Read DIOSPA QHELQACHISQ Quechua JUAN 21 Bible Online

JUAN 21 - DIOSPA QHELQACHISQ Quechua bible

JUAN 21

¹Chaykuna qhepatan Jesusqa huktawan yachachisqankunaman Tiberias qocha cantopi kay hinata rikhurirqan. Chaypin huñunasqa kasharqanku:

²Simón Pedro, Mellizo Tomás, Galileapi kaq Caná llaqtamanta Natanael, Zebedeoq churinkuna, iskay yachachisqankunapiwan.

³Simón Pedron paykunata nirqan: — Challwaqmi rishani, nispa. Paykunataq nirqanku: — Ñoqaykupas qanwan risaqku, nispa. Rispataq boteman haykurqanku, ichaqa manan chay tuta huk challwallatapas hap'imurqankuchu.

⁴Paqarimushaqtinñataq Jesusqa qocha cantopi sayasharqan, yachachisqakunataq ichaqa Jesús kasqanta mana reqsirqankuchu.

⁵Chaymi Jesusqa paykunata nirqan: — Wawallaykuna, ¿manachu challwaykichis kan? nispa. Paykunataq: — Manan, nirqanku.

⁶Jesustaq paykunata nirqan: — Boteq paña ladonman llikata wikch'uykuychis, chaypin hap'inkichis, nispa. Chaymi wikch'uykurqanku, ichaqa manan horqomuyta atirqankuchu askha challwata hap'isqankurayku.

⁷Hinaqtinmi Jesuspa munasqan yachachisqaqa Pedrota nirqan: — ¡Señor Jesustáq! nispa. Simón Pedrotaq Señor Jesús kasqanta uyarispa hina, q'ala wasalla kashasqanrayku p'achanwan churarqokuspa qochaman saltaykurqan.

⁸Wakin yachachisqakunataq botepi hamurqanku challwantin llikata aysamuspa, qocha cantomanqa manan karupiñachu kasharqanku, aswanpas pachak metro hinallapiñan.

⁹Qocha cantomanqa lloqsimuspataq nina sansa patapi rikurqanku huk challwata t'antatawan.

¹⁰Jesustaq paykunata nirqan: — Hap'imusqaykichis challwata apamuychis, nispa.

¹¹Chaymi Simón Pedroqa boteman haykuspa llikata qocha cantoman aysamurqan, pachak phisqa chunka kinsayoq hatuchachaq challwakunantin hunt'ata, chay hinaña kashaqtinpas, manan llikaqa llik'ikurqanchu.

¹²Jesustaq paykunata nirqan: — Hamuychis, mikhuychis, nispa. Manataqmi mayqenninkupas tapurqankuchu: — ¿Pitaq qanri kanki? nispaqa. Paykunaqa yacharqankun Señor Jesús kasqanta.

¹³Jesustaq paykunaman qayllaykuspa t'antata challwatawan paykunaman qorqan.

¹⁴Kaywanmi kinsa kutiña karqan Jesuspa wañusqanmanta kawsarimpuspa yachachisqankunaman rikhurisqan.

¹⁵Mikhuyta tukuqtinkuñan Jesusqa Simón Pedrota nirqan: — Juanpa churin Simón, ¿paykunamanta aswantachu munakuwanki? nispa. Paytaq nirqan: — Arí, Señor, qanta munakusqaytaqa yachankin, nispa. Hinan Jesusqa payta nirqan: — Corderoykunata michipuway, nispa.

¹⁶Huktawan payta nirqan: — Juanpa churin Simón, ¿munakuwankichu? nispa. Paytaq nirqan: — Arí, Señor, qanmi yachanki munakusqayta, nispa. Hinan payta nirqan: — Ovejaykunata michipuway, nispa.

¹⁷Kinsa kutipin payta nirqan: — Juanpa churin Simón, ¿munakuwankichu? nispa. Hinan Pedroqa kinsa kutipi “¿Munakuwankichu?” nisqanmanta llakirqokurqan, chaymi payta nirqan: — Señor, qanmi yachanki tukuy imaymanata, qanta munakusqaytapas yachallankitaqmi, nispa. Chaymi Jesusqa payta nirqan: — Ovejaykunata michipuway.

¹⁸Cheqaqtapunin niyki: Waynallaraq kaspaykiqa qan kikiyki p'achakuspan may munasqaykita riq kanki, yuyaqña kaspaykin ichaqa makiykikunata mast'arinki, hinan huk p'achachisunki, hinaspan mana riy munasqaykiman apasunki, nispa.

¹⁹(Chaytaqa nirqan imaynata wañuspachus Diosta hatunchananmanta entiendechispan). Chayta nispataq Pedrota: Qhepayta hamuy, nirqan.

²⁰Hinan Pedroqa qhepanta qhawarispa Jesuspa munasqa yachachisqan hamushaqta rikurqan, paymi cenapi Jesusman k'iraykurisqa kashaspa tapuykurqan: — Señor, ¿pitaq hap'ichiqniykiri? nispa.

²¹Pedrotaq chay yachachisqata rikuspa Jesusta nirqan: — Señor, ¿imaynataq payri kanqa? nispa.

²²Jesustaq payta nirqan: — Munaqtiyqa payqa kawsanmanmi kutimunaykamapas, ¿imataq qanmanqa qokusunki? Qanqa qhepayta hamuy, nispa.

²³Hinaqtinmi iñiqkuna ukhupi wakin rimarqanku: — Chay yachachisqaqa manan wañunqachu, nispa. Jesusqa manan nirqanchu “manan wañunqachu” nispaqa, aswanpas nirqanmi: Munaqtiyqa payqa kawsanmanmi kutimunaykamapas, ¿imataq qanmanqa qokusunki? nispa.

²⁴Chay yachachisqanqa kaykunaq cheqaq kasqantan willakurqanpas qelqarqanpas. Yachanchistaqmi willakusqanqa cheqaq kasqanta.

²⁵Askharaqmi kashan Jesuspa tukuy imaymana ruwasqankunaqa, sapankachus qelqasqa kanman chayqa, yuyaykunin manan kay pachantinpas aypanmanchu chay qelqakunata churanapaq.