Read DIOSPA QHELQACHISQ Quechua LUCAS 20 Bible Online

LUCAS 20 - DIOSPA QHELQACHISQ Quechua bible

LUCAS 20

¹Huk p'unchaymi Dios yupaychana wasipi runakunata Jesús yachachispa Diosmanta allin willakuykunata willashaqtin, sacerdote umallikuna, kamachikuy simita yachachiqkuna, kurak runakunapiwan Jesusman asuykuspa

²nirqanku: — Niwayku, ¿ima atiywanmi kaykunata ruwanki? ¿Pitaq kay atiyta qorqasunki? nispa.

³Hinaqtinmi Jesusqa paykunata nirqan: — Ñoqapas hukta tapuykusqaykichis.

⁴¿Pitaq Juanta kachamurqan bautizananpaq? ¿Dioschu? Icha, ¿runakunachu? Niwaychis, nispa.

⁵Hinan paykunaqa ninakurqanku: — “Diosmi” nisun chayqa, ninqan: ¿Imaraykun payta mana creerqankichischu? nispa.

⁶“Runakunan” nisun chayqa, llapa runan ch'aqewasun, Juanqa cheqaq profetapuni kasqanta yachasqankurayku, nispa.

⁷Chaymi nirqanku: — Pichus kachamusqantaqa manan yachaykuchu, nispa.

⁸Hinan Jesuspas paykunata nirqan: — Ñoqapas manallataqmi niykichismanchu ima atiywanchus kaykunata ruwasqayta, nispa.

⁹Kay rikch'anachiy simitan runakunaman Jesusqa nirqan: — Huk runan chakranpi uvas yurakunata plantarqan, hinaspan llank'aqkunaman wakiypi qospa unaypaq karuman ripurqan.

¹⁰Uvas pallana chayamuqtinmi chakrayoqqa huknin kamachinta kacharqan payman tupaq uvasta llank'aqkunamanta chaskimunanpaq. Llank'aqkunataq ichaqa maqaykuspa mana imayoqta qatirparirqanku.

¹¹Wakmantataq paykunaman hukkaq kamachinta kacharqan, chaytapas maqaykuspa millayta k'amispa, mana imayoqta qatirparirqanku.

¹²Hukkaqtañataq wakmanta kacharqan. Chaytapas maqaykuspallataq qarqorqanku.

¹³Hinaqtinmi uvas chakrayoqqa nirqan: — ¿Imanasaqtaq? Munasqay churiyta kachasaq, payta rikuspaqa ichapas respetanqaku, nispa.

¹⁴Llank'aqkunataq ichaqa payta rikuspa ninakurqanku: — Kayqa chakrayoqpa churinmi, wañurqachisun, chakrataq ñoqanchispaq kapunqa, nispanku.

¹⁵Hinaspan uvas chakra hawaman aysaspa wañuchirqanku. Chaymi Jesusqa nirqan: — Uvas chakrayoqqa, ¿imananqataq paykunata?

¹⁶Hamunqan, hinaspan chay llank'aqkunata wañuchinqa, uvas chakrantataq hukkunaman qopunqa, nispa. Chayta uyarispankutaq runakunaqa nirqanku: — ¡Amayá chay hinaqa kachunchu! nispanku.

¹⁷Jesustaq paykunata qhawaykuspa nirqan: — Sut'inchawaychis, Diospa Simin Qelqan kay hinata nin: “Wasi perqaqkunaq wikch'usqan rumin esquina hap'iq churasqa rumi kapun”, nispa.

¹⁸Pipas chay rumi pataman urmaqqa p'akikunqan, piqpa patanmanchus rumi urmaykuspataqmi ñut'unqa, nispa.

¹⁹Hinan sacerdote umallikunaqa kamachikuy simita yachachiqkunapiwan chay rato Jesusta hap'irqoytapuni munarqanku, paykuna contra chay rikch'anachiy simita nisqanta reparaspanku, ichaqa runakunatan manchakurqanku.

²⁰Hinamantataq chanin runaman tukuq qhamiyaqkunata kacharqanku ima rimasqallanpipas Jesusta hap'irqospa, chayman tumpalla kamachikuqman payta hap'ichinankupaq.

²¹Paykunan Jesusta tapurqanku: — Yachachikuq, chanin rimasqaykitapas yachachisqaykitapas yachaykun. Qanqa manan pimanpas sayapakunkichu, aswanpas Diospa munayninman hinapuni kawsanatan yachachinki.

²²¿Allinchu Roma rey Cesarman contribucionta pagay? Icha, ¿manachu? nispa.

²³Jesustaq ichaqa llullallawan tapusqankuta yachaspan nirqan:

²⁴— Qhawachiwaychis huk qolqeta. ¿Piqpa uyantaq kaypi kashan? ¿Piqpa sutintaq kaypi qelqasqa kashan? nispa. Hinan paykunaqa: — Roma rey Cesarpan, nirqanku.

²⁵Hinaqtinmi Jesusqa nirqan: — Roma rey Cesarpa kaqtaqa Cesarman qopuychis, Diospa kaqtataq Diosman qopuychis, nispa.

²⁶Chay hinapin runakunaq qayllanpi mana pantaspa rimaqtin mana hap'irqoyta atirqankuchu, aswanmi chay hina kutichisqanmanta musphaspa upallarqanku.

²⁷Saduceokunaqa kawsarimpuy kasqanta manan creeqkuchu. Chaymi wakinninku Jesusman asuykuspa tapurqanku:

²⁸— Yachachikuq, Moisesmi qelqapuwarqanku: Piqpa wawqenpas casarakuspa mana wawayoq kashaspa wañukapunman chayqa, wawqenmi chay viudawan casarakunan, hinaspan wawqenpaq wawata churiyapunan, nispa.

²⁹Qanchis wawqekunan karqanku, ñawpaqkaqmi casarakurqan, manaraq wawayoq kashaspataq wañukapurqan.

³⁰Iskay kaqpas viudawan casarakurqan, hinan chaypas mana wawallayoqtaq wañukapurqan,

³¹kinsakaqpas chay viudawan casarakullarqantaq, chay hinatakaman qanchisnintin casarakuspa mana wawayoqkama wañukapurqanku.

³²Warmipas qhepankuta wañukapullarqantaq.

³³Kawsarimpuy p'unchaypiri, ¿mayqenkaqpa warmintaq kanqa? Qanchisnintinmi paywanqa casarakurqanku, nispa.

³⁴Hinaqtinmi Jesusqa paykunata nirqan: — Kay pachallapin qharipas warmipas casarakunku, casarachisqataq kankupas,

³⁵ichaqa wañusqakunamanta kawsarimpunankupaq Diospa akllasqankunaqa hamuq kawsaypiqa manañan casarakunqakuchu, manallataq casarachisqapaschu kanqaku,

³⁶mana wañuq kasqankurayku. Paykunaqa angelkuna hinan, Diospa wawankunan kanku wañusqankumanta kawsarimpusqankurayku.

³⁷Wañusqakunaq kawsarimpunan kasqantaqa Moisespas yachachirqanmi t'ankarmanta qelqasqanpi, Señor Diosqa “Abrahampa Diosnin, Isaacpa Diosnin, Jacobpa Diosnin”, kasqanta, nispa.

³⁸Diosqa manan wañusqakunaq Diosninchu, aswanpas kawsaqkunaq Diosninmi, paypaqqa llapankupas kawsashanmi, nispa.

³⁹Kamachikuy simita yachachiqkunamanta wakinnintaq nirqanku: — Yachachikuq, allintan ninki, nispa.

⁴⁰Manañan astawanqa imatapas tapurqankuñachu.

⁴¹Jesustaq paykunata nirqan: — ¿Imanaqtinmi ninku Cristoqa Davidpa churin kasqanta?

⁴²Kikin Davidmi Salmos qelqapi nin: “Señor Diosmi Señorniyta nirqan: Paña ladoypi tiyaykuy

⁴³awqaykikunata chaki sarunaykiman churanaykama”, nispa.

⁴⁴Davidtaq payta “Señor” nin, ¿chayri imaynapitaq paypa churinri kanman? nispa.

⁴⁵Llapa runakuna uyarishaqtinmi Jesusqa yachachisqankunata nirqan:

⁴⁶— Cuidakuychis kamachikuy simita yachachiqkunamanta, paykunan munanku qoysu p'achayoq puriyta, plazakunapi runakunaq napaykunanta, sinagogakunapipas kurak runakunaq tiyanankunata, hatun mikhuykunapipas allinkaq tiyanakunata.

⁴⁷Hinallataq wakcha viudakunaq kaqnintapas qechunku, Diosmanta unayta mañakuq tukuspataq chay ruwasqankuta pakayta munanku. Paykunan aswan huchachasqaqa kanqaku, nispa.