Read DIOSPA QHELQACHISQ Quechua DEUTERONOMIO 17 Bible Online

DEUTERONOMIO 17 - DIOSPA QHELQACHISQ Quechua bible

DEUTERONOMIO 17

¹Wakatapas ovejatapas mana allintaqa aman Diosniykichis Señor Diosman sacrificiopi haywankichischu, payqa chay hina haywasqataqa cheqnikunmi.

²Diosniykichis Señor Diospa qonasuykichis suyupi mayqen llaqtapipas warmipas qharipas Señor Diospa rimanakuyninta p'akispa mana munasqanta ruwashan nisqata uyarinkichis chayqa,

³chay runataq Señor Diospa hark'asqanta ruwaspa, wak dioskunatapas, intitapas, killatapas, qoyllurtapas, ch'askatapas yupaychanqa chayqa,

⁴allintapunin tapupakunkichis. Cheqaqtapunitaq Israel suyupi chay mana chanin ruwasqata tarinkichis chayqa,

⁵chay ruwaqtaqa warmiña qhariña kaqtinpas llaqta punku qhepaman horqospaykichismi ch'aqespa wañuchinkichis.

⁶Chaywanpas chay runataqa wañuchinkichis iskaypas kinsapas testigokuna rimariqtinmi, huk testigolla kaqtinqa aman wañuchinkichischu.

⁷Chay huchachasqa runataqa testigokunan ñawpaqta ch'aqenqa, chaymantañan llaqta runakunaqa ch'aqellanqataq. Chay hinapin chay mana allinta qankuna ukhumanta ch'usaqyachinkichis.

⁸Llaqtaykichiskunapi wañuchiymantapas, hallp'a qechunakuymantapas, k'irinakuymantapas, hukkunamantapas sinchi sasa chaninchanaykichispaq kaqtinqa, Diosniykichis Señor Dios akllakunqa chay cheqasta rinkichis.

⁹Chayaspaykichistaq Leví runa sacerdotekunata, tupaqninpi llank'ashaq jueztawan tapunkichis. Paykunataq chayta chaninchanqaku.

¹⁰Qankunataq chayta ruwankichis nisqasuykichista mana p'akispa.

¹¹Chay hinaqa, nisqasuykichisman hinan ruwankichis, chay kikin chaninchasqantan hunt'ankichis, ama pañamanpas lloq'emanpas t'aqarikuspa.

¹²Señor Diospa ñawpaqenpi chaninchaq sacerdotetapas jueztapas mana kasuspa anchaykachaq runatan ichaqa wañuchinkichis, chay hinapin Israel runakuna ukhumanta chay mana allinta ch'usaqyachinkichis.

¹³Chaymi runakunaqa chayta uyarispanku manchakunqaku, manataq anchaykachaspa ruwanqakuñachu.

¹⁴Diosniykichis Señor Dios qosunkichis chay suyuta hap'ikapuspa, chaypi tiyaspañataq niwaqchis: Reyta churakusun kamachiwananchispaq, imaynan qorpanchis suyukunaqpas reynin kan hinata, nispa chayqa,

¹⁵Diosniykichis Señor Dios akllakunqa chay runatan reyniykichispaq churankichis. Wak llaqtayoqtapas mana llaqta-masiykichistapas aman reyta churankichischu, aswanpas llaqta-masillaykichistapunin reytaqa churankichis.

¹⁶Chay churasqaykichis reyqa aman askha caballokunata huñunqachu, amataq Egiptomanpas runakunata kachanqachu caballokunata askhayachiyta munaspa. Señor Diosqa nirqasunkichismi: Aman hayk'aqpas Egiptoman riq ñanta kutinkichisñachu, nispa.

¹⁷Amataq askha warmiyoqpaschu kanqa, mana chayqa sonqontan waqllichinman. Amallataq qoritapas qolqetapas sinchi askhataqa huñukunqachu.

¹⁸Hinallataq chay reyqa kamachikuyta qallarishaspa, Leví runa sacerdotekunaq waqaychasqan kashaq kamachikuy simi qelqamanta payqa qelqachikunqa, chay simikunata kikin rey leekunanpaq.

¹⁹Chay qelqachikusqan qelqataqa manan saqenqachu, aswanpas tukuy kawsasqan p'unchaymi leeshallanqa, chaymi Diosniykichis Señor Diosta manchakuyta yachanqa, tukuy kamachikusqan simikunatapas makillataq kasukunqa.

²⁰Manataq llaqtamasinkuna ukhupipas anchaykachanqachu, manallataq kay kamachikuy simikunamanta pañamanpas lloq'emanpas t'aqarikunqachu. Chaymi Israel suyupi paypas mirayninkunapas unayta kamachinqaku.