Read DIOSPA QHELQACHISQ Quechua DEUTERONOMIO 31 Bible Online

DEUTERONOMIO 31 - DIOSPA QHELQACHISQ Quechua bible

DEUTERONOMIO 31

¹Moisesmi Israel runakunata nirqan:

²— Pachak iskay chunka watayoqñan kani, manan kallpaypas llank'anaypaq kanñachu. Señor Diospas niwarqantaqmi: “Manan Jordán mayuta chimpankichu”, nispa.

³Chaypas Diosninchis Señor Diosmi ñawpaqeykichista chimpanqa, paymi chay suyu runakunata ch'usaqyachinqa, hinan hallp'ankuta hap'ikapunkichis. Josuemi umalliykichis kanqa, Señor Diospa nisqanman hina.

⁴Señor Diosmi chay suyukunata ch'usaqyachinqa imaynan Amor runakunaq reyninku Sehontapas Ogtapas ch'usaqyachirqan hinata, paymi suyunkuta ch'usaqyachirqan.

⁵Señor Diosmi chay suyukunata hap'ichisunkichis, chaymi kamachisqayman hina lliwta paykunata ruwankichis.

⁶Kallpachakuychis, allin qhari kaychis, ama manchakuychischu, amataq paykunata manchapakuychischu. Diosninchis Señor Diosmi qankunawan kashan, manan payqa saqesunkichischu, manataq wikch'urparisunkichispaschu, nispa.

⁷Chaymantataq Moisesqa Josueta waqyarispa, llapa Israel runakunaq qayllanpi nirqan: — Kallpachakuy, allin qhari kay, qanmi kay llaqtata Señor Diospa prometesqan suyuman pusaykunki, paymi ñawpa taytaykichiskunaman jurarqan chay suyuta qonanpaq, qanpa kamachisqaykin Israel runakunaqa chay suyuta hap'inqaku.

⁸Señor Diosmi ñawpaqeykita rinqa, qanwantaq kanqapas. Manan saqerparisunkichu, manataqmi wikch'urparisunkipaschu, chhaynaqa, ama manchakuychu amataq pisi kallpayaychu, nispa.

⁹Moisesmi chay kamachikuy simita qelqarqan, hinaspa Señor Diospa rimanakuynin arcata apaq Leví ayllu sacerdotekunaman, Israel llapa kurak runakunamanwan qorqan.

¹⁰Kamachirqantaq paykunata: — Sapa qanchis wata tukuyta, manukuna pampachay wata chayamuqtin, Ch'uklla Ruway Fiestapi kay qelqata leenkichis.

¹¹Diosniykichis Señor Dios akllakunqa chay cheqaspi llapa Israel runakuna huñukuqtin, paykunaq qayllanpi kay kamachikuy simita leenkichis.

¹²Llapan qharikunata, warmikunata, wawakunata, qankuna ukhupi tiyaq wak llaqtayoqkunata ima huñunkichis, kamachikuy simi leesqata uyarinankupaq. Ahinapin Diosniykichis Señor Dios manchakuyta yachanqaku, tukuy kay kamachikuy simikunatapas makilla hunt'anqaku.

¹³Chaymi chaykunata mana yachaq wawqeykichiskunapas uyarinqaku, hinaspan paykunapas Diosniykichis Señor Diosta manchakullanqakutaq, Jordán mayuta chimpaspa hap'ikapunkichis chay hallp'api tukuy kawsasqanku p'unchaykuna, nispa.

¹⁴Señor Diosmi Moisesta nirqan: — Wañukapunaykin qayllamushanña, chhaynaqa, Josueta waqyamuy, hinaspa Ñoqawan Tupana Karpapi iskayniykichis qayllaykamuwaychis Josueta kamachinaypaq, nispa. Hinan Moisesqa Josuepiwan Karpaman rirqanku.

¹⁵Chaypin Señor Diosqa paykunaman rikhurirqan sayashaq phuyupi, chay phuyun Karpaman haykuna patapi sayarqan.

¹⁶Señor Diostaq Moisesta nirqan: — Yaqañan ñawpa taytaykikuna hina wañukapunki, kay runakunataq qhellichakunqaku, hap'ikapunqaku chay suyu runakunaq diosninkuta yupaychaspa. Ñoqatataq saqerpariwanqaku, paykunawan rimanakusqaytapas p'akinqaku.

¹⁷Chayrayku, paykunapaq anchata phiñakuspa wikch'urparisaq, paykunataqa manañan qhawarisaqchu, hinan ch'usaqyachisqa kanqaku. Chaymi paykunaqa tukuy mana allintapas ñak'ariykunatapas muchuspa ninqaku: ¿Manachu kay mana allinkunata muchushanchis Diosninchis mana ñoqanchiswan kasqan hawa? nispa.

¹⁸Chay p'unchaymi ñoqaqa paykunata manapuni qhawarisaqchu, tukuy mana allin ruwasqankumanta, wak dioskunata yupaychasqankumanta ima.

¹⁹Chhaynaqa, kunan qelqaychis kay takita, hinaspa Israel runakunaman yachachiychis takinankupaq, ahinapin kay taki paykuna contra testigo kanqa.

²⁰Ñoqan paykunata pusaykusaq lecheq miel misk'iq askha kanan hallp'aman, imaynan ñawpa taytankuman juramentowan prometerqani hina. Chaypin tukuy munasqankuta mikhuspanku wirayanqaku, chaymantataq wak dioskunata yupaychanqaku, ñoqatataq pisichawanqaku, rimanakusqaytapas p'akinqaku.

²¹Tukuy mana allinkunatapas ñak'ariykunatapas muchuqtinku, kay taki paykuna contra testigo kanqa, mirayninkun yuyarispa takinqapuni. Kunanmi prometesqay hallp'aman manaraq pusaykushaspa, yachaniña imatachus paykuna yuyaykushanku chayta, nispa.

²²Hinan Moisesqa chay p'unchaypacha kay takita qelqarqan, hinaspataq Israel runakunaman yachachirqan.

²³Nunpa churin Josuetan Señor Diosqa kamachirqan: — Kallpachakuy, allin qhari kay, qanmi kay Israel runakunata prometesqay suyuman pusaykunki, ñoqataq qanwan kashasaq, nispa.

²⁴Moisestaq chay kamachikuy simikunata lliwta qelqayta tukuspa,

²⁵Señor Diospa rimanakuynin arcata apaq Leví runakunata nirqan:

²⁶— Hap'iychis kay kamachikuy simi qelqata, hinaspa Diosniykichis Señor Diospa rimanakuynin arcaman churaychis, chaypi qankuna contra willakuy kananpaq.

²⁷Yachanin ñoqaqa sinchi k'ullu mana kasukuq kasqaykichista, kunan ñoqa kawsashaqtiyraq Señor Diosta mana kasunkichischu chayqa, ¡imaynaraqchá kankichis wañukapuqtiyqa!

²⁸Kayman huñumuychis ayllu kurak runakunata kamachikuqkunatawan, kay simikunata allinta willanaypaq, hinaspa kay pachata hanaq pachatawan waqyasaq paykuna contra testigo kananpaq.

²⁹Yachanin wañukapusqay qhepata sinchi mana chaninta ruwanaykichista, yachachisqay simikunamanta t'aqarikunaykichistapas. Qankunataq hamuq p'unchaykunapi ñak'ariykunata muchunkichis, Señor Diospa mana munasqan kaqkunata ruwaspa payta phiñachisqaykichis hawa, nispa.

³⁰Chaymi Moisesqa llapa huñuykusqa Israel runakunaman kay takita qallariymanta tukukuykama rimarqan: