Read DIOSPA QHELQACHISQ Quechua DEUTERONOMIO 8 Bible Online

DEUTERONOMIO 8 - DIOSPA QHELQACHISQ Quechua bible

DEUTERONOMIO 8

¹Kunanmi Diospa kamachikuy siminta kamachiykichis, chay hinaqa, makilla llapanta hunt'aychis, hinan kawsankichis, askhata mirankichis, hap'ikapunkichistaq ñawpa taytaykichisman Señor Diospa juraspa prometesqan hallp'atapas.

²Yuyariychis ch'inneqpi Diosniykichis Señor Diospa tawa chunka watantin purisqaykichispi pusasqasuykichista, payqa munarqanmi huch'uyyaykukunaykichista, chaymi probarqasunkichis kamachikuyninta hunt'awaqchischus icha manachus chayta yachananpaq.

³Señor Diosqa huch'uyyaykuchirqasunkichismi, yarqaywanpas muchuchirqasunkichismi, chaymantataq maná nisqa mikhunata mikhuchirqasunkichis. Chay mikhunataqa manan taytaykichis reqsirqanchu, manallataq qankunapas reqsirqankichischu. Payqa munarqanmi yachanaykichista “runaqa mana t'antallawanchu kawsasqanta, aswanpas Diospa nisqan simikunawan kawsasqanta”.

⁴Chay tawa chunka watantin ukhupiqa manan p'achaykichispas thantakurqanchu, manallataqmi chakiykichispas punkirqasunkichischu.

⁵Imaynan huk tayta churinta wanachin ahinatan payqa wanachisunkichis, chayrayku reqsikuychis Diosniykichis Señor Diospa wanachisqasuykichista.

⁶Chay hinaqa, paypa kamachikuyninta hunt'aychis, payta kasuspaykichis manchakuspaykichis puriychis.

⁷Diosniykichis Señor Diosmi allin hallp'aman pusaykusunkichis. Chay hallp'aqa mayukunayoqmi pukyukunayoqmi, hinallataq wayq'onkunapipas orqonkunapipas unu phullpushan.

⁸Kashallantaq trigo, cebada, uvas, higos, granada, olivos, miel misk'ipas.

⁹Chay hallp'apiqa manan mikhunaykichismanta llakikunkichisñachu, manallataq imapas pisisunkichisñachu. Qaqankunapas fierroyoqmi, orqonkunapas cobreyoqmi, chaytan horqonkichis.

¹⁰Qankunaqa mikhuykuspaykichismi sonqopas-sonqo kankichis, Señor Diosniykichistataq saminchankichis allin hallp'a qosqasuykichismanta.

¹¹Paqtataq Diosniykichis Señor Diosta qonqawaqchis, hunt'allaychispuni kunan kamachisqay unanchayninta, kamachikuyninta, chaninchaynintapas.

¹²Mikhuykuspa sonqopas-sonqo kaspaykichisqa, sumaq wasikunata sayarichispa tiyaspaykichisqa,

¹³wakaykichispas ovejaykichispas mirariqtinqa, qolqeykichispas qoriykichispas askha kaqtinqa, hinallataq tukuy kaqniykichiskunapas askhayaqtinqa,

¹⁴aman hatunchakunkichischu, paqtan Diosniykichis Señor Diosta qonqawaqchis, paymi kamachi kashaqtiykichis Egipto suyumanta horqomurqasunkichis.

¹⁵Payqa chay hatun manchana ch'inneqnintan pusamurqasunkichis, chay cheqaspiqa askhan picaq mach'aqwaykuna alacrán kurukuna karqan, manataq chhikan unullapas karqanchu. Chaywanpas ch'ila qaqamanta unuta phawachispan ukyachirqasunkichis.

¹⁶Hinallataq maná nisqa mikhunata mikhuchirqasunkichis, chaytan ñawpa taytaykichispas mana reqsirqanchu. Chaykunatan ruwarqan huch'uyyaykukunaykichispaq, probanasuykichispaq, tukuymanta astawanqa allinniykichispaq kananpaq.

¹⁷Paqtan yuyaykuwaqchis: Tukuy kay qhapaq kayninchistaqa ñoqanchispa atiyninchiswanmi tarinchis, nispa.

¹⁸Aswanpas yuyariychis Diosniykichis Señor Diosta, paymi kallpacharqasunkichis qhapaq kaykunata tarinaykichispaq, ahinapin ñawpa taytaykichiswan juraspa rimanakusqanta qankunawan kunan hunt'ashan.

¹⁹Ichaqa Diosniykichis Señor Diosta qonqaspaykichis, wak dioskunata yupaychankichis chayqa, cheqaqtan contraykichispi niykichis wañuchisqapunin kankichis.

²⁰Imaynan Diosniykichis Señor Diosqa purisqaykichispi suyukunata wañuchinqa, ahinatan qankunatapas wañuchisunkichis kamachikusqanta mana kasuqtiykichisqa.