mayqentaq aswan atikuq: Huchaykikunatan pampachayki, nispa such'uta niychu, icha: Hatariy puñunaykita hoqarispa ripuy, niytaqchu?

¹⁰Yachanaykichispaqpas Runaq Churinqa atiyniyoqmi kay pachapi huchakunata pampachananpaq. Chayta nispataq such'u runata nirqan:

¹¹— Qantan niyki: Hatariy, puñunaykita hoqarispa wasiykita ripuy, nispa.

¹²Hinaqtinmi hatarispa hina, puñunanta hoqarispa, llapankuq ñawpaqenmanta lloqsipurqan. Chaymi llapanku musphaspa Diosta hatuncharqanku: Manan kay hinataqa hayk'aqpas rikurqanchischu, nispanku.

¹³Jesustaq wakmanta qocha pataman lloqsirqan, hinan tukuy runakuna payman huñukurqanku, chaymi paykunata yachachirqan.

¹⁴Chaymanta rishaspanmi rikurqan Alfeoq churin Leví runata, contribución cobrana cheqaspi sisata cobrashaqta, hinaspan nirqan: — Qhepayta hamuy, nispa. Hinan sayarispa Leviqa qhepanta rirqan.

¹⁵Levipa wasinpin Jesusqa mikhunanpaq tiyaykurqan, chaypin kashallarqantaq askha runakuna, contribución cobraqkuna, huchasapamanta qhawasqakuna, Jesuspa yachachisqankunapiwan kuska tiyasharqanku. Askhan karqanku, Jesuspa qhepanta riqkunaqa.

¹⁶Contribución cobraqkunawan huchasapamanta qhawasqakunapiwan mikhuqta Jesusta rikuspankutaq, Fariseo t'aqamanta kamachikuy simita yachachiqkuna Jesuspa yachachisqankunata nirqanku: — ¿Imaraykun payqa contribución cobraqkunawan huchasapamanta qhawasqakunapiwan mikhunpas ukyanpas? nispa.

¹⁷Jesustaq chayta uyarispa paykunata nirqan: — Qhalikunaqa manan hampiqta necesitankuchu, aswanpas onqosqakunallan necesitanku. Manan hamurqani chanin runakunata waqyaqchu, aswanpas huchasapakunata waqyaqmi, nispa.

¹⁸Bautizaq Juanpa yachachisqankunapas, fariseokunaq yachachisqankunapas ayunashaqtinkun runakunaqa hamuspa Jesusta tapurqanku: — ¿Imaraykun Juanpa yachachisqankunapas, fariseokunaq yachachisqankunapas ayunanku, yachachisqaykikunañataq mana ayunankuchu? nispa.

¹⁹Jesustaq paykunata nirqan: — ¿Casarakuyman invitasqakunaqa, novio paykunawan kashaqtinqa ayunankumanchu? Paykunawan novio kashaqtinqa manan ayunankumanchu.

²⁰Ichaqa chayamunqan p'unchaykuna, noviota aparqoqtinku ayunanankupaq.

²¹Manan pipas mawk'a p'achamanqa mosoq telawan remiendanchu, chay hina kaqtinqa mosoq tela remiendon q'estispa mawk'akaqta astawan llik'inqa.

²²Manataqmi pipas upi vinotaqa mawk'a odrekunaman hillp'unchu, chay hina kaqtinqa, upi vinon poqospa phatachinman, vinopas hich'akunman, odrepas llik'ikapunman, aswanmi upi vinotaqa mosoq odrekunaman hillp'unku, nispa.

²³Samana p'unchaypi chakra ukhunta Jesús rishaqtinmi, yachachisqankunaqa purin-purin trigo umata k'aptayta qallarirqanku.

²⁴Chaymi fariseokunaqa payta nirqanku: — Qhawariy, ¿imaraykun yachachisqaykikunaqa samana p'unchaypi Diospa kamachikuyninta p'akispa ruwanku? nispa.

²⁵Jesustaq paykunata nirqan: — ¿Manachu hayk'aqpas leerqankichis Davidpa ruwasqanta? ¿Imaynachus paywan kaqkunapas pisichikuspa yarqachikusqankuta?

²⁶Abiatar uma sacerdote kashaqtinmi Davidqa runankunapiwan Diospa wasinman haykurqan, hinaspa Diospa ñawpaqenpi churasqa t'antakunata mikhurqan, runankunamanpas qoykullarqantaq. Chay t'antakunataqa sacerdotekunallan mikhuqku, nispa.

²⁷Paykunataqa nillarqantaqmi: — Samana p'unchayqa runapaq churasqan karqan, manan runachu samana p'unchaypaq.

²⁸Chayraykun Runaq Churinqa samana p'unchaypapas Señornin, nispa.