Read DIOSPA QHELQACHISQ Quechua DEUTERONOMIO 19 Bible Online

DEUTERONOMIO 19 - DIOSPA QHELQACHISQ Quechua bible

DEUTERONOMIO 19

¹Diosniykichis Señor Dios qonasuykichis suyupi tiyaq runakunata wañuchiqtinmi, qankuna llaqtankuta hap'ikapuspa wasinkupi tiyankichis.

²Señor Diosniykichis hap'ikapunaykichispaq qonasuykichis suyupin kinsa llaqtata t'aqankichis,

³chay llaqtakunaman riq ñankunatan allichankichis. Hinaspan chay suyuta kinsaman t'aqankichis, runa wañuchiq chay llaqtakunaman ayqespa pakakunanpaq.

⁴Pi runapas runamasinta wañuchinman mana yuyaypichu, manataq awqantin kaspapaschu chayqa, pakakuna llaqtamanmi ayqekunqa mana wañuchisqa kananpaq.

⁵Kay hina kaqtin: Mayqenpas huk runamasinpiwan sach'a-sach'ata llant'a ch'eqtaq rinkuman, hinataq sach'ata wit'ushaqtin k'aspinmanta hacha qonqay phawarqospa llank'aqmasinta sinchita k'irirqospa wañurqochinman chayqa, chay runan huknin pakakuna llaqtaman ayqeyta atin qespikunanpaq.

⁶Mana chayqa, wañuqpa vengakuq ayllunmi sinchi phiñasqa qatipaspa tariparqonman, ñan karu kasqanrayku, hinaspa wañurqochinman mana wañuypaq huchachasqa kashaqtin, chay runaqa manan awqantin kaspachu wañuchirqan.

⁷Chayrayku, kamachiykichis kinsa llaqtakunata t'aqanaykichispaq.

⁸Diosniykichis Señor Diosmi ñawpa taytaykichisman suyuta qonanpaq prometerqan, chay suyuta hatunyachispa llapanta qosuqtiykichis,

⁹kamachikusqan simikunata mana qonqaspa kasukunkichis, Señor Diosniykichista munakunkichis, munaynintapas ruwankichis chayqa, kinsa pakakuna llaqtatawanraqmi yapankichis.

¹⁰Ahinapin Diosniykichis Señor Dios qosunkichis chay suyupiqa mana huchayoq runata mana wañuchinkichischu, manataq qankunaqa wañuchisqamanta huchachasqapaschu kankichis.

¹¹Pipas runamasinta cheqnikuspa qhamiyanman, hinaspataq hap'ispa payta wañurqochinman, chaymantataq hukkaqnin pakakuna llaqtaman ayqenman chayqa,

¹²llaqtanpi kurak runakuna kachanqa pakakusqanmanta aysamunankupaq. Hinaspan kurak runakunaqa wañuqpa vengakuq ayllunman runa wañuchiqta hap'ichinqaku wañuchinanpaq.

¹³Aman chay runataqa khuyapayankichischu, chay hinapin Israelpi mana huchayoq runa wañuchiqta ch'usaqyachinkichis. Hinan allillan kankichis.

¹⁴Diosniykichis Señor Dios qosunkichis chay suyupi hallp'aykichis qorpataqa aman llaqta-masiykichispa hallp'anman ithiykuchinkichischu, chay qorpataqa ñawpa taytaykichismi churarqan.

¹⁵Ima huchaña kaqtinpas, ch'ulla testigo rimariqtinqa manan pitapas huchachayta atiwaqchischu, aswanpas iskaypas kinsapas testigokuna rimarillaqtinmi huchachayta atiwaqchis.

¹⁶Huk millay llulla testigo piqpa contranpipas sayarispa ima huchamantapas ch'atanman chayqa,

¹⁷iskaynin churanakuqkunan Señor Diosman qayllaykunqaku, hinallataq tupaqninman hina chay kuti llank'ashaq sacerdotekunamanpas juezkunamanpas qayllaykunqaku,

¹⁸juezkunataq allinta tapupakunqaku. Testigoq llaqtamasin contra ch'atasqan llulla kaqtintaq,

¹⁹payta huchachankichis imaynatachus llaqtamasinta ruwayta munarqan chay hinata. Ahinapin qankuna ukhumanta chay mana allinta ch'usaqyachinkichis.

²⁰Chayta uyarispataq llapa runakuna manchakunqaku, manañataq chay millay mana chaninta ruwanqakuñachu.

²¹Aman chay hina ruwaqta khuyapayankichischu, aswanpas imaynatachus ruwanqa chay hinallatataqmi muchuchinkichis, kawsaymanta kawsayta, ñawimanta ñawita, kirumanta kiruta, makimanta makita, chakimantapas chakita.