Read DIOSPA QHELQACHISQ Quechua JUAN 14 Bible Online

JUAN 14 - DIOSPA QHELQACHISQ Quechua bible

JUAN 14

¹Jesusmi nirqan: — Ama sonqoykichispi musphaychischu, Diospi iñiychis, ñoqapipas iñillaychistaq.

²Yayaypa wasinpiqa askha wasikunan kashan, mana chay hina kaqtinqa niykichismanñan karqan. Chhaynaqa, risaqmi qankunapaq wasita wakichimuq.

³Rispaymi qankunapaq wasita wakichimusaq, kutimuspataq pusakapusqaykichis, maypichus ñoqa kashani chayllapitaq qankunapas kanaykichispaq.

⁴Maymanchus rishasqaytaqa yachankichismi, chayman riq ñantapas reqsinkichistaqmi, nispa.

⁵Hinan Tomasqa Jesusta nirqan: — Señorníy, manan yachaykuchu maymanchus rishasqaykitaqa, ¿imaynatataq ñantapas reqsiykuman? nispa.

⁶Jesustaq payta nirqan: — Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa.

⁷Ñoqatachus reqsiwankichis chayqa, Yayaytapas reqsillankichistaqmi. Kunanmantapachan paytaqa reqsinkichis, rikunkichistaqmi, nispa.

⁸Chaymi Felipeqa nirqan: — Señorníy, Yayata rikuchiwayku, chaywanqa sonqopas-sonqon kasaqku, nispa.

⁹Jesustaq payta nirqan: — Unayñan qankunawanqa kashani, ¿manaraqchu reqsiwanki Felipe? Ñoqata rikuwaqqa Yayatan rikun. ¿Imaynataq qanri “Yayata rikuchiwayku” ninki?

¹⁰¿Manachu iñinki Yayawan huklla kashasqayta, Yayataq ñoqawan huklla kashasqanta? Qankunaman nisqay simikunataqa manan ñoqa kikillaymantachu rimani, aswanpas ñoqawan huklla kaq Yayan riman, payllataqmi ruwanakunatapas ruwan.

¹¹Iñiwaychis Yayawan huklla kashasqayta, Yayataq ñoqawan huklla kashasqantapas, mana chayqa ruwasqaykunarayku iñiwaychis.

¹²Cheqaqtapunin niykichis: Ñoqaqa Yayamanmi ripushani. Chayrayku, ñoqapi iñiqqa ñoqaq ruwasqaykunatan ruwallanqataq, chaykunamantapas astawanraqmi ruwanqa.

¹³Imatapas sutiypi mañakuqtiykichisqa ruwasaqmi, ñoqa hawa Yaya hatunchasqa kananpaq.

¹⁴Imatapas sutiypi mañakuwaqtiykichisqa ñoqan chayta ruwasaq, nispa.

¹⁵Munakuwaspaykichisqa kamachikuyniykunata hunt'aychis.

¹⁶Ñoqan Yayata rogakusaq, paymi huk kallpachaqta kachamusunkichis, qankunawan wiñaypaq kashananpaq.

¹⁷Payqa Cheqaq-kay Espiritun, paytan kay pacha runakunaqa mana chaskiyta atinkuchu, mana rikuspa mana reqsisqankurayku. Qankunan ichaqa payta reqsinkichis, qankunawan kashasqanrayku, qankunapitaqmi kashanqapas.

¹⁸Manan sapallaykichistachu saqesqaykichis, kutimusaqmi qankunamanqa.

¹⁹Runakunaqa pisi tiempollatañan rikuwanqaku, qankunan ichaqa rikuwankichisraq, kawsasqayraykutaqmi qankunapas kawsankichis.

²⁰Chay p'unchaymi qankunaqa yachankichis Yayawan ñoqa huklla kashasqayta, qankunataq ñoqawan huklla kashasqaykichista, ñoqapas qankunawan huklla kashasqaytawan.

²¹Pichus kamachikuyniykunata yachaspa hunt'aqmi munakuwaqniyqa, munakuwaqniytaqa Yayaypas munakunqan, ñoqapas payta munakuspaymi payman reqsichikusaq, nispa.

²²Chaymi Judasqa (mana Iscariotechu) payta nirqan: — Señorníy, ¿imanaqtintaq ñoqallaykumanqa reqsichikuwankiku manataq wak runakunamanqa? nispa.

²³Hinan Jesusqa payta nirqan: — Pipas munakuwaqniyqa simiytan kasukunqa, Yayaytaq payta munakunqa, paymantaq hamusaqku, hinaspan paywan tiyasaqku.

²⁴Mana munakuwaqniyqa manan simiykunata kasukunchu. Uyarisqaykichis simiqa manan ñoqaqchu, aswanpas kachamuwaqniy Yayaqmi.

²⁵Chaykunataqa nishaykichis qankunawan kashaspaymi,

²⁶ichaqa kallpachaq Santo Espiritutan Yaya sutiypi kachamunqa, paymi tukuy imaymanata yachachisunkichis, yuyarichisunkichistaqmi tukuy imakunatachus qankunaman nisqaytapas.

²⁷Thak-kaytan qoykichis, thak-kayniytan saqeykichis, manan runakunaq qosqanta hinachu chaytaqa qoykichis. Ama sonqoykichispi musphaychischu, amataq manchapakuychispaschu.

²⁸Uyariwarqankichisñan: Risaqmi, hinaspan qankunaman kutimusaq, nispa nisqayta. Munakuwaspaykichisqa q'ochukuwaqchismi “Yayaman risaq” nisqaymantaqa. Yayaqa ñoqamanta aswan kurakmi.

²⁹Kunanmi chayta nishaykichis manaraq chaykuna sucedeshaqtin, chaykuna hunt'akuqtin iñinaykichispaq.

³⁰Manañan anchatachu qankunawan rimasaq. Kay pachapi kamachikuq qollanan hamushan, paypaqa manan ima atiyninpas ñoqapaqqa kanchu.

³¹Aswanqa hinapunin kanan, chaymi kay pacha runakuna yachanqa Yayata munakusqayta, paypa kamachiwasqanta ruwasqaytapas. Sayariychis, haku kaymanta, nispa.