Read DIOSPA QHELQACHISQ Quechua DEUTERONOMIO 27 Bible Online

DEUTERONOMIO 27 - DIOSPA QHELQACHISQ Quechua bible

DEUTERONOMIO 27

¹Moisesmi Israel kurak runakunapiwan llaqtata kamachirqan: — Kunan kamachisqay tukuy kamachikuykunata hunt'aychis.

²Jordán mayuta chimpaspaykichis, Señor Dios qosunkichis chay suyuman haykuspaykichismi saywa rumikunata sayachinkichis, hinaspa chaykunata iskuwan llut'ankichis,

³tukuy yachachisqay kamachikuykunata qelqanaykichispaq. Diosniykichis Señor Dios qosunkichis chay suyuman haykuspaykichis hinan chaytaqa ruwankichis. Chay hallp'aqa lecheq miel misk'iq askha kananmi, ñawpa taytaykichispa Señor Diosninpa prometesqasuykichisman hina.

⁴Jordanta chimpaspan Ebal orqopi saywa rumikunata sayachinkichis kunan kamachisqayman hina, chaykunatataq iskuwan llut'ankichis.

⁵Hinallataq chay orqopi Diosniykichis Señor Diospaq cincelwan mana thupasqa rumikunawan altarta sayarichipunkichis,

⁶chay altarqa manan thupasqa rumikunawan perqasqachu kanqa. Chaymantataq chay altar patapi Diosniykichis Señor Diospaq sacrificiokunata ruphachinkichis,

⁷sumaq kawsay sacrificiokunatapas haywankichis. Hinaspa chaypi Diosniykichis Señor Diospa ñawpaqenpi q'ochukunkichis mikhunkichis.

⁸Chay rumikunapitaq sut'itapuni qelqankichis tukuy yachachisqay kamachikuykunata, nispa.

⁹Chaymantataq Moisesqa Leví ayllu sacerdotekunapiwan llapan Israel runakunata nirqan: — Ch'inyaykuychis, Israel runakuna, uyariwaychis. Kunanmi Diosniykichis Señor Diospa llaqtan kapunkichis.

¹⁰Chayrayku, Diosniykichis Señor Diosta kasunkichis, tukuy kamachikuyninkunatapas chaninchayninkunatapas hunt'ankichis, imaynan kamachishaykichis hinata, nispa.

¹¹Hinan chay p'unchay Moisesqa runakunata kamachirqan:

¹²— Jordán mayuta chimpaspaykichismi Gerizim orqo patapi llaqtata saminchanankupaq sayaykunqaku Simeón ayllu, Leví ayllu, Judá ayllu, Isacar ayllu, José ayllu, Benjamín ayllupiwan.

¹³Ebal orqo patapitaq llaqtata ñakanankupaq sayaykunqaku Rubén ayllu, Gad ayllu, Aser ayllu, Zabulón ayllu, Dan ayllu, Neftalí ayllupiwan.

¹⁴Leví runakunataq llapa Israel runakunata kunkayoqta rimaykunqaku:

¹⁵Diospa ñakasqan kachun k'ullumanta idolotapas, unuyachispa hich'asqa rikch'aytapas ruwakuspa pakallaman churaqqa, Señor Diosqa chay rikch'aykunata cheqnikunmi, nispa. Hinan llapa llaqta ninqaku: Amén, nispa.

¹⁶Leví runakunan ninqaku: Diospa ñakasqan kachun taytantapas mamantapas pisichaqqa, nispa. Hinan llapa llaqta ninqaku: Amén, nispa.

¹⁷Leví runakunan ninqaku: Diospa ñakasqan kachun qorpanpa mojonninta ithiykuchiqqa, nispa. Hinan llapa llaqta ninqaku: Amén, nispa.

¹⁸Leví runakunan ninqaku: Diospa ñakasqan kachun huk ñawsata ñanninta pantachiqqa, nispa. Hinan llapa llaqta ninqaku: Amén, nispa.

¹⁹Leví runakunan ninqaku: Diospa ñakasqan kachun wak llaqtayoqkunapaq, mana tayta-mamayoqkunapaq, viudakunapaqpas chaninchayta waqllichiqqa, nispa. Hinan llapa llaqta ninqaku: Amén, nispa.

²⁰Leví runakunan ninqaku: Diospa ñakasqan kachun taytanta pisichaspa taytanpa warminwan puñukuqqa, nispa. Hinan llapa llaqta ninqaku: Amén, nispa.

²¹Leví runakunan ninqaku: Diospa ñakasqan kachun animalwan t'inkikuqqa, nispa. Hinan llapa llaqta ninqaku: Amén, nispa.

²²Leví runakunan ninqaku: Diospa ñakasqan kachun taytanpa ususinwanpas mamanpa ususinwanpas puñukuqqa, nispa. Hinan llapa llaqta ninqaku: Amén, nispa.

²³Leví runakunan ninqaku: Diospa ñakasqan kachun suegranwan puñukuqqa, nispa. Hinan llapa llaqta ninqaku: Amén, nispa.

²⁴Leví runakunan ninqaku: Diospa ñakasqan kachun runamasinta pakallapi wañuchiqqa, nispa. Hinan llapa llaqta ninqaku: Amén, nispa.

²⁵Leví runakunan ninqaku: Diospa ñakasqan kachun mana huchayoq runata wañuchinapaq lluk'iykuyta chaskikuqqa, nispa. Hinan llapa llaqta ninqaku: Amén, nispa.

²⁶Leví runakunan ninqaku: Diospa ñakasqan kachun chay kamachikuykunata mana kasukuqpas mana hunt'aqpas, nispa. Hinan llapa llaqta ninqaku: Amén, nispa.