Read DIOSPA QHELQACHISQ Quechua LUCAS 19 Bible Online

LUCAS 19 - DIOSPA QHELQACHISQ Quechua bible

LUCAS 19

¹Jericó llaqtaman haykuspa, chayninta Jesús rishaqtinmi,

²huk qhapaq qhari, Zaqueo sutiyoq, chaypi kasharqan, paymi contribución cobraqkunaq huknin umallin karqan.

³Jesustan rikuytapuni munarqan pichus kasqanta reqsinanpaq. Taksalla kaspataq, Jesusta mana rikuyta atirqanchu askha runakuna kaqtin.

⁴Chaymi phawaylla ñawpaspa, Jesusta rikunanpaq sicómoro sach'aman wicharqan, chayninta Jesusqa rinan kaqtin.

⁵Jesustaq chayneqman chayaspa, sach'ata qhawarispa nirqan: — Zaqueo, usqhaylla uraykamuy, kunanmi wasiykipi qorpachakusaq, nispa.

⁶Chaymi Zaqueoqa usqhaylla uraykamuspa kusisqa payta chaskirqan.

⁷Chayta rikuspataq llapanku contranpi rimarqanku: — Huchasapa runaq wasinmanmi qorpachakuq haykun, nispanku.

⁸Zaqueotaq sayarispa Señor Jesusta nirqan: — Señorníy, kaqniykunaq kuskannintan wakchakunaman kunanpacha qosaq, imapichus pimantapas q'otuspa suwakurqani chayqa, tawa kutitan kutichipusaq, nispa.

⁹Chaymi Jesusqa payta nirqan: — Kunan p'unchaymi familiantinta Dios qespichisunki, qanpas Abrahampa miraynin kasqaykirayku.

¹⁰Runaq Churinqa hamurqan chinkasqa runata maskhaspa qespichinanpaqmi, nispa.

¹¹Jerusalén llaqta qayllapi Jesús kashaqtinmi uyariqninkunaqa chaykunata uyarispa yuyaykusharqanku Diospa qhapaqsuyun chayamunanpaq sispallaña kasqanta, chaymi Jesusqa kay rikch'anachiy simita nirqan:

¹²— Huk allin wiraqochan karu llaqtaman rirqan rey kananpaq nombramiento chaskiq, kutimuspataq kamachikunanpaq.

¹³Manaraq rishaspataq chunkantin kamachinkunata waqyaspa askha qolqeta sapankaman qorqan: Kutimunaykama kaywan llank'amushaychis, nispa.

¹⁴Chay wiraqochaq llaqta-masinkunataq ichaqa payta cheqnikuspanku qhepanta willaqkunata kacharqanku: — Chay runaq reyniyku kanantaqa manan munaykuchu, nispa nimunankupaq.

¹⁵Chaywanpas payqa chay suyuman nombrasqa rey kutimuspanmi qolqe qosqan kamachikunata waqyachimurqan, sapankaq qolqe mirachisqanta yachananpaq.

¹⁶Chaymi hukkaq hamurqan: — Wiraqocháy, qowasqayki qolqetaqa chunka chhikatawanmi mirarqachimuni, nispa.

¹⁷Chaymi payta nirqan: — Kusapunin, allin kamachi, pisillapi hunt'aq kasqaykiraykun chunka llaqtakunata kamachinki, nispa.

¹⁸Hukpas hamuspa nirqan: — Wiraqocháy, qowasqayki qolqetaqa phisqa chhikatawanmi mirarqachimuni, nispa.

¹⁹Hinan paytapas nillarqantaq: — Qanpas phisqa llaqtakunatan kamachinki, nispa.

²⁰Hukpas hamuspa nillarqantaq: — Wiraqocháy, kayqa qowasqayki qolqeyki, khipunapin waqaycharqani,

²¹phiña runa kaqtiykin manchakurqayki, mana t'akasqaykimantan hoqarinki, mana tarpusqaykimantan cosechanki, nispa.

²²Chaymi payqa nirqan: — Mana allin kamachi, rimasqaykipin taripayki: Phiña runa kaspay, mana t'akasqaymanta hoqariq, mana tarpusqaymantapas cosechaq kasqayta yachashaspaykiqa,

²³¿imaraykun qolqeytaqa mana bancomanchu churamurqanki, kutimuspa interesnintinta mañakapunaypaq? nispa.

²⁴Hinaspan chaypi kaqkunata nirqan: — Qosqay qolqetaqa qechuychis, hinaspa chunka chhika qolqe mirachiqman qoychis, nispa.

²⁵Paykunataq nirqanku: — Wiraqocháy, payqa chunka chhika qolqeyoqñatáq, nispanku.

²⁶Paytaq nirqan: — Pipas kaqniyoqmanqa astawanraqmi qosaq, mana kaqniyoqmantataqmi pisilla kaqnintapas qechusaq.

²⁷Paykunaq reynin kanayta mana munaq awqaykunatapas kayman apamuychis, hinaspa ñawpaqeypi wañuchiychis, nispa.

²⁸Chay rimayta tukuspataq Jesusqa Jerusalén llaqtaman wicharqan.

²⁹Olivos orqo chakipi kashaq Betfagé llaqtawan Betania llaqtawan tupayman chayaspan, iskay yachachisqankunata nirqan:

³⁰— Haqay chimpa llaqtachaman riychis, chayman haykuspan mana hayk'aq sillakusqa malta asno watasqata tarimunkichis, hinaspan paskaspa chayta aysamunkichis.

³¹Pipas: ¿Imapaqmi paskashankichis? nisunkichis chayqa, ninkichis: Señormi kay asnota necesitan, nispa.

³²Kachasqakunataq rispa nisqanta hina tarimurqanku.

³³Malta asnota paskashaqtinkutaq asnoyoqkunaqa paykunata nirqanku: — ¿Imapaqmi asnoykuta paskashankichis? nispa.

³⁴Chaymi paykunaqa nirqanku: — Señormi kay asnota necesitan, nispanku.

³⁵Hinan Jesusman aysamuspanku, p'achankuwan asnota caronaykuspa Jesusta sillaykachirqanku.

³⁶Pay rishaqtintaq, runakunaqa p'achankuta ñanpi mast'arqanku.

³⁷Jerusalén llaqtaman qayllaykushaspa Olivos orqota uraykushaqtinkun, llapa yachachisqankunaqa tukuy milagrokunata rikusqankumanta q'ochukuspanku qaparispa Diosta yupaycharqanku:

³⁸— ¡Yupaychasqa kachun Señor Diospa sutinpi hamuq Reyqa! ¡Hanaq pachapi thak-kay kachun, Diostaq yupaychasqa kachun! nispanku.

³⁹Hinan runakuna ukhupi kaq wakin fariseokunaqa nirqanku: — Yachachikuq, upallachiy yachachisqaykikunata, nispa.

⁴⁰Jesustaq paykunata nirqan: — Niykichismi, paykunachus upallanman chayqa, rumikunan qaparinman, nispa.

⁴¹Jerusalén llaqtaman qayllaykuspa qhawarispataq chay llaqtamanta Jesusqa waqarqan:

⁴²— ¡Maytan munayman kunan p'unchayllapas qanqa thak-kaypi kawsanaykimanta yachanaykita! ¡Ichaqa, manaraqmi kunanqa entiendeshankichu!

⁴³P'unchaykunan chayamusunki, awqaykikunan muyuriqniykipi perqata sayarichispa muyuykusunki, tukuyneqmantataq k'iskiykusunki.

⁴⁴Hinaspan pampaman thunisunki, hinallataq qan ukhupi tiyaq wawaykikunatapas, manataq huk rumillapas rumi patapi saqesqachu kanqa, qespichinasuykipaq hamuq Diosta mana reqsisqaykirayku, nispa.

⁴⁵Dios yupaychana wasiman haykuspan Jesusqa lliw chaypi vendeqkunata hawaman qarqospa nirqan:

⁴⁶— Diospa Simin Qelqan nin: “Wasiyqa mañakuna wasin”, nispa. Qankunataq ichaqa suwakunaq tiyanan qaqa wasiman hina tukuchipusqankichis, nispa.

⁴⁷Dios yupaychana wasipitaq sapa p'unchay yachachirqan, ichaqa sacerdote umallikunan, kamachikuy simita yachachiqkunawan, llaqtapi kurak runakunapiwan, Jesusta wañuchiyta munarqanku.

⁴⁸Ichaqa manan imaynamantapas atirqankuchu, llapan runakuna makilla payta uyarisqankurayku.