Read DIOSPA QHELQACHISQ Quechua JUAN 15 Bible Online

JUAN 15 - DIOSPA QHELQACHISQ Quechua bible

JUAN 15

¹Jesusmi nirqan: — Ñoqan cheqaq uvas yuraqa kani, Yayaytaq uvas chakra llank'aq.

²Mayqen k'allmapas ñoqapi mana ruruqtaqa wit'unmi, ruruq k'allmatataqmi kuchupan, astawan rurunanpaq.

³Qankunaqa limpioñan kankichis, qankunaman rimaykusqay simikunawan.

⁴Ñoqallawanpuni huklla kashaychis, ñoqapas qankunawan huklla kashasaq. Imaynan k'allmaqa kikillanmanta mana ruruyta atinchu, mana uvas yurapi kashaspaqa, chay hinan qankunapas mana atiwaqchischu manachus ñoqawan huklla kashawaqchis chayqa.

⁵Ñoqan uvas yuraqa kani, qankunataq k'allmaykuna. Ñoqawan huklla kaqqa askhatan rurun. Ñoqamanta t'aqakuspan ichaqa mana ima ruwaytapas atiwaqchischu.

⁶Pipas mana ñoqawan huklla kaqqa wit'usqa k'allma hinan wikch'usqa kanqa, hinaspan ch'akipunqa. Chaykunata huñuspan ninaman wikch'uykunku, chaypin ruphapun.

⁷Ñoqawanchus huklla kashankichis chayqa, simiykunapas sonqoykichispi kashan chayqa, tukuy ima munasqaykichista mañakuychis, hinan qankunaman qosqa kanqa.

⁸Allintapuni kawsasqaykichiswanmi Yayayqa hatunchasqa, chay hinapin yachachisqaykuna kasqaykichista sut'inchankichis.

⁹Imaynan Yayaqa munakuwan, chay hinatan ñoqapas munakuykichis. Chay hinaqa, kamachikuyniykunata hunt'aychis qankunata munakushanallaypaq.

¹⁰Kamachikuyninkunata hunt'ankichis chayqa, munakushallasqaykichispunin, imaynan Yayaypa kamachikuyninkunata hunt'aqtiy payqa munakuwan hinata.

¹¹Chaykunatan niykichis kusikuyniywan kusikunaykichispaq, chhaynapi kusisqallapuni kashanaykichispaq.

¹²Kaytan kamachiykichis: Qankunapura munanakuychis, imaynan ñoqapas munakuykichis hinata.

¹³Pillapas amigonkunarayku wañuspanmi aswan munakuq kasqantaqa rikuchikun. Chaymanta aswan munakuqqa manan kanchu.

¹⁴Qankunachus kamachikuyniykunata hunt'ankichis chayqa, amigoykunan kankichis.

¹⁵Manañan “kamachikuna” nisqaykichischu, kamachiqa manan yachanchu patronninpa ima ruwasqantapas, aswanpas “amigoykuna” nisqaykichismi, Yayaymanta lliw imaymana uyarisqayta qankunaman willasqayrayku.

¹⁶Manan qankunachu ñoqataqa akllakuwarqankichis, aswanpas ñoqan qankunataqa akllakurqaykichis, hinaspan kamachirqaykichis rispa allinta kawsamunaykichispaq, allin kawsasqaykichis ruru hina kashanallanpaq. Chay hinapin Yayamanta sutiypi mañakuqtiykichis pay qosunkichis.

¹⁷Kaytan kamachiykichis: Qankunapura munanakuychis.

¹⁸Kay pacha runakunachus cheqnikusunkichis chayqa, yachaychis qankunamanta ñawpaqtaraq ñoqata cheqnikuwasqankuta.

¹⁹Kay pachamanta kawaqchis chayqa, runakunaqa munakusunkichismanmi kaqninkutaqa, aswanpas ñoqan kay pachamanta akllakurqaykichis, chaymi runakunaqa cheqnikusunkichis manaña kay pachaqchu kasqaykichisrayku.

²⁰Manan kamachiqa patronninmanta kurakchu, nispa qankunaman nisqay simita yuyariychis. Ñoqata qatiykachawarqanku chayqa, qankunatapas qatiykachallasunkichistaqmi, simiyta hunt'arqanku chayqa, qankunaqtapas hunt'allanqakutaqmi.

²¹Lliw chaykunataqa ñoqaraykun ruwasunkichis, kachamuwaqniyta mana reqsisqankurayku.

²²Manachus hamuyman karqan, manachus paykunata rimaykuyman karqan chayqa, manan huchayoqchu kankuman, kunanmi ichaqa huchankumanta mana ima niytapas atinkuchu.

²³Ñoqata cheqnikuwaqqa Yayaytapas cheqnikullantaqmi.

²⁴Mana piqpa ruwasqan ruwaykunata paykuna ukhupi mana ruwaymanchu karqan chayqa, manan huchayoqchu kankuman karqan, kunanmi ichaqa ruwasqaykunata rikushaspapas ñoqatapas Yayaytapas cheqnikuwanku.

²⁵Chayqa sucederqan “Yanqa qasin cheqnikuwarqanku” niq simi kamachikuy qelqankupi hunt'akunanpaqmi.

²⁶Diospa cheqaq-kayninta reqsichiq kallpachaq Espiritutan Yayamanta kachamusqaykichis, paymi Yayamanta hamun, paymi ñoqamanta willakunqa.

²⁷Qankunapas ñoqamanta willakunkichismi, qallariymantapacha ñoqawan kashasqaykichisrayku.