Read DIOSPA QHELQACHISQ Quechua DEUTERONOMIO 34 Bible Online

DEUTERONOMIO 34 - DIOSPA QHELQACHISQ Quechua bible

DEUTERONOMIO 34

¹Moisesqa Moab pampamantan Nebo orqoman wicharqan, Jericowan qhawanakuypi kashaq Pisga orqo pataman. Chaymantapachan Señor Diosqa qhawarichirqan tukuy Galaad hap'iyta Dan suyukama,

²Neftalipa, Efrainpa, Manasespa hallp'ankunatawan, Judapa llapan hallp'anta inti haykuy lamar-qochakama,

³hinallataq Neguevta palmera sach'akunayoq Jericó llaqtamanta Zoar llaqtakama, (Jordán qheswa wayq'otapas).

⁴Nirqantaq: — Abrahamman, Isaacman, Jacobmanwanmi jurarqani suyuta mirayninkuman qonaypaq, chaymi kay suyu. Munarqanitaqmi rikunaykita, manaña chayman haykunkichu chaypas, nispa.

⁵Hinan chaypi Diospa kamachin Moisesqa Moab hallp'api wañukapurqan, Señor Diospa nisqanman hina.

⁶Chaymi Bet-peorwan qhawanakuy huk wayq'opi Señor Diosqa payta p'ampapurqan, ichaqa manan pipas chay p'ampasqanta hayk'aqpas rikunchu.

⁷Moisesqa pachak iskay chunka watayoq kashaspanmi wañukapurqan, qhalin karqan, ñawinpas allintaraqmi rikurqan.

⁸Israel runakunan Moab pampapi Moisesmanta waqarqanku kinsa chunka p'unchayta, chay hinapin wañusqanmanta waqayta hunt'arqanku.

⁹Nunpa churin Josueqa allin yachayniyoqmi karqan, payta Moisesqa umallita churasqanrayku. Israel runakunataq Josueta kasurqanku, Moiseswan Señor Diospa kamachisqantataq hunt'arqanku.

¹⁰Manañan hayk'aqpas Israelpi huk profeta Moisés hina karqanñachu, manan pay hina Señor Dioswan uya-uya pura rimaqqa karqanñachu.

¹¹Manan mayqen profetapas pay hina tukuy señalkunata milagrokunatapas ruwarqanchu, Señor Diosmi Moisesta kamachirqan milagrokunata ruwananpaq Egipto rey Faraón contra, oficialninkuna contra, suyun contra ima.

¹²Manallataq pipas atiyninman ayparqanchu, ancha hatun chanin ruwaykunata llapan Israelpa rikushasqan ruwasqanmanpas.