Read DIOSPA QHELQACHISQ Quechua JUAN 20 Bible Online

JUAN 20 - DIOSPA QHELQACHISQ Quechua bible

JUAN 20

¹Semana qallariy p'unchaymi Magdalá llaqtayoq Mariaqa aya p'ampanata rirqan, tutayaqllaraq kashaqtin, hinaspan aya p'ampana wisq'asqa rumi suchuchisqata rikurqan.

²Chaymi phawaylla rirqan Simón Pedroman Jesuspa munakusqan hukkaq yachachisqanmanwan, hinaspan paykunata nirqan: — ¡Señor Jesustan aya p'ampanamanta aparqosqaku, manan yachaykuchu maymanchus payta churamusqankutapas! nispa.

³Pedrotaq hukkaq yachachisqapiwan lloqsispa aya p'ampanata rirqanku.

⁴Iskayninkun kuskalla phawarqanku, hukkaq yachachisqataq ichaqa Pedromanta aswan usqhaylla phawaspa, ñawpaqta aya p'ampanaman chayarqan.

⁵Hinaspan k'umuykuspa telakunata churarayashaqta rikurqan, ichaqa manan haykurqanchu.

⁶Qhepanta riq Simón Pedrotaq chayaspa aya p'ampanaman haykurqan, hinaspan rikurqan telakunata churarayashaqta.

⁷Jesuspa uman k'uyusqa pañotataq mana telakunawan kuska churarayashaqtachu rikurqan, aswanpas wakneqpi k'uyurayashaqta.

⁸Chaymantataq aya p'ampanaman ñawpaqta chayaq yachachisqapas haykullarqantaq, rikuspataq creerqan.

⁹Manaraqmi Diospa Simin Qelqata entienderqankuchu, Jesusqa wañusqanmanta kawsarimpunanpuni kasqanta.

¹⁰Chay yachachisqakunataq wasinkuta kutipurqanku.

¹¹Mariataq sayasharqan aya p'ampana qayllapi waqaspa. Waqan-waqantaq aya p'ampanata qhawaykuq k'umuykurqan.

¹²Hinaspan maypichus Jesuspa cuerpon churasqa karqan chaypi yuraq p'achayoq iskay angelkunata tiyashaqta rikurqan, hukninta uma ladopi, huknintataq chaki ladopi.

¹³Angelkunataq Mariata nirqanku: — Warmi, ¿imamantan waqashanki? nispa. Mariataq nirqan: — Señorniyta apasqankumantan waqashani, manan yachanichu maymanchus churamusqankuta, nispa.

¹⁴Chayta nispanmi qhepaman kutirispa Jesusta rikurqan chaypi sayashaqta, ichaqa manan yacharqanchu Jesús kasqanta.

¹⁵Jesustaq payta nirqan: — ¿Imamantan waqashanki? ¿Pitan maskhashanki? nispa. Chaymi Mariaqa huertapi llank'aq runapaq yuyaspa nirqan: — Wiraqocha, qan aparqanki chayqa, willaway maymanchus churamusqaykita, ñoqataq apakampusaq, nispa.

¹⁶Hinan Jesusqa payta nirqan: — ¡María! nispa. Chaymi Mariaqa hebreo rimaypi nirqan: — ¡Raboni! nispa. (Chay simiqa “yachachikuq” ninantan nin).

¹⁷Jesustaq payta nirqan: — Amaraq llamiykuwaychu, manaraqmi Yayayman wichanichu, nispa. Wawqeykunaman rispa willamuy, Señormi nin: “Ñoqan wichashani Yayayman Yayaykichisman, Diosniyman Diosniykichisman”, nispa.

¹⁸Hinan Magdalá llaqtayoq Mariaqa yachachisqakunaman willamurqan Señor Jesusta rikumusqanta, imakunatachus payman nimusqantapas.

¹⁹Chay kikin semana qallariy p'unchay ch'isiyashaqtinmi, yachachisqakunaqa wasi punkukunata wisq'aykukuspa kasharqanku judío runakunata manchakuspanku, hinan Jesusqa chawpinkupi sayaykuspa paykunata nirqan: — Sonqoykichispi thak-kay kachun, nispa.

²⁰Chayta nispanmi paykunaman rikuchirqan makinkunata waqtannintawan. Yachachisqakunataqmi Señor Jesusta rikuspa q'ochukurqanku.

²¹Chaymi Jesusqa huktawan paykunata nirqan: — Sonqoykichispi thak-kay kachun. Imaynan Yaya ñoqata kachamuwarqan, chay hinallataqmi ñoqapas qankunata kachaykichis, nispa.

²²Chayta nispanmi paykunaman samaykurqan, hinaspan nirqan: — Santo Espirituta chaskiychis.

²³Pikunaq huchankutachus pampachankichis chayqa, pampachasqan kanqa, pikunaqtataqchus mana pampachankichis chayqa, manan pampachasqachu kanqa, nispa.

²⁴Mellizo nisqa Tomasmi chunka iskayniyoqmanta huknin karqan, paymi mana chaypichu kasharqan Jesús hamushaqtin.

²⁵Chaymi wakin yachachisqakunaqa payta nirqanku: — Señor Jesustan rikuyku, nispa. Tomastaq paykunata nirqan: — Manachus makinkunata clavokunaq t'oqosqanta rikusaq, dedoytapas clavokunaq haykusqanman mana winaykusaqchu, waqtannin t'urpusqamanpas mana makiyta winaykusaqchu chayqa, manan creesaqchu, nispa.

²⁶Pusaq p'unchay qhepatataq huktawan yachachisqankunaqa wasipi kasharqanku, Tomaspas paykunawanmi kasharqan. Punkukuna wisq'asqa kashaqtinmi Jesusqa hamuspa chawpinkupi sayaykuspa nirqan: — Sonqoykichispi thak-kay kachun, nispa.

²⁷Hinaspan Tomasta nirqan: — Qhawariy makiykunata, waqtanniytapas, dedoykita kayman winaykuy, makiykunatapas qhawariy, makiykita haywarimuspa waqtanniyman winaykuy, amaña iskayrayaychu, aswanpas iñiy, nispa.

²⁸Chaymi Tomasqa nirqan: — ¡Señorníy, Diosníy! nispa.

²⁹Hinan Jesusqa payta nirqan: — Tomás, rikuwaspaykiraqmi qanqa iñinki, kusisamiyoqmi mana rikuspalla ñoqapi iñiqkunaqa, nispa.

³⁰Jesusqa ruwallarqantaqmi wak askha milagrokunatapas yachachisqankunaq qayllanpi, chaykunaqa kay qelqapi manan qelqasqachu kashan.

³¹Kaykunan ichaqa qelqasqa kashan, Jesusqa Diospa Churin Cristo kasqanta iñinaykichispaq, paypi iñispataq kawsayniyoq kanaykichispaq, nispa.