Read DIOSPA QHELQACHISQ Quechua JUAN 19 Bible Online

JUAN 19 - DIOSPA QHELQACHISQ Quechua bible

JUAN 19

¹Hinan Pilatoqa Jesusta hap'ichispa suq'achirqan.

²Soldadokunataq khiska coronata simp'aspa umanman churarqanku, hinaspan sani-puka p'achawan p'achaykachirqanku.

³Chaymantataq nirqanku: — ¡Kawsachun judío runakunaq reynin! nispa, uyanpi ch'aqlarqanku.

⁴Pilatotaq wakmanta hawaman lloqsispa runakunata nirqan: — Qhawariychis, qankunamanmi Jesusta horqomuni, mana ima huchachaytapas paypi tarisqayta yachanaykichispaq, nispa.

⁵Jesustaq khiska coronayoq, sani-puka p'achayoq lloqsimurqan. Hinan Pilatoqa nirqan: — ¡Kayqa kay runa! nispa.

⁶Sacerdote umallikunataq Dios yupaychana wasi guardiakunapiwan Jesusta rikuspa qaparirqanku: — ¡Chakatay, chakatay! nispa. Chaymi Pilatoqa paykunata nirqan: — Qankuna apaychis, hinaspa chakatamuychis, ñoqaqa manan ima huchatapas paypiqa tarinichu, nispa.

⁷Runakunataq payta nirqanku: — Ñoqaykuqqa kanmi kamachikuy simiyku, chayman hinan wañunan, “Diospa Churinmi kani” nisqanmanta, nispa.

⁸Pilatotaq chay nisqankuta uyarispa, astawan mancharikurqan.

⁹Hinan kamachikunan wasiman kutiykuspa Jesusta tapurqan: — Qanqa, ¿maymantan kanki? nispa. Jesustaq ichaqa mana ima nirqanpaschu.

¹⁰Hinan Pilatoqa payta nirqan: — ¿Manachu kutichiwanki? ¿Manachu yachanki qanta kacharinaypaqpas chakatanaypaqpas atiyniyoq kasqayta? nispa.

¹¹Chaymi Jesusqa nirqan: — Manan ima atiyniykipas ñoqa contraqa kanmanchu, manachus Dios qosunkiman chayqa. Chay hinaqa, qanman entregawaqniyqa aswan huchayoqmi qanmantaqa, nispa.

¹²Chaymantapachan Pilatoqa kacharipuytapuni munarqan, runakunataq ichaqa qaparkacharqanku: — Chay runata kacharinki chayqa, manan Roma rey Cesarpa amigonchu kanki. Pipas “reymi kani” niqqa rey César contran, nispa.

¹³Hinaqtinmi Pilatoqa chayta uyarispa hawaman Jesusta pusarqan, hinaspan juzganapi tiyaykurqan, Rumiwan Mast'asqa nisqa cheqaspi, hebreo rimaypitaq Gabata nisqa.

¹⁴Chayqa Pascua Fiesta ñawpaqnin p'unchaymi karqan, chawpi p'unchay hinaña. Pilaton judío runakunata nirqan: — ¡Kayqa reyniykichis! nispa.

¹⁵Paykunataq ichaqa qaparirqanku: — ¡Wañuchun, wañuchun! ¡Chakatay! nispa. Chaymi Pilatoqa paykunata nirqan: — ¿Reyniykichistachu chakatasaq? nispa. Sacerdote umallikunataq nirqanku: — Manan wak reyniykuqa kanchu, aswanpas rey Cesarllan, nispa.

¹⁶Hinaqtinmi Pilatoqa soldadokunaman hap'iykachirqan chakatasqa kananpaq. Chaymi soldadokunaqa Jesusta aparqanku.

¹⁷Jesustaq cruzninta apaspa, Calaverayoq Pata nisqaman lloqsirqan, chaytan hebreo rimaypiqa “Gólgota” ninku.

¹⁸Chaypin Jesusta chakatarqanku iskay runa chawpipi, hukta pañanpi, huktataq lloq'enpi.

¹⁹Pilaton huk qelqata qelqaspa cruz pataman churachirqan. Chay qelqan nirqan: “NAZARET LLAQTAYOQ JESÚS JUDÍO RUNAKUNAQ REYNIN”, nispa.

²⁰Jesusta chakatasqanku cheqasqa llaqta qayllan karqan, chaymi askha runakuna chay qelqasqata leerqanku. Chay qelqasqaqa karqan hebreo rimaypi, griego rimaypi, latín rimaypiwan.

²¹Hinan sacerdote umallikunaqa Pilatota nirqanku: — Ama judío runakunaq Reynin, nispaqa qelqaychu, aswanpas paypa: “Judío runakunaq Reyninmi kani”, nisqanta qelqayqa, nispa.

²²Chaymi Pilatoqa nirqan: — Qelqasqayqa qelqasqan, nispa.

²³Soldadokunataq Jesusta chakataspaña, p'achankunata hap'ispa tawaman rakirqanku, sapanka soldadopaq huktakama. Hinallataq ukhuna p'achantapas hap'irqanku, chay ukhunaqa mana sirayniyoqmi karqan, wichaymantapacha huk awaylla.

²⁴Chaymi paykunaqa ninakurqanku: — Ama llik'isunchu, aswanpas sorteasun, mayqenpaqchá kanqa, nispa. Chay hinapin Diospa Simin hunt'akurqan, chaymi nin: “P'achaykunatan rakinakurqanku, p'achaypaqmi sortearqanku”, nispa. Soldadokunataq chay hinatapuni ruwarqanku.

²⁵Jesuspa cruznin qayllapin sayasharqanku Jesuspa mamanpas, mamanpa ñañanpas, Cleofaspa warmin Mariapas, Magdalá llaqtayoq Mariapas.

²⁶Hinan Jesusqa mamanta munasqa yachachisqantawan chaypi sayashaqta rikuspa mamanta nirqan: — Mamáy, kayqa wawayki, nispa.

²⁷Yachachisqantapas nillarqantaqmi: — Kayqa mamayki, nispa. Hinan yachachisqanqa chay ratopacha Mariata wasinman pusakapurqan.

²⁸Chay qhepatataq Jesusqa tukuy imaymana hunt'asqaña kasqanta yachaspa Diospa Simin Qelqa hunt'akunanpaq nirqan: — “Ch'akishawanmi”, nispa.

²⁹Chaypin kasharqan huk vaso hunt'a p'osqo vino, hinan paykunaqa esponjata chay p'osqo vinoman challpuykuspa huk k'aspipi Jesuspa siminman aypachirqanku.

³⁰Chaymi Jesusqa p'osqo vinota ch'onqaykuspaña nirqan: — Lliwmi tukusqaña, nispa. Umanta k'umuykuspataq wañukapurqan.

³¹Chay p'unchayqa samana p'unchaypaq wakichikunan karqan, chay samana p'unchayqa hatun p'unchaymi karqan. Chaymi judío runakunaqa samana p'unchaypi ama cruzpi ayakuna qhepananpaq Pilatota valekurqanku, chakinkunata p'akispa apanankupaq.

³²Hinan soldadokunaqa hamuspa ñawpaqkaqpa chakinkunata p'akirqanku, hinallataq chay hukkaq chakatasqaq chakinkunatapas.

³³Jesusman asuykuspataq ichaqa, wañusqataña rikuspa manaña chakinkunata p'akirqankuchu.

³⁴Ichaqa huknin soldadon Jesuspa waqtanninta t'urpurqan, kaqratotaq phawamurqan yawarwan unuwan.

³⁵Chaytaqa rikuqpunin willakun, willakusqanqa cheqaqpunin, qankunapas iñinaykichispaq, paymi yachan cheqaq nisqanta.

³⁶Chaykunaqa sucederqan: “Manan tullunqa p'akisqachu kanqa”, niq Diospa Simin Qelqa hunt'akunanpaqmi.

³⁷Chay hinallataqmi huknin Qelqapas nin: “Qhawanqakun t'urpusqanku runataqa”, nispa.

³⁸Chaykuna qhepatataq Arimatea llaqtayoq Joseqa Pilatota valekurqan Jesuspa cuerponta apananpaq, chaymi Pilatoqa uyakurqan. Joseqa Jesuspa huknin yachachisqanmi karqan, ichaqa pakallapi, judío runakunata manchakusqanrayku. Hinan Joseqa rispa Jesuspa cuerponta aparqan.

³⁹Ñawpaqta Jesusman tutalla hamuq Nicodemopas rillarqantaqmi, qanchis chunka librata hina mirrata aloetawan chhaqrusqata aparikuspa.

⁴⁰Josewan Nicodemowanmi Jesuspa cuerponta wantuspa q'apaq hawinakunawan sumaq telakunapi p'istuykurqanku, judío runakunaq p'ampanakuyta yachasqankuman hina.

⁴¹Chakatasqa kasqan cheqaspin huerta karqan, chaypin huk mosoq p'ampana t'oqo karqan, chaypiqa manaraqmi pipas p'ampasqachu karqan.

⁴²Chaymanmi Jesuspa cuerponta churaykurqanku chay p'ampana t'oqo qayllallapi kasqanrayku, samana p'unchaypaq wakichikuna p'unchay kashasqanraykupiwan.