Read DIOSPA QHELQACHISQ Quechua LUCAS 14 Bible Online

LUCAS 14 - DIOSPA QHELQACHISQ Quechua bible

LUCAS 14

¹Huk samana p'unchaypi fariseokunaq huknin umallinpa wasinman mikhuq haykuqtinmi wakin runakunaqa Jesusta makilla qhawasharqanku.

²Huk punkillisqa runan Jesuspa ñawpaqenpi kasharqan.

³Hinan Jesusqa kamachikuy simita yachachiqkunata fariseokunatawan nirqan: — ¿Atikunmanchu samana p'unchaypi qhaliyachiy icha manachu? nispa.

⁴Paykuna ch'inlla kaqtinkutaq onqosqa runata hap'iykuspa qhaliyachirqan, hinaspanmi kachapurqan.

⁵Paykunatataq nirqan: — Mayqenniykichispa wawaykichispas wakaykichispas[4] t'oqoman urmaykuqtinqa, ¿manachu horqowaqchispacha samana p'unchayña kashaqtinpas? nispa.

⁶Manataq pipas chay nisqanman kutichiyta atirqanchu.

⁷Waqyasqakunaq imaynatachus allinkaq tiyanakunata akllasqankuta rikuspataq Jesusqa paykunata nirqan:

⁸— Pipas casarakuyman waqyasunkichis chayqa, aman allinkaq tiyanapiqa tiyankichischu, paqtan qanmanta aswan allinpaq hap'isqa paypa waqyamusqan kanman,

⁹hinaspanmi paytapas qantapas waqyamuq hamuspa nisunkiman: — Tiyanata payman qoykuy, nispa, hinaspataq qhepapi p'enqasqa tiyamuwaq.

¹⁰Aswanpas waqyasqa kaspaykiqa haykuspa qhepallapi tiyaykuy, waqyaqniyki hamuspa: — Amigóy, ñawpaqman asuykamuy, ninasuykipaq, chaymi mikhuq-masiykikunaq qayllanpi hatunchasqa kanki.

¹¹Pipas hatunchakuqqa huch'uyyaykachisqan kanqa, huch'uyyaykukuqtaqmi hatunchasqa kanqa, nispa.

¹²Waqyaqnin runatapas nillarqantaq: — P'unchaypas ch'isinpas hatun mikhuyta wakichispaykiqa aman waqyankichu amigoykikunata, wawqeykikunata, aylluykikunata, qhapaq wasi-masiykikunatapas, paqtan paykunapas kaqllatataq waqyaspa kutichipusunkiman.

¹³Aswanpas hatun mikhuyta wakichispaykiqa wakchakunata, ñuk'ukunata, wist'ukunata, ñawsakunatawan waqyanki,

¹⁴chaymi kusisamiyoq kanki. Paykunaqa manan kutichipuyta atisunkimanchu, ichaqa chanin runakunaq kawsarimpuyninpin Dios kutichipusunki, nispa.

¹⁵Chayta uyarispan huknin mikhuqmasin Jesusta nirqan: — Kusisamiyoqmi Diospa qhapaqsuyunpi hatun mikhuyta mikhuysikuqqa, nispa.

¹⁶Hinaqtinmi Jesusqa payta nirqan: — Huk runan hatun mikhuyta ruwaspa askha runata waqyachimurqan.

¹⁷Mikhuy horastataq waqyachimusqakunaman kamachinta kacharqan: — Hamuychis, llapanmi wakichisqaña kashan, nispa nimunanpaq.

¹⁸Ichaqa llapallankun: — Manan hamuyta atiymanchu niyta qallarirqanku. Ñawpaqkaqmi nirqan: — Chakra rantisqayta qhawaqmi rinay kashan, valekunin pampachaykuwachun, nispa.

¹⁹Hukninpas nirqan: — Phisqa masa torotan rantirqoni chaykunaq yapusqanta qhawaqmi rinay kashan, valekunin pampachaykuwachun, nispa.

²⁰Hukninpas nillarqantaq: — Chayllaraqmi casarakuni, manan riyta atiymanchu, nispa.

²¹Hinan kamachiqa chaykunata patronninman willarqan. Chaymi patronninqa phiñasqa kamachinta nirqan: — Usqhaylla riy plazakunata, callekunatapas, hinaspa kayman pusamuy wakchakunata, ñuk'ukunata, wist'ukunata, ñawsakunatawan, nispa.

²²Chaykuna qhepatan kamachiqa nirqan: — Wiraqocháy, kamachiwasqaykiman hinan waqyamuni, chaypas kashanraqmi tiyanaqa, nispa.

²³Chaymi patronqa kamachinta nirqan: — Riy callekunata, hatun ñankunatapas, hinaspa pusaykamuy wasiy hunt'a kananpaq.

²⁴Yachaychis, chay ñawpaq waqyasqa runakunaqa manapunin mayqenpas mikhunayta mallinqachu, nispa.

²⁵Askha runakunan Jesuswan risharqanku, kutirispataq paykunata nirqan:

²⁶— Pipas ñoqaman hamun hinaspa taytanta, mamanta, warminta, wawankunata, wawqenkunata, panankunata, pay kikintawanpas ñoqamanta astawan munakun chayqa, manan yachachisqay kayta atinmanchu.

²⁷Pipas ñoqarayku cruzpi ñak'arisaq hina wañunanña kaqtinpas qhepayta mana hamuqqa, manan yachachisqay kayta atinmanchu.

²⁸Pipas torreta sayarichiyta munaspaqa tukunankama gastananpaqmi ñawpaqtaraq qolqenta yupan hayk'achus kasqanta.

²⁹Paqtan teqsita churaspalla mana tukuyta atiqtin, llapan chayta rikuqkuna payta asipayankuman:

³⁰— Kay runaqa torre sayarichiyta qallarispan mana tukuyta atinchu, nispanku.

³¹Hinallataqmi chunka waranqa soldadoyoq reypas ñawpaqtaraq tiyaykuspa tanteakunqa, iskay chunka waranqa soldadoyoq contranpi hamuq reywan maqanakuq rinanpaq.

³²Mana atiq hina kaspataqmi karullapiraq awqan kashaqtin umallikunata kachanqa mana maqanakuspalla allipunakapunankupaq.

³³Chhaynan, mayqenniykichispas tukuy kaqninta mana saqeqqa, manan yachachisqay kayta atinmanchu, nispa.

³⁴Kachiqa allinmi, kachitaqchus q'aymayapunman chayqa, ¿imapaqñan valenman?

³⁵Manañan valenchu hallp'apaqpas wanupaqpas, aswanpas wikch'upunallapaqñan. Pipas uyarinanpaq ninriyoqqa uyarichun, nispa.