Read DIOSPA QHELQACHISQ Quechua DEUTERONOMIO 11 Bible Online

DEUTERONOMIO 11 - DIOSPA QHELQACHISQ Quechua bible

DEUTERONOMIO 11

¹Chay hinaqa, Diosniykichis Señor Diosta munakuychis, hinallataq hunt'anaykichispaq kamachisqasuykichis unanchayninta, chaninchayninta, kamachikuyninkunatapas kasukuychis.

²Yuyariychis Diosniykichis Señor Diospa wanachiyninkunata, chaytaqa manan wawaykichiskuna yachanchu manataq rikurqankupaschu. Yuyariychis paypa hatun-kayninta hatun atiynintapas,

³hinallataq Egipto rey Faraón contra suyun contra ima señalkunata musphanakunata ruwasqantapas.

⁴Egipto soldadokuna qatimusuqtiykichismi, Señor Diosqa caballonkunantinta carretankunantinta Puka Qochawan millp'uchirqan. Ahinapin paykunata wañuchipurqan.

⁵Yuyarillaychistaq manaraq kayman chayamushaqtiykichis ch'inneqpi Señor Diospa qankunapaq tukuy ruwasqankunata,

⁶hinallataq Rubén ayllumanta Eliabpa churin Datanta Abiramtawan ruwasqantapas. Llapa Israel runakuna rikushaqtinmi, paykunata aylluntinta karpantinta tukuy kaqninkunantinta pampa kicharqokuspa millp'urqorqan.

⁷Cheqaqtapunin qankunaqa Señor Diospa chay hatun musphay ruwasqankunata rikurqankichis.

⁸Kunan kamachisqay tukuy kamachikuykunata hunt'aychis, ahinapin kallpayoq kankichis, chaskinaykichis suyutapas hap'ikapunkichis,

⁹hinallataq chay hallp'api unayta kawsankichis. Chaytan Señor Diosqa ñawpa taytaykichisman mirayninkumanpas qonanpaq prometesqa, chay hallp'aqa lecheq miel misk'iq askha kananmi.

¹⁰Hap'ikapunaykichis hallp'aqa manan lloqsimusqaykichis Egipto hallp'a hinallachu, chaypiqa muhu tarpusqaykichista huertata hinan makilla qarparqankichis.

¹¹Hap'ikapunaykichis hallp'an ichaqa wayq'okunayoq orqokunayoq, parapas chayashallanmi.

¹²Chay hallp'ataqa Diosniykichis Señor Diosmi mana saqespa makilla waqaychashan wata qallariymanta wata tukukuykama.

¹³Kunan p'unchay kamachisqay simikunata kasukunkichis, Diosniykichis Señor Diostapas munakunkichis, tukuy sonqo tukuy alma payta servinkichis chayqa,

¹⁴Diosniykichis Señor Diosqa tiemponpin parata chayachimunqa, tarpuy kinray paratapas hallmay kinray paratapas. Ahinapin qankunaqa hoqarinkichis trigotapas, vinotapas, aceitetapas.

¹⁵Hinallataq uywakunaq mikhunanpaq campopi q'achuta wiñachinqa, qankunaq mikhunaykichispas llasaqmi kanqa.

¹⁶Allinta cuidakuychis, paqtataq sonqoykichiswan q'otuchikuwaqchis. Ama Señor Diosmanta t'aqakuychischu, amataq wak dioskunatapas yupaychaspa serviychischu.

¹⁷Mana chayqa, qankuna contra phiñakuspanmi Señor Diosqa parata mana chayachimunqachu, hinan chakrapas rurusqanta mana poqochinqachu, hinallataq qankunapas pisi p'unchaykunallapi Señor Diospa qonasuykichis allin hallp'api wañunkichis.

¹⁸Chayrayku, chay simikunata sonqoykichispi allinta waqaychaychis, hinallataq makiykichismanpas mat'iykichismanpas chay simikuna qelqasqata watakuychis yuyarinaykichispaq.

¹⁹Wawaykichiskunamantaq chay simikunata yachachiychis, chaykunamanta rimapayaychis wasipi kashaspapas, ñanta purishaspapas, puñuykushaspapas, hatarishaspapas.

²⁰Qelqakullaychistaq wasiykichis punku sayaq k'aspikunapipas, llaqtaykichis punkukunapipas.

²¹Ahinapin ñawpa taytaykichisman qonanpaq Señor Diospa prometesqan hallp'api qankunapas wawaykichiskunapas unayta kawsankichis, kay pachapas hanaq pachapas kashasqan tukuy p'unchaykunapi.

²²Kunan kamachisqayman hinachus tukuy kay simikunata hunt'ankichis Diosniykichis Señor Diosta munakunkichis, kamachikuyninkunatapas kasukunkichis, hunt'aqllapuni kankichis chayqa,

²³tukuy suyukunatan ñawpaqeykichismanta Señor Diosqa wikch'unqa. Qankunamanta aswan askha aswan kallpayoq suyukunaña kaqtinpas, atipankichispunin.

²⁴Maykamachus purinkichis chay tukuy hallp'akunan qankunaq kanqa. Chaymi hallp'aykichis kanqa uray lado ch'inneqmanta wichay lado Líbano orqokunakama, inti lloqsimuy lado Eufrates mayumantataq inti haykuy lado lamar-qochakama.

²⁵Manan pipas tupapakusunkichischu. Diosniykichis Señor Diosmi prometesqanman hina maypiña purinkichis chaypas chaypi tiyaq runakunata qankunawan manchachinqa llaksachinqa.

²⁶Qhawariychis, kunanmi rikuchiykichis saminchayta ñakaytawan, mayqentapas akllakunaykichispaq.

²⁷Señor Diospa siminkunata kunan kamachishaykichis chaykunata kasukunkichis chayqa, Señor Diosmi saminchasunkichis.

²⁸Manataqchus kay nisqay simikunata kasukunkichis, aswanpas waqllipunkichis mana reqsisqaykichis wak dioskunata yupaychaspa chayqa, ñakasunkichismi.

²⁹Hap'ikapunaykichis hallp'aman Diosniykichis Señor Dios pusaykusuqtiykichisqa, Gerizim orqomanta saminchayta rimamunkichis, Ebal orqomantataq ñakayta rimamunkichis.

³⁰Chay orqokunaqa Jordán mayu chimpapin kashan, Jordán wayq'opi tiyaq Canaán runakunaq hallp'anpi. Ñanpa inti haykuy ladonpin kashan, Morepi encina sach'a-sach'a qaylla Gilgal llaqta qhawaypi.

³¹Jordán mayu chimpanaykichis patapiñan kashankichis, Diosniykichis Señor Diospa qonasuykichis hallp'ata hap'ikapunaykichispaq. Hap'ikapuspaykichis chaypi tiyaspataq,

³²kunan kamachisqay unanchaykunatapas kamachikuykunatapas makilla hunt'aychis.