Read DIOSPA QHELQACHISQ Quechua DEUTERONOMIO 33 Bible Online

DEUTERONOMIO 33 - DIOSPA QHELQACHISQ Quechua bible

DEUTERONOMIO 33

¹Dios sonqo runa Moisesmi manaraq wañukapushaspa Israel runakunata samincharqan:

²— Señor Diosqa Sinaí orqomantan hamurqan, Seirmantapachan k'anchamurqan, Parán orqomantapachan illamurqan, waranqa-waranqa akllasqankunan paywan hamurqan, paña ladonpitaq atiyniyoqkuna hamurqan.

³Señor Diosqa llaqtanta munakunmi, paypaq t'aqasqakunataqa waqaychanmi, paykunaqa ñawpaqenpin k'umuykukunku, kamachikusqankunatataq kasukunku.

⁴Ñoqa Moisesmi kamachikuykunata qorqani, herenciata hina Jacobpa mirayninpaq.

⁵Hinan Señor Diosqa Jesurunpi rey kapurqan, llaqta umallikuna huñukuqtin, Israel ayllukuna huñukuqtin, nispa.

⁶Rubenmantan nirqan: — ¡Kawsachun Rubén! Ama tukukuchunchu, pisillaña wawankuna kaqtinpas, nispa.

⁷Judamantan nirqan: — Señor Diosníy, Judapa waqyakusqanta uyariy, ayllu-masinkunawan huñuykuy, kikinmi atiyninwan tupakun, qantaq awqankuna contra yanapaykuy, nispa.

⁸Levimantan nirqan: — Señor Diosníy, munayniyki tapuna Tumimpas Urimpas qan sonqo runaykipaqmi, paytan Masahpi wateqarqani paytan Meriba unupi probarqani.

⁹Paymi tayta-mamanmanta nirqan: — Manan hayk'aqpas rikurqanichu, nispa. Wawqenkunatan mana reqsirqanchu, kikin wawankunatapas manan reqsirqanchu, simiykikunata kasusqanrayku, rimanakusqaykita hunt'asqanrayku.

¹⁰Paykunan Jacobman chaninchayniykikunata yachachinqa, Israel runakunamanpas kamachikuyniykikunata yachachinqa. Altarniykipin ruphachina sacrificiokunata haywanqa, ñawpaqeykipin inciensota q'apachinqa.

¹¹Señor Diosníy, kallpanta yapaykuy, llank'asqanta munakuywan chaskiykuy, awqankunaq wasanta p'akiy, cheqnikuqninkunapas manaña astawan hatarimunankupaq, nispa.

¹²Benjaminmantan nirqan: — Señor Diosmi payta munakun, chaywan mana ima llakiyoq kawsachun. Paymi p'unchay ch'isiyaq waqaychan, munakuyninwantaq p'istuykun, nispa.

¹³Josemantan nirqan: — Señor Dios hallp'anta saminchachun, allinnin hanaq pacha qarpawan, pachaq ukhunpi kashaq unuwan,

¹⁴intiq poqochisqan sumaq rurukunawan, sapa killa allinnin rurukunawan.

¹⁵Ñawpa orqonkuna allinta ruruchun, wiñay orqo qhatankuna sumaqta llanllachun.

¹⁶Allinnin rurukunawan hallp'an hunt'aykusqa kachun, rawrashaq t'ankarpi Rikhuriq chaykunata saminchachun. Tukuy chay saminchakuna Josepaq kachun, paymi wawqenkunaq qollanan kashan.

¹⁷Phiwi churiqa kallpasapa toro hinan, salqa toro hinan waqrasapa, llapa llaqtakunata waqraspa kay pachaq cantonkamaraq wikch'un. Chhaynan Efrainpa waranqa-waranqa mirayninqa, chhaynan Manasespa waranqa mirayninqa, nispa.

¹⁸Zabulonmanta Isacarmantawanmi nirqan: — Q'ochukuy, Zabulón, purinaykimanta, kusikuy, Isacar, karpaykikunamanta.

¹⁹Paykunan orqonkuman llaqtakunata waqyanqaku, chaypin chanin sacrificiokunata haywanqaku. Lamar-qochapi askha kaqkunawan qhapaqyanqaku, aqo-aqopi pakasqa qhapaq kayta hap'ikapunqaku, nispa.

²⁰Gadmantan nirqan: — ¡Saminchasqa kachun Diosqa! Paymi hallp'anta hatunyachirqan. Gadqa león hinan thallaykuspa suyashan, llawq'aykuntaq makinmanta umanmantawan.

²¹Payqa allinnin hallp'atan akllakurqan, paypaqmi umallipaq t'aqasqa hallp'a hina karqan. Paymi llaqtakunata llallirqan, Señor Diospa kamachisqanta hunt'aspa, Israelwan Señor Diospa chaninchayninta ruwaspa, nispa.

²²Danmantan nirqan: — Danqa leonpa uñanmi, Basanmantapacha saltamun, nispa.

²³Neftalimantan nirqan: — Señor Diosqa Neftalitan anchata qhawarin, hinan askha saminchayninwan hunt'aykun. Paymi qochata, qochaq urantawan hap'ikapunqa, nispa.

²⁴Asermantan nirqan: — Aserqa wawqenkunamanta aswan saminchasqa kachun, wawqenkunaq ancha luylusqan kachun, olivos sach'ankunapas askhata ruruchun.

²⁵Punku wisq'anankunapas fierromanta broncemantawanmi, tukuy kawsasqan p'unchaykunan kallpallantin kanqa, nispa.

²⁶Jesurún, manan pipas Diosniyki hinaqa kanchu. Paymi hanaq pachapi manchana-atiyninpi purishan, yanapaqniykin phuyu patanta hamushan.

²⁷Wiñay kawsaq Diosmi pakakunayki, wiñay atiyninmi p'istuykusunki. Awqaykitan ñawpaqeykimanta wikch'un, kamachirqasunkin: Paykunata wañuchiy, nispa.

²⁸Ahinapin Israelqa mana ima llakiyoq kawsanqa, Jacobqa sapaqpin tiyanqa, trigoqpas vinoqpas askhallaña kasqanpi, manataq hanaq pacha qarpapas pisinqachu.

²⁹Israel, kusisamiyoqmi kanki. ¿Pitaq qanman aypasunkiman? Kikin Señor Diosmi qespichirqasunki, paymi waqaychasunkipas yanapasunkipas, paymi llallinayki espadaqa. Awqaykikunaqa ñawpaqeykipin k'umuykukunqaku, qantaq paykunata sarunchakunki, nispa.