Read DIOSPA QHELQACHISQ Quechua DEUTERONOMIO 23 Bible Online

DEUTERONOMIO 23 - DIOSPA QHELQACHISQ Quechua bible

DEUTERONOMIO 23

¹Kapasqapas qhari-kaynin wit'usqapas kaq qhariqa manan Señor Diospa llaqtanman chaskisqachu kanqa.

²Q'aqa churiqa manan Señor Diospa llaqtanman chaskisqachu kanqa, manapunin chunka miraykamapas.

³Amón runakunapas Moab runakunapas manapunin hayk'aqpas Señor Diospa llaqtanman chaskisqachu kanqa, manapunin chunka miraykamapas.

⁴Paykunaqa manan t'antatapas unutapas qorqasunkichischu Egipto suyumanta lloqsimushaspa hallp'ankuta purishaqtiykichis, aswanmi Mesopotamiapi Petormanta Beorpa churin Balaamta contraykichispi mink'akuspa pusamurqanku ñakachinasuykichispaq.

⁵Diosniykichis Señor Diosmi ichaqa Balaamta mana uyarirqanchu, aswanmi ñakasqasuykichista saminchaman tukuchirqan, pay munakusqasuykichisrayku.

⁶Aman hayk'aqpas paykunata yanapankichischu, amapunin hayk'aqpas allin kanankutaqa munankichischu.

⁷Edom runakunataqa aman cheqnikunkichischu, paykunaqa aylluykichismi, amallataq Egipto runakunatapas cheqnikunkichischu, paykunaq suyunpi wak llaqtayoq hina tiyamusqaykichisrayku.

⁸Paykunaq nietonpa wawanqa Señor Diospa llaqtanman chaskisqañan kanqa.

⁹Awqaykichis contra maqanakuq lloqsispaqa, karpa-karpapi tiyaspaykichismi tukuy qhelli kaqmanta t'aqakunkichis.

¹⁰Mayqenniykichispas qankunamanta muhun tuta phawasqan hawa mana limpiochu kanman chayqa, karpa-karpamanta lloqsispa hawapi qhepakunqa.

¹¹Inti manaraq haykushaqtintaq mayllikunqa, hinaspa inti chinkaykuyta karpa-karpaman kutispa haykupunqa.

¹²Karpa-karpamanta sapaqpin huk cheqas hisp'anaykichispaq kanqa.

¹³Armaykichiskunawan kuskatan apakunkichis huk t'oqona k'aspita, chaymi hisp'akuq lloqsispaykichis chaywan pampata t'oqonkichis, hinaspataq hatun hisp'ayniykichista chayman p'ampankichis.

¹⁴Diosniykichis Señor Diosmi karpa-karpapi qankuna ukhupi purishan waqaychanasuykichispaq awqaykichiskunatapas atipachinasuykichispaq, chaymi karpa-karpaykichisqa limpio ch'uya kanqa, chaypi qhellikaqkunata Señor Diospa mana rikunanpaq, mana chayqa qankunamantan t'aqarikapunqa.

¹⁵Huk kamachi, uywaqenmanta ayqespa qankunaman hamusunkichis chayqa, aman uywaqenman kutichinkichischu,

¹⁶aswanpas qankunawanmi qhepanqa, mayqen llaqtaykichistachus tiyananpaq akllakunqa chaypin tiyanqa, amataq payta muchuchinkichischu.

¹⁷Israel llaqtayoq warmikunamantaqa aman pipas rabona kanqachu wak'a dios yupaychana wasipi, amallataq qharikunamantapas wak'a dios yupaychana wasipi qharipura t'inkikuqkunapas kanqachu.

¹⁸Diosniykichis Señor Dios yupaychana wasimanqa aman rabonaq ganasqan qolqetapas qharipura t'inkikuqpa ganasqan qolqetapas apankichischu, huk prometekusqaykichista hunt'aspa paganaykichispaqqa. Chay iskaynin ruwaykunataqa Señor Diosniykichismi sinchitapuni cheqnikun.

¹⁹Llaqta-masiykichisman qolqeta mañaspaqa aman interesninta cobrankichischu, amallataq mikhunataña imataña mañaspaykichispas.

²⁰Wak llaqtayoqmantan ichaqa interesninta cobrawaqchis, llaqta-masiykichismantaqa aman cobrankichischu, chay hinapin Diosniykichis Señor Diosqa hap'ikapunaykichis suyuman haykuqtiykichis tukuy llank'asqaykichista saminchanqa.

²¹Diosniykichis Señor Diosman prometekuspaykichisqa usqhayllan hunt'ankichis, mana chayqa Señor Diosmi cuentata mañasunkichis, huchachasqataq rikukunkichis.

²²Mana prometekuspaykichisqa, manan huchachakunkichischu.

²³Makilla hunt'aychis rimasqaykichista, Diosniykichis Señor Diosman prometekusqaykichisqa huk sumaq sonqo ofrenda hinan.

²⁴Runa-masiykichispa uvas chakranman haykuspaykichisqa, mikhuwaqchismi saksanaykichiskama, ichaqa aman imapipas apankichischu.

²⁵Runa-masiykichispa trigo chakranman haykuspaykichisqa, k'aptawaqchismi trigo umata, ichhunawan ichaqa ama ichhunkichischu.