Read DIOSPA QHELQACHISQ Quechua DEUTERONOMIO 18 Bible Online

DEUTERONOMIO 18 - DIOSPA QHELQACHISQ Quechua bible

DEUTERONOMIO 18

¹Llapan Leví aylluntin sacerdotekunaqa, manan wakin Israel runakuna hinachu hallp'ata chaskinqaku, aswanpas Señor Diosman haywankichis chay sacrificiokunawanmi ofrendakunawanmi kawsanqaku.

²Manan llaqtamasinku hinachu hallp'ata chaskinqaku, Señor Diosmi paykunaq herencianqa, Señor Diospa nisqanman hina.

³Qankuna torotapas borregotapas sacrificiota haywaspaqa, sacerdotekunamanmi qonkichis qharminta, qhaqllinta, qheqentawan.

⁴Hinallataq trigomanta vinomanta aceitemantawan ñawinninta, ovejaykichis ñawpaq rutusqaykichis millmatawan qonkichis.

⁵Diosniykichis Señor Diosmi llapa aylluykichismanta Leví aylluta akllakurqan paypas mirayninpas Señor Diospa sacerdoten kaspa tukuy tiempo servishanallankupaq.

⁶Israel suyupi mayqen llaqtamantapas, mayqen Leví runapas, Diosniykichis Señor Diospa akllakusqan cheqasman riyta munanqa chayqa, rillanqan.

⁷Chayaspataq Señor Diospa sutinpi servinqa, imaynan wakin Leví llaqtamasin Señor Diosta servishanku hinata.

⁸Chaymi paypas wakin Leví llaqtamasinkuna hina may chhikatachus mikhunata chaskinqaku, chay chhikallatataq chaskinqa. Familianmanta herencia chaskisqanqa sapaqmi kanqa.

⁹Diosniykichis Señor Dios qosunkichis chay hallp'aman haykuspaykichisqa, aman chay llaqta runakunaq millay mana chanin ruwaynintaqa ruwankichischu.

¹⁰Aman qankuna ukhupiqa mayqenpas churiykichista ususiykichista ruphachina sacrificiota hina haywankichischu. Amallataq watuqpas, suerte qhawaqpas, ch'askata qhawaqpas, layqapas,

¹¹mana allin espiritukunata rimachiqpas, wañuqpa alman rimachiqpas qankuna ukhupiqa kanqachu.

¹²Chay hina ruwaqkunataqa sinchitan Señor Diosqa cheqnikun, chay hawan chay suyu runakunatapas qayllaykichismanta wikch'unqa.

¹³Tukuypipas chanintapunin Diospa ñawpaqenpi kawsankichis.

¹⁴Hap'ikapunkichis chay suyu runakunaqa layqakunatan watuqkunatan kasunku, qankunataqa Diosniykichis Señor Diosmi chay hina ruwanaykichista hark'asunkichis.

¹⁵Diosniykichis Señor Diosmi qankuna ukhumanta ñoqa hina huk profetata sayarichinqa, qankunataq payta kasunkichis.

¹⁶Chaytapunin qankunaqa Horeb orqo k'uchupi huñuykusqa kashaspa mañakurqankichis: Diosninchis Señor Diospa kunkantaqa manan huktawan uyarisunmanchu, manataq kay hatun nina rawraytapas rikusunmanchu, mana chayqa wañusunmi, nispa.

¹⁷Chaymi Señor Diosqa niwarqan: Allinmi rimasqanku.

¹⁸Ñoqan llaqta-masiykikuna ukhumanta qan hina huk profetata sayarichisaq. Ñoqan payta rimaykusaq, paytaq runakunaman tukuy kamachisqay simikunata willanqa.

¹⁹Kamachisqay simiykunata chay profeta rimaykushaqtin, pipas mana kasuqtaqa ñoqa kikiymi huchachasaq.

²⁰Ichaqa huk profeta sutiypi rimanqa mana ñoqa kamachishaqtiy chayqa, wañuchinkichismi, hinallataq wak dioskunaq sutinpi rimaq profetakunatapas wañuchinkichis, nispa.

²¹Ichapaschá yuyaykuwaqchis: ¿Imaynapitaq yachaykuman mana Señor Diospa siminkunatachu rimasqantari? nispa.

²²Huk profeta: Señor Diospa simintan rimashani, ninqa, manataq rimasqan hunt'akunqachu chayqa, manan Señor Diospa siminchu, aswanpas chay profetaqa hatunchakuyta munaspan yuyaykusqallanta riman. Amataq payta manchakuychischu.