Read DIOSPA QHELQACHISQ Quechua LUCAS 22 Bible Online

LUCAS 22 - DIOSPA QHELQACHISQ Quechua bible

LUCAS 22

¹Pascua fiestan otaq Mana Qonchuyoq T'antata Mikhuna Fiestan sispaykamusharqanña.

²Sacerdote umallikunataq kamachikuy simita yachachiqkunapiwan, runakunaq ch'aqwananta manchakuspa imaynatachus Jesusta wañuchinankuta yuyaykurqanku.

³Iscariote sutichasqa Judasmanmi Satanasqa haykurqan, paymi chunka iskayniyoq yachachisqakunamanta huknin karqan.

⁴Judasmi rispa sacerdote umallikunawan, Dios yupaychana wasi guardia umallikunawanpas rimanakamurqan, imaynatachus Jesusta paykunaman hap'iykachinapaq.

⁵Hinan umallikunaqa kusikuspa Judasman qolqeta qonankupaq rimanakurqanku.

⁶Judastaq: — Allinmi, nirqan. Hinaspan yuyaykurqan imaynatachus runakunata mana ch'aqwachispalla Jesusta umallikunaman hap'ichinanpaq.

⁷Mana qonchuyoq t'anta mikhuna p'unchaymi chayamurqan, chay p'unchaymi Pascua Fiestapaq corderota nak'aqku.

⁸Jesusmi Pedrota Juantawan kacharqan: — Riychis, Pascua Fiesta mikhunata wakichimuychis mikhunanchispaq, nispa.

⁹Chaymi paykunaqa: — ¿Maypin wakichimunaykuta munanki? nirqanku.

¹⁰Hinaqtinmi payqa nirqan: — Llaqtaman haykuspaykichismi unuta p'uyñupi apashaq runawan tupaspa qhepanta rinkichis, may wasimanchus haykunankama.

¹¹Hinaspan wasiyoqta ninkichis: Yachachikuqmi nisunki: ¿Mayqen wasipin yachachisqaykunawan Pascua corderota mikhusaq? nispa.

¹²Hinan payqa altospi allichasqataña hatun wasita rikuchisunkichis, chaypin wakichimunkichis, nispa.

¹³Rispankutaq Jesuspa nisqanman hina tarimuspa chay mikhunata wakichimurqanku.

¹⁴Mikhuna hora chayamuqtintaq Jesusqa mikhuq tiyaykurqan apostolninkunapiwan.

¹⁵Hinaspan paykunata nirqan: — Maytapunin munarqani, manaraq ñak'arishaspay, qankunawan kay Pascua cordero mikhuyta.

¹⁶Niykichismi kay hina mikhunataqa manañan mikhusaqchu, aswanpas Diospa qhapaqsuyun hunt'akusqan p'unchayñan mikhusaq, nispa.

¹⁷Vinoyoq vasota hap'ispataq graciasta qospaña nirqan: — Kayta hap'iychis, hinaspa sapankaykichis ukyaychis.

¹⁸Niykichismi, uvas ch'irwasqataqa manañan ukyasaqchu, aswanpas Diospa qhapaqsuyun hunt'akuqtinñan ukyasaq, nispa.

¹⁹T'antata hap'ispataq, graciasta qospaña phasmirqan, hinaspan paykunaman qorqan: — Kayqa qankunarayku qosqa cuerpoymi, kaytan ruwankichis yuyariwanaykichispaq, nispa.

²⁰Cenasqanmantañataqmi vinoyoq vasota hap'ispa nirqan: — Kay vinoyoq vasoqa yawarniywan cheqaqchasqa mosoq rimanakuymi, ñoqan yawarniyta qankunarayku hich'asaq, nispa.

²¹Chaywanpas awqaykunaman hap'iykachiwaqniyqa ñoqawanmi mesapi kashan.

²²Cheqaqtapunin Runaq Churinqa Diospa unanchasqanman hina wañunqa. Ichaqa, ¡ay, chay hap'ichiqnin runamanta! nispa.

²³Chaymi paykunaqa tapunakurqanku mayqenninkuchus chay hap'ichiqqa kanankumanta.

²⁴Yachachisqakunaqa mayqenninkuchus kurak kanankumantan tapunakurqanku.

²⁵Jesustaq paykunata nirqan: — Hatun suyukunaq reyninkunaqa paykunatan kamachinku, paykunata kamachiqkunataq “allin ruwaq” nisqa kanku.

²⁶Qankunan ichaqa mana chay hinachu kanaykichis, aswanpas qankuna ukhupi kurak kayta munaqqa sullk'a hinalla kachun, qollana kayta munaqtaq kamachi ruwaq hina kachun.

²⁷¿Mayqentaq kurakqa, mikhunanpaq tiyaykuqchu, icha, serviqchu? Mikhunanpaq tiyaykuqkaqmi riki. Chaypas ñoqan kamachi ruwaq hina qankuna ukhupi kashani.

²⁸Qankunaqa wateqasqa kasqaykunapin ñoqallawanpuni kasharqankichis.

²⁹Chaymi ñoqapas kamachikuqta churaykichis, imaynan Yayaypas ñoqata churawarqan hinata.

³⁰Qhapaqsuyuypin, mesaypi mikhunaykichispaq ukyanaykichispaq tiyaykunkichis, hinaspan Israelpa chunka iskayniyoq ayllunta juzgaspa kamachinaykichispaq tiyaykunkichis, nispa.

³¹Jesusqa nillarqantaqmi: — Simón, Simón, Satanasmi trigota hina suysunasuykichispaq qankunata maskhasunkichis.

³²Ichaqa ñoqan qanpaq mañakuniña iñiyniyki mana pisiyananpaq. Ñoqaman kutirikampuspaykitaqmi wawqeykikunata kallpachanki, nispa.

³³Chaymi Simonqa nirqan: — Señorníy, liston kashani carcelmanpas, wañuymanpas qanwan kuska rinaypaq, nispa.

³⁴Hinan Jesusqa nirqan: — Pedro, ñoqan niyki, kunanmi manaraq gallo waqashaqtin reqsiwasqaykita kinsa kutita negawanki, nispa.

³⁵Hinan Jesusqa paykunata tapurqan: — Mana qolqeyoqta, mana qoqawayoqta, mana usut'ayoqta qankunata kachashaqtiyqa, ¿imallapas pisirqasunkichischu? nispa. Chaymi paykunaqa nirqanku: — Manan imapas, nispa.

³⁶Jesusqa nillarqantaqmi: — Kunan ichaqa kaqtinqa qolqetapas qoqawatapas apakuchun, mana espadayoqtaq p'achanta vendespa espadata rantikuchun.

³⁷Niykichismi Diospa Simin Qelqan nin: “Huchasapakuna hinan wañurqan”, nispa. Chaymi ñoqawan hunt'akunqa. Ñoqamanta qelqasqaqa hunt'akushanpunin, nispa.

³⁸Hinaqtinmi paykunaqa nirqanku: — Señor, kayqa iskay espada kashan, nispa. Chaymi Jesusqa: — Chayllataña, nirqan.

³⁹Wasimanta lloqsispataq, Olivos orqoman rirqan imaynan rillaqpuni hinata, yachachisqankunataq qhepanta rirqanku.

⁴⁰Chay orqoman chayaspataq paykunata nirqan: — Mañakuychis ama wateqasqa kanaykichispaq, nispa.

⁴¹Hinaspan Jesusqa rumi chanqayman hina paykunamanta t'aqarikurqan, qonqoriykukuspataq Diosmanta mañakurqan:

⁴²Yayáy, munanki chayqa kay ñak'arinata ñoqamanta anchhurichiy, ichaqa ama ñoqaq munasqaychu kachun, aswanpas qanpa munasqayki, nispa.

⁴³Hinaqtinmi hanaq pachamanta huk ángel rikhurimurqan payta kallpachananpaq.

⁴⁴Sinchitapuni llakikuspataq aswan tukuy sonqowan mañakurqan, hump'inpas hatuchachaq yawar sut'uy hinaraq pampaman sut'urqan.

⁴⁵Mañakusqanmanta sayarispataq yachachisqankunaman kutispa, llakiq atisqan puñushaqta tarirqan.

⁴⁶Hinaspan paykunata nirqan: — ¿Imanaqtinmi puñushankichis? Sayariychis, Diosmanta mañakuychis ama wateqayman urmanaykichispaq, nispa.

⁴⁷Jesús rimashallaqtinraqmi askha runakuna rikhurimurqan, ñawpaqenkutataq hamurqan chunka iskayniyoq yachachisqakunamanta huknin, Judas sutiyoq, paymi Jesusman asuykurqan much'aykunanpaq.

⁴⁸Chaymi Jesusqa payta nirqan: — Judas, ¿much'aykuywanchu Runaq Churinta awqankunaman hap'iykachinki? nispa.

⁴⁹Jesuswan kaqkunataq imachus kananta yachaspa nirqanku: — Señor, ¿espadawanchu maqapakusaqku? nispa.

⁵⁰Hukninkutaq uma sacerdoteq kamachinta espadawan waqtaspa paña ninrinta qhorurqorqan.

⁵¹Hinan Jesusqa nirqan: — ¡Ama hinaychischu! nispa. Ninrinta llamiykuspataq kaq rato alliyarqachirqan.

⁵²Jesustaq pay contra hamuq sacerdote umallikunata, Dios yupaychana wasi guardiakunaq umallinkunata, kurak runakunatawan nirqan: — ¿Suwa hap'iq hinachu espadakunantin, k'aspikunantin hamunkichis?

⁵³Sapa p'unchaymi Dios yupaychana wasipi qankunawan kasharqani, manataq hap'iwarqankichischu, ichaqa ruwanaykichis horasñan, laqhayaqpi kamachikuqpa munaychakunan horaspiwanmi, nispa.

⁵⁴Jesusta hap'irqospataq uma sacerdoteq wasinman apaykurqanku. Pedrotaq karu qhepallanta rirqan.

⁵⁵Patio chawpipi ninata hap'ichispa, muyuriqninpi tiyaykuqtinkutaq, Pedropas paykunawan tiyaykullarqantaq.

⁵⁶Payta nina qayllapi tiyashaqta rikuspataq huk warmi kamachi allinta qhawaykuspa nirqan: — Kay runapas Jesuswanmi kasharqan, nispa.

⁵⁷Hinan Pedroqa negakurqan: — ¡Warmi! manan paytaqa reqsinichu, nispa.

⁵⁸Manaraq unaymantataq, hukpas payta rikurqospa nirqan: — Qanpas paykunamantan kanki riki, nispa. Hinan Pedroqa: — ¡Runa! manan paykunamantachu kani, nirqan.

⁵⁹Huk horamanta hinataq, hukpas kaqllatataq nirqan: — Cheqaqtapunin kay runapas Jesuswan kasharqan, Galilea provinciamantataqmi kanpas, nispa.

⁶⁰Chaymi Pedroqa nirqan: — ¡Runa! manan yachanichu imatachus nisqaykita, nispa. Pay rimashallaqtinraqtaq galloqa waqarqan.

⁶¹Chay raton, Señor Jesusqa kutirispa Pedrota qhawarirqan. Hinan Pedroqa yuyarirqan, Señor Jesuspa: Manaraq gallo waqashaqtinmi kinsa kutita negawanki, nispa nisqanta.

⁶²Chaymi Pedroqa hawaman lloqsispa, khuyayta waqaykurqan.

⁶³Jesusta cuidaq runakunataq asipayarqanku, waqtarqanku.

⁶⁴Ñawinta wataspataq uyanpi ch'aqlaspa tapurqanku: — Watuy, ¿pin ch'aqlashasunki? nispanku.

⁶⁵Hinallataq payta k'amispa imaymanatawanraq nirqanku.

⁶⁶P'unchayña kaqtintaq, llaqtapi kurak runakuna, sacerdote umallikuna, kamachikuy simita yachachiqkunapiwan huñunakuspanku, Jesusta huñunakuyninkuman apaspa nirqanku:

⁶⁷— ¿Qanchu Cristo kanki? Willawayku, nispanku. Chaymi paykunata nirqan: — Niykichismanña chaypas manan iñiwankichismanchu,

⁶⁸tapuykichisman chaypas manan kutichiwankichismanchu.

⁶⁹Kunanmantan ichaqa Runaq Churinqa, Tukuy-atiyniyoq Diospa paña ladonpi tiyaykunqa, nispa.

⁷⁰Hinan llapanku nirqanku: — Chhaynaqa, ¿qanchu Diospa Churin kanki? nispa. Jesustaq nirqan: — Arí, ñoqan kani qankunaq nisqaykichisman hina, nispa.

⁷¹Chaymi paykunaqa ninakurqanku: — Siminmanta ñoqanchis kikinchis uyarishaspaqa, ¿imapaqñataq testigotaqa munasunchis? nispa.