Read DIOSPA QHELQACHISQ Quechua DEUTERONOMIO 32 Bible Online

DEUTERONOMIO 32 - DIOSPA QHELQACHISQ Quechua bible

DEUTERONOMIO 32

¹— Hanaq pacha, rimasqayta uyariy, kay pacha, simiykunata uyariy.

²Yachachikuyniyqa para hinan chayanqa, simiykunaqa sulla hinan kanqa, q'achupi iphu para hinan kanqa, pastopi unu sut'uy hinan kanqa.

³Señor Diospa sutintan hatunchasaq, ¡Diosninchisqa hatunmi! niychis.

⁴¡Hatun Qaqa hinan Señor Diosqa! Hunt'asqan ruwasqankunaqa, chaninmi ruwasqankunaqa, hunt'aq Diosmi payqa, mana waqlliqmi payqa, chanintaq cheqaqtaqmi payqa.

⁵Qankunaqa waqllinkichismi, manan: Wawáy, ninapaq hinachu kankichis, q'otukuq millay runakunan kankichis.

⁶¿Chaywanchu Señor Diosta kutichinkichis, mana yuyayniyoq asno runakuna? Payqa taytaykichismi, kamaqniykichismi, paymi suyuman tukuchirqasunkichis.

⁷Ñawpa watakunata yuyariychis, ñawpa tiempokunata qhawariychis, taytaykichista tapukuychis willanasuykichispaq, kurak runakunata tapukuychis sut'inchanasuykichispaq.

⁸Ancha Hatun Diosmi llaqtakunaman herenciata qospa, runakunaman tiyanata rakispa, llaqtakunaq qorpanta sut'ita churarqan hayk'achus Israelpa churinkuna kasqanman hina.

⁹Señor Diospa tupaqninqa llaqtanmi, herencianqa Jacobmi.

¹⁰Señor Diosmi llaqtanta tarirqan ch'inneqpi, wayraq waqtasqan ch'aki hallp'api, paykunata p'istuykuspa uywarqan, ñawi rurunta hinan waqaycharqan.

¹¹Imaynan ankaqa q'esanta t'aqpin, chiwchinkunata phalayta yachachinanpaq, raphranta mast'arispa chiwchinkunata chaskinanpaq, wichayman hoqarinanpaq, chay hinatan Señor Diosqa llaqtanta ruwan.

¹²Sapan Señor Diosllan llaqtanta pusarqan, manan wak diosqa yanaparqanchu.

¹³Suyuq alto orqonkunantan pusarqan, campo rurukunatan mikhuchirqan, qaqakunapi miel misk'itan mikhuchirqan, rumi-rumipi wiñaq sach'amantan aceiteta qorqan.

¹⁴Wakankumantan lluklluta mikhurqanku, ovejankumantan lecheta ukyarqanku. Allinnin borregokunata, orqo cabrakunata mikhurqanku, Basanmanta wiray-wira anejokunata mikhurqanku, hinallataq granza trigotapas yawar-puka vinotapas ukyarqanku.

¹⁵Jesurunmi ichaqa wirayaspa hatunchakurqan, sinchitan wirayarqan llusk'ay-llusk'ata, Kamaqnin Diostan wikch'upurqan, hatun Qaqantan qespichiqnintan pisicharqan

¹⁶Diostan sinchita phiñachirqanku wak dioskunata yupaychaspanku, millay ruwaykunawan qhellichakuspanku.

¹⁷Supaykunamanmi sacrificiota haywarqanku, manataq Diosmanchu, aswanpas mana reqsisqanku dioskunaman. Chayllaraq rikhuriq mosoq dioskunaman, ñawpa taytankuq mana hayk'aq yupaychasqan dioskunaman haywarqanku.

¹⁸Qankunaqa Hatun Qaqa Taytaykichistan saqepurqankichis, kamaqniykichis Diostan qonqapurqankichis.

¹⁹Chayta rikuspanmi Diosqa sinchita phiñakurqan, chaymi churinkunata ususinkunata pisicharqan,

²⁰nirqantaq: Paykunataqa manan qhawarisaqchu, ¡imallatas ruwanqaku! Millay runakunan kanku, wasanchaq wawakunan kanku.

²¹Mana valeq dioswanmi renegachiwarqanku, idolonkuwanmi phiñachiwarqanku. Chaymi ñoqapas mana valeq llaqtawan paykunata renegachisaq, mana yuyayniyoq llaqtawan phiñachisaq.

²²Nina hinan phiñakuyniy rawrarinqa, rawranqataq Wañuy-pachakamaraq, ruphanqataq kay pachatapas rurunkunatapas, orqokunaq teqsintapas q'olaykunqa.

²³Tukuy mana allinkunawanmi paykunata muchuchisaq, tukuy wach'inaykunatan paykunaman chanqasaq.

²⁴Yarqaymantan wañunqaku, fiebrewan millay onqoywanmi wañunqaku, salqa animalkunatan kachamusaq, venenoyoq mach'aqwaykunatan kachamusaq.

²⁵Callekunapin espadawan wawakuna wañunqaku, wasikunapitaq llaksakuy q'aqchanqa. Waynakunan sipaskunan wañunqa, yuyaqkunan ñuñuq wawakunan wañunqaku.

²⁶Ñoqaqa yuyaykurqani karuman ch'eqechiyta, sutinkuta kay pachapi ch'usaqyachiyta.

²⁷Manataqmi munarqanichu awqankuq asikunanta, manallataq umata hoqarispa: Manan Señor Dioschu chaytaqa ruwarqan, ñoqanchismi atiyninchiswan ruwanchis, nispa ninankutapas.

²⁸Israelqa yuyay chinkasqa llaqtan, manan yuyaynin kanchu.

²⁹Yachayniyoq kaspaqa entiendenkumanmi, qhawarinkumanmi imaynachus tukukuyninku kananta.

³⁰¿Imaynan huk runalla waranqa runata qatirinman? ¿Imaynataq iskay runalla chunka waranqa runata atipanman? Hatun Qaqanmi hap'ichirqan, Señor Diosmi paykunata atipachirqan.

³¹Awqanchiskunaqa allintan yachanku hatun qaqankuqa mana Hatun Qaqanchis hinachu kasqanta.

³²Paykunaqa uvas yura hinan kanku, chay yuraqa Sodoma uvas yura hinan, Gomorra chakramanta apamusqa. Uvasninkuqa venenoyoqmi, rurunkuqa sinchi p'osqon.

³³Vinonkupas mach'aqwaypa venenonmi, picaqpa wañuchiq venenonmi.

³⁴Tukuy kaykunatan pakashani, qhapaq kayta hinan waqaychashani:

³⁵Ñoqan awqakunata vengakuqqa kani, ñoqan chaskinanta pagaqqa kani, urmananku p'unchaymi hamushanña, ch'usaqyananku p'unchaymi qayllamushanña, wañunanku p'unchaymi usqhamushanña.

³⁶Señor Diosmi llaqtanta chaninchanqa manaña kallpan kapusqanta rikuspa. Señor Diosmi serviqninkunata khuyapayanqa manaña pipas kallpayoq qhepasqanta rikuspa.

³⁷Señor Diosmi llaqtanta ninqa: ¿Maytaq diosniykichiskunari? ¿Maytaq pakakunaykichis qaqari?

³⁸¿Maytaq sacrificioykichispa wiranta mikhuqkunari? ¿Maytaq vino hich'ay ofrenda chaskiqkunari? ¡Hatarichunku yanapaqniykichiskuna! ¡Hamuchunku waqaychaqniykichiskuna!

³⁹Qhawariychis, ñoqallan Diosqa kani, ñoqamanta wak dioskunaqa manan kanchu. Ñoqan kawsachini, wañuchinitaq, ñoqan k'irini, hampinitaq. Manan pipas atiyniymanta qespichinmanchu.

⁴⁰Wiñay kawsaq Dios kaspaymi makiyta haywarispa jurani:

⁴¹K'ancharishaq espadayta afilasaq, atiyniywan kuskachasaq, awqaykunata vengakusaq, cheqnikuwaqniykunaman chaskinankuta qosaq.

⁴²Wach'inaykunata yawarchasaq k'irisqakunaq presokunaq yawarninwan, espadaywanmi wañuchisaq umalli awqaykunata, nispa.

⁴³Suyukuna, Señor Diospa llaqtanta hatunchaychis. Paymi vengakunqa kamachinkunaq wañusqanmanta, paymi awqankunaman chaskinankuta qonqa, llaqtantapas hallp'antapas pampachanmi, nispa.

⁴⁴Moisesmi Nunpa churin Josuepiwan llapa Israel runakunaman qayllaykuspa chay takita llapallanta rimarqan.

⁴⁵Moisesqa chay simikunata Israel runakunaman rimayta tukuspan

⁴⁶paykunata nirqan: — Allinta yuyaykuychis tukuy chay yachachisqaykunata, hinaspa wawaykichista kamachiychis tukuy chay kamachikuyta makilla hunt'anankupaq.

⁴⁷Manan yanqa rimayllachu chay simikunaqa, aswanpas kawsay qoqniykichismi. Chayta kasuspaykichismi unayta kawsankichis Jordán mayu chimpapi hap'ikapunkichis chay suyupi, nispa.

⁴⁸Chay kikin p'unchaymi Señor Diosqa Moisesta nirqan:

⁴⁹— Jericó llaqtawan qhawanakuy Moab suyupi Abarim orqo-orqota riy, hinaspa Nebo orqoman wichaspa qhawarinki Israel runakunaman hap'ikapunankupaq qosaq chay Canaán suyuta.

⁵⁰Chay Nebo orqo patapin wañukapunki, hinaspa ñawpa taytaykikunawan huñukapunki, imaynan wawqeyki Aaronpas Hor orqopi wañukapuspa ñawpa taytankunawan huñukapurqan hinata.

⁵¹Zin nisqa ch'inneq Cades llaqta qaylla Meriba unupi iskayniykichis huchallikurqankichis, Israel runakunaq qayllanpin mana ch'uya kasqayman hinachu yupaychawarqankichis.

⁵²Chayraykun karullamanta qhawarinki Israel runakunaman qonay suyuta, manataq chay suyumanqa haykunkichu, nispa.