Read DIOSPA QHELQACHISQ Quechua MARCOS 3 Bible Online

MARCOS 3 - DIOSPA QHELQACHISQ Quechua bible

MARCOS 3

¹Jesusqa sinagogamanmi wakmanta haykurqan, chaypin kasharqan huk runa hukkaq makin ch'akisqa.

²Fariseokunataq Jesusta qhamiyarqanku samana p'unchaypi qhaliyachinmanchus chayta rikuspa payta huchachanankupaq.

³Hinaqtinmi ch'akisqa makiyoq runata Jesusqa nirqan: — Sayarimuspa chawpipi sayaykuy, nispa.

⁴Paykunatataq Jesusqa nirqan: — ¿Samana p'unchaypiqa allintachu ruwana icha mana allintachu ruwana? ¿Kawsaytaqa qespichinachu, icha wañuchinachu? nispa. Paykunataq ichaqa ch'inlla karqanku.

⁵Hinan muyuriqninpi kaqkunata phiñasqa qhawarispa, sonqonku rumiyasqa kasqanmanta llakikurqan, chaymi runata nirqan: — Haywarimuy makiykita, nispa. Runataq haywarirqan, hinan makinqa qhaliyarqapurqan.

⁶Chaymi fariseokunaqa lloqsispa Herodes t'aqapiwan Jesús contra rimanakurqanku wañuchinankupaq.

⁷Jesustaq ichaqa yachachisqankunawan qocha pataman rirqan, hinan Galilea provinciamanta ancha askha runa paypa qhepanta rirqan. Hinallataq Judea hap'iymanta,

⁸Jerusalén llaqtamanta, Idumea hap'iymanta, Jordán mayu inti lloqsimuy ladomanta, Tiro llaqtaq, Sidón llaqtaq muyuriqninmantawan Jesuspa tukuy ruwasqankunamanta uyarispanku, ancha askha runakuna payman hamurqanku.

⁹Chaymi yachachisqankunata kamachirqan boteqa wakichisqallapuni kashananpaq, askha runakuna kasqanrayku payta mana k'iskinankupaq.

¹⁰Askhatataqmi qhaliyachirqan, chayraykun tukuy onqoywan muchuqkunaqa Jesusman mat'ipakamurqanku payta llamiykunankupaq.

¹¹Mana allin espiritukunataq Jesusta rikuspa, ñawpaqenpi qonqorikurqanku, hinaspan qaparispa nirqanku: — ¡Qanqa Diospa Churinmi kanki! nispanku.

¹²Paytaq ichaqa allin-allinta paykunata kamachirqan ama paymanta sut'ita rimarinankupaq.

¹³Orqoman wicharispataq, Jesusqa pikunatachus munarqan chaykunata waqyakurqan, hinan payman hamurqanku.

¹⁴Chunka iskayniyoq qharikunatan akllakurqan paywan kuska purinankupaq, allin willakuykunata willaqta kachananpaq.

¹⁵Atiytataq paykunaman qorqan supaykunatapas runakunamanta qarqonankupaq.

¹⁶Paykunan karqan: Simón (paytan Pedro sutiwan suticharqan),

¹⁷Zebedeoq churinkuna Jacobo, Juanpiwan (paykunatan Boanerges sutiwan suticharqan, chayqa “Q'aqyaq churikuna” ninantan nin),

¹⁸Andrés, Felipe, Bartolomé, Mateo, Tomás, Alfeoq churin Jacobo, Tadeo, Zelote nisqa t'aqamanta Simón,

¹⁹Judas Iscariotepiwan, paymi Jesusta hap'ichiqqa karqan.

²⁰Hinamantataq wasiman hamurqanku. Chaymi wakmanta runakuna huñunakamurqanku, chayraykun paykunaqa manaña mikhuytapas atirqankuchu.

²¹Jesuspa familiantaq chaypi kasqanta uyarispa payta pusakapunankupaq hamurqanku, “manan yuyayninpichu kashan” niqtinku.

²²Jerusalén llaqtamanta hamuspankun kamachikuy simita yachachiqkunapas nirqanku: — Kay runaqa supaykunata kamachiq Beelzebupa hunt'aykusqanmi kashan, chaymi supaykunata qarqon, nispa.

²³Paykunata waqyaspataq rikch'anachiy simikunapi nirqan: — ¿Satanasqa pay kikinta qarqokunmanchu?

²⁴Huk suyupi runakuna cheqninakun chayqa, chay suyuqa tukukapunqan.

²⁵Huk familia cheqninakun chayqa, chay familiapas tukukapunqan.

²⁶Satanaspas kikinpa contranpi hatarispaqa, t'aqanasqa kaspaqa manan takyanmanchu, aswanmi tukukapunqa.

²⁷Manan pipas kallpasapaq wasinman haykuspa kaqninkunata suwayta atinmanchu kallpasapata manaraq watashaspaqa, wataspañan ichaqa wasinta suwayta atinman.

²⁸Cheqaqtan niykichis, Diosmi runakunaq ima huchantapas tukuy mana allin rimaywan k'amisqankutapas pampachanqa,

²⁹pipas Santo Espíritu contra mana allinta rimaspa pisichaqmi ichaqa mana hayk'aqpas pampachasqachu kanqa, aswanmi wiñaypaq huchayoq kapun, nispa.

³⁰Chaytaqa nirqan, “mana allin espirituyoqmi kashan” niqtinkun.

³¹Chayllamanmi Jesuspa wawqenkuna mamanpiwan hamurqanku, hinaspan hawapi kashaspanku payta waqyamuqta kachaykurqanku.

³²Jesuspa muyuriqninpi tiyashaq runakunataq payman willarqanku: — Mamaykin wawqeykikunapiwan maskhashasunkiku, hawapitaqmi kashanku, nispa.

³³Hinan paykunata nirqan: — ¿Pitaq mamaypas wawqeykunapas? nispa.

³⁴Muyuriqninpi kaqkunata qhawarispataq nirqan: — Kayqa mamaypas wawqeykunapas.

³⁵Pipas Diospa munayninta ruwaqmi wawqeypas, panaypas, mamaypas, nispa.