Read DIOSPA QHELQACHISQ Quechua DEUTERONOMIO 2 Bible Online

DEUTERONOMIO 2 - DIOSPA QHELQACHISQ Quechua bible

DEUTERONOMIO 2

¹Chaymantataq kutiripurqanchis ch'inneqman Puka Qochaman purina ñanninta Señor Diospa kamachiwasqanchisman hina, chaymantataq Seir orqo-orqopi unayta muyurirqanchis.

²Hinaqtinmi Señor Diosqa niwarqan:

³Unayñan kay orqo-orqopi muyurinkichis, wichayman riychis.

⁴Runakunatataq kamachinki: Qankunaqa Esaupa mirayninkunaq hallp'an ukhuntan purinkichis, paykunaqa Seirpin tiyanku, aylluykichistaqmi kankupas. Paykunaqa manchakusunkichismi, chay hinaqa, anchata cuidakuychis

⁵ama maqanakunaykichispaq. Manan ñoqaqa qosqaykichischu hallp'ankupiqa huk chaki saruyllatapas, Esauman hap'ikapunanpaq Seir orqo-orqota qosqayrayku.

⁶Mikhunatapas unutapas qolqewan paykunamanta rantikuspaykichismi mikhunkichispas ukyankichispas, nispa.

⁷Yuyariychis Diosninchis Señor Dios tukuy ruwayniykichiskunapi saminchasqasuykichista, kay tawa chunka watantinmi ch'inneqpi qankunawan kasharqan, kay hatun ch'inneqpi purisqaykichispin waqaycharqasunkichis, manataq imamantapas pisichirqasunkichischu.

⁸Chaymantataq Elatmantawan Ezión-gebermantawan Kachi Qochaman riq ñanmanta pulqarispa Esaupa miraynin ayllunchiskunaq Seir hallp'anta muyurirqanchis, hinaspan Moabman riq ch'inneq ñanninta rirqanchis.

⁹Hinan Señor Diosqa niwarqan: Lotpa miraynin Moab runakunataqa aman awqaykita hinachu qhawanki, amataq paykunawan maqanakunkichu, manan hallp'ankutaqa huk chhikallantapas qosqaykichischu, Ar hallp'ata paykunaman hap'inankupaq qosqayrayku, nispa.

¹⁰(Chay suyupiqa ñawpa tiempopi Em runakunan tiyasqaku, paykunaqa askhataq atiyniyoqtaq kasqakupas, Anac qharikuna hina hatuchachaq.

¹¹Runakunaqa yuyasqaku Refaim runapuni paykunaqa kasqanta Anac qharikunata hina, Moab runakunataq ichaqa Em runa nispa sutichasqaku.

¹²Ñawpa tiempoqa Seir hap'iypi Hor runakunan tiyasqa, Esaupa mirayninkunataq ichaqa paykunata hallp'ankumanta ch'usaqyachisqa, hinaspa chayta hap'isqaku. Chaypitaq tiyasqaku imaynan Israel runakuna Señor Diospa qosqan hallp'ata ruwarqanku hinata).

¹³Señor Diosmi nillarqantaq: — Puririychis, Zered mayuta chimpaychis, nispa. Hinan Zered mayuta chimparqanchis.

¹⁴Cades-barneamanta puririmusqanchis p'unchaymanta Zered mayuta chimpasqanchiskamaqa kinsa chunka pusaqniyoq watan karqan. Awqa-tinkuq qharikunaqa llapankuñan chaypaqqa wañupurqanku Señor Diospa jurasqanman hina.

¹⁵Señor Diosqa atiyninwanmi contrankupi sayarillarqanpuni llapanku wañunankukama.

¹⁶Awqa-tinkuq qharikuna llaqtapi llapanku wañupuqtinñan,

¹⁷Señor Diosqa niwarqan:

¹⁸Kunanpacha Ar hallp'anta rispa Moab qorpata pasankichis,

¹⁹ichaqa Lotpa miraynin Amón runakunaq hallp'anman qayllaspaykichisqa, aman paykunata imanankichispaschu, amallataq paykunawan maqanakunkichispaschu. Manan hallp'ankutaqa huk chhikallantapas qosqaykichischu, paykunaman hap'ikapunankupaq qosqayrayku, nispa.

²⁰(Chay suyutapas Refaim runakunaq hallp'an nispa sutichasqaku, ñawpa tiempopi Refaim runakuna chaypi tiyasqan hawa, paykunatan Amón runakunaqa Zamzum runa nispa sutichasqaku.

²¹Refaim runakunaqa askhataq atiyniyoqtaq kasqaku, Anac qharikuna hina hatuchachaq, ichaqa Señor Diosmi Amón runakunaq ñawpaqenpi ch'usaqyachisqa, chaymi Amón runakunaqa chay suyuta hap'ikapusqaku, hinaspan chaypi tiyasqaku.

²²Kaqllatataqmi Señor Diosqa Seirpi tiyaq Esaupa mirayninkunapaqpas ruwasqa, paykunan Hor runakunata ch'usaqyachisqaku hinaspa hallp'ankupi tiyasqaku.

²³Hinallataqmi Gaza qaylla ayllukunapi tiyaq Avim runakunata Filistea runakuna ch'usaqyachisqa, Filistea runakunaqa Cretamantan hamusqaku hinaspa chaypi tiyasqaku).

²⁴Señor Diosmi nirqan: — Puririychis, hinaspa Arnón mayuta chimpaychis. Ñoqan hap'ichisqaykichis Hesbón llaqta rey Amor runa Sehonta suyuntawan. Hallp'anman haykuspa paykunawan maqanakuychis.

²⁵Kunanmantaqa llapan kay pacha llaqtakunatan ñawpaqeykichispi manchachisaq khatatatachisaq. Chaymi qankunamanta rimaqta uyarispanku paykunaqa llakikunqaku khatatatanqaku ima, nispa.

²⁶Cademot ch'inneqmantan Hesbón llaqta rey Sehonman willaqkunata kacharqani sumaqta rimaykunankupaq:

²⁷Hallp'aykita pasarichiwayku. Mana pañamanpas, lloq'emanpas kutirispa cheqan ñanllatan pasarqosaqku.

²⁸Mikhunatapas unutapas qolqewanmi rantikusqaykiku mikhunaykupaq ukyanaykupaq. Ñannillantapuni pasarqochiwanaykikutan munani,

²⁹Jordán mayuta chimpaspayku Señor Diosniykuq qowananku suyuman chayanaykukama. Seirpi tiyaq Esaupa mirayninkunapas Arpi tiyaq Moab runakunapas hallp'anku ukhuntan pasachimuwarqanku, nispa.

³⁰Hesbón llaqta rey Sehontaq ichaqa mana munarqanchu hallp'ankuta pasananchista, Diosninchis Señor Diosmi sonqonta rumiyaykachirqan ahinapi ñoqanchisman hap'ichinawanchispaq, chaymi kunan hallp'anta hap'ikapunchis.

³¹Hinan Señor Diosqa niwarqan: Qhawariy, kunanmi qoyki Sehonta llapan hallp'antawan, kunanpacha haykuy hallp'anta hap'ikapunaykichispaq, nispa.

³²Sehontaq llapan ejercitonpiwan Jahazapi ñoqanchiswan awqa-tinkuq lloqsimurqan.

³³Diosninchis Señor Diostaq ichaqa makinchisman hap'ichiwarqanchis, hinan payta, wawankunata, llapan ejercitontapas atiparqanchis.

³⁴Llapan llaqtakunatan munaychakurqanchis, hinaspa llapanta thunirqanchis, hinallataq warmikunata, qharikunata, wawakunata ima wañuchirqanchis, manan hukllapas qheparqanchu.

³⁵Atipasqanchis llaqtakunamantaqa ñoqanchispaq hap'ikurqanchis uywakunata, wasi kawsaykunallatawanmi.

³⁶Arnón mayu qayllapi kashaq Aroer llaqtamanta, hinallataq chay wayq'opi kashaq hukkaq llaqtamantawan Galaadkama, manan huk llaqtapas karqanchu sinchi sasa atipananchispaqqa, Diosninchis Señor Diosmi tukuy chaykunata hap'ichiwarqanchis.

³⁷Kay llaqtakunallamanmi maqanakuq mana rirqanchischu: Amón runakunaq hallp'anman, Jaboc mayu hap'iyman, orqo-orqopi llaqtakunaman, hinallataq Señor Diospa llapan hark'awasqanchis llaqtakunamanpas.