Read DIOSPA QHELQACHISQ Quechua JUAN 16 Bible Online

JUAN 16 - DIOSPA QHELQACHISQ Quechua bible

JUAN 16

¹Chaykunatan niykichis, ñoqapi iñiyniykichis ama chiriyananpaq.

²Sinagogakunamantan qarqomusunkichis, chayamunqan tiempo, chaypachan pipas qankunata wañuchiqqa Diosta servishasqanta yuyanqa.

³Chaykunatan ruwasunkichis Yayatapas ñoqatapas mana reqsiwasqankurayku.

⁴Chaykunatan niykichis, chay tiempo chayamuqtin ñoqaq nisqaykunata yuyarinaykichispaq. Chaytaqa manan qallariymantapachachu nirqaykichis qankunawan kashasqayrayku.

⁵Kunanmi ichaqa kachamuwaqniyman ripushani, manataqmi mayqenniykichispas tapuwankichischu: ¿Maytan rishanki? nispaqa.

⁶Aswanpas, chaykunata qankunaman rimaykusqayraykun sonqoykichispi mayta llakikushankichis.

⁷Ichaqa cheqaqkaqtan niykichis: Ñoqa ripuqtiyqa qankunapaqmi allin kanqa, mana ripuqtiymi ichaqa kallpachaq mana hamusunkichischu, rispaymi ichaqa payta kachamusqaykichis.

⁸Pay hamuspanmi kay pachapi llapallan runakunata reparachinqa huchayoq kasqankuta, pichus chanin kasqanta, Diosqa runakunata juzganantawan.

⁹Paymi huchayoq kasqankuta reparachinqa ñoqapi mana iñisqankurayku.

¹⁰Yayaman ñoqa ripuqtiymi pichus chanin kasqanta reparachinqa. Qankunaqa manañan rikuwankichischu.

¹¹Paymi runakunata juiciomanta reparachinqa kay pachapi kamachikuq qollanaqa huchachasqaña kasqanrayku.

¹²Askharaqmi qankunaman ninay kashan, chaywanpas kunanqa sasa entiendeyraqmi kasunkichisman.

¹³Diospa cheqaq-kayninta reqsichiq Santo Espíritu hamuspanmi ichaqa, tukuy cheqaqkaqta yachachisunkichis. Manan pay kikillanmantachu rimanqa, aswanpas Yayamanta tukuy ima uyarisqantan rimanqa, hinaspan qhepaman imachus kanankunata willasunkichis.

¹⁴Paymi hatunchawanqa, hinaspan ñoqaq nisqayta uyarispa qankunaman willasunkichis.

¹⁵Tukuy imapas Yayaq kaqninqa ñoqaqmi, chaymi nirqaykichis: Ñoqaq nisqayta uyarispan qankunaman willasunkichis, nispa.

¹⁶Huk-ratomanqa manañan rikuwankichischu, chaymanta qhepamanmi ichaqa rikuwankichisraq, nispa.

¹⁷Chaymi wakin yachachisqankunaqa paykunapura ninakurqanku: — ¿Ima ninantataq nin: Huk-ratomanqa manañan rikuwankichischu, chaymanta qhepamanmi ichaqa rikuwankichis, nispaqa? ¿Ima ninantataq nillantaq: Yayaman rishasqayrayku, nispapas?

¹⁸¿Imataq kay “Huk-ratomanqa” nisqanri? Manan entiendenchischu imatachá rimakunpas, nispanku.

¹⁹Jesusmi repararqan payta tapuykuyta munasqankuta, chaymi nirqan: — ¿“Huk-ratomanqa manañan rikuwankichischu, chaymanta qhepamanmi ichaqa rikuwankichis”, nispa nisqaymantachu tapunakushankichis?

²⁰Cheqaqtapunin niykichis, qankunaqa waqankichismi, llakikunkichismi, kay pacha runakunataq kusikunqaku. Llakisqan kankichis, ichaqa chay llakikuyniykichismi kusikuyman tukupunqa.

²¹Onqoq warmiqa wachakunan hora chayamuqtinmi nanayta muchun, wawata onqokuspañan ichaqa nanayninta mana yuyarinñachu, kay pachapi wawa paqarisqanmanta q'ochukusqanrayku.

²²Chay hinallataqmi qankunapas kunan nanayta muchushankichis, qankunata rikuq kutimuqtiymi ichaqa, sonqoykichispi anchata kusikunkichis, manataqmi pipas chay kusikuyniykichistaqa qechusunkichischu.

²³Chay p'unchaypiqa manan imatapas tapuwankichischu. Cheqaqtapunin niykichis, imatapas Yayamanta sutiypi mañakuqtiykichisqa, paymi qosunkichis.

²⁴Manan imatapas sutiypi kunankama mañakunkichisraqchu. Mañakuychis, chaskinkichismi, anchatapuni kusikunaykichispaq.

²⁵Chaykunatan rikch'anachiy simikunapi nirqaykichis, ichaqa tiempon chayamushan manaña rikch'anachiy simikunapi qankunaman ninaypaq, aswanpas sut'itapunin Yayamanta willasqaykichis.

²⁶Chay p'unchaypin qankuna sutiypi mañakunkichis, manañan ñoqachu Yayamanta mañapusqaykichis.

²⁷Kikin Yayan munakusunkichis qankuna munakuwasqaykichisrayku, Diosmanta hamusqayta creesqaykichisrayku ima.

²⁸Yayamantan lloqsimurqani, hinaspan kay pachaman hamurqani, kunantaq kay pachata saqespa Yayaman ripushani, nispa.

²⁹Yachachisqankunataq payta nirqanku: — Kunanqa sut'itapunin rimashanki, manañan rikch'anachiy simipiñachu.

³⁰Kunanqa entiendeykun lliw imaymana yachasqaykita, manañan pipas imatapas tapusunkimanñachu, chaymi creeyku Diosmanta lloqsimusqaykita, nispa.

³¹Jesustaq paykunata nirqan: — ¿Kunanqa creenkichischu?

³²Ñan hora chayarqamunña sapankaykichis tukuyneqman ch'eqechisqa kanaykichispaq, sapallayta saqewanaykichispaq. Ichaqa manan sapallaychu kashani, Yayaqa ñoqawanmi kashan.

³³Chaykunatan niykichis ñoqawan huklla kaspa thak-kayniyoq kanaykichispaq. Kay pachapiqa muchunkichismi, ichaqa kallpachakuychis, ñoqan kay pachapi mana allin kaqkunata atipaniña, nispa.