Read DIOSPA QHELQACHISQ Quechua JUAN 3 Bible Online

JUAN 3 - DIOSPA QHELQACHISQ Quechua bible

JUAN 3

¹Huk runan karqan fariseokunamanta Nicodemo sutiyoq, judío runakunaq umallin.

²Paymi Jesusman tutalla rispa nirqan: — Yachachikuq, yachaykun yachachinaykipaq Diospa kachamusqasuykita. Manan pipas ruwasqayki milagrokunataqa ruwayta atinmanchu manachus Dios paywan kanman chayqa, nispa.

³Jesustaq payta nirqan: — Cheqaqtapunin niyki, pipas Diospa qhapaqsuyunpi kananpaqqa wakmantan nacenan, nispa.

⁴Nicodemotaq kutichirqan: — ¿Imaynataq runari machuña kashaspa wakmanta nacenman? Icha, ¿mamanpa wiksanman kutiykuspachu wakmanta nacemunman? nispa.

⁵Jesustaq nirqan: — Cheqaqtapunin niyki, pipas Diospa qhapaqsuyunpi kananpaqqa unumantawan Diospa Espiritunmantawanmi nacenan.

⁶Runamanta naceqqa runallan, Espiritumanta naceqpas espiritun.

⁷Ama musphaychu: “Wakmantan nacenaykichispuni” nisqaymantaqa.

⁸Wayraqa may munasqanmantan wayramun, suenasqallantan uyarinki, manataqmi yachankichu maymanta hamusqantapas, maymanchus risqantapas, chay hinallataqmi Espiritumanta pipas naceqqa, nispa.

⁹Nicodemotaq payta tapurqan: — ¿Imaynataq kayri kanman? nispa.

¹⁰Chaymi Jesusqa kutichirqan: — ¿Israel runakunata yachachiq kashaspachu qanqa chayta mana yachanki?

¹¹Cheqaqtapunin niyki, ima yachasqaykutan rimayku, ima rikusqaykutataqmi willaykupas, willasqaykutataqmi mana chaskinkichischu.

¹²Kay pacha kaqkunamanta qankunaman nishaqtiy mana iñinkichischu chayqa, ¿imaynatataq iñiwaqchis hanaq pacha kaqkunamanta niykichisman chayqa?

¹³Manan pipas hanaq pachamanqa wicharqanchu, aswanpas hanaq pachamanta uraykamuq Runaq Churillanmi.

¹⁴Imaynan Moisesqa ch'inneqpi broncemanta mach'aqwayta warkurqan, chay hinallataqmi Runaq Churinpas warkusqa kanqa,

¹⁵pipas paypi iñiqqa wiñay kawsayniyoq kananpaq.

¹⁶Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq.

¹⁷Diosqa kay pachaman Churinta kachamurqan, manan runakunata huchachananpaqchu, aswanmi runakunata qespichinanpaq.

¹⁸Diospa Churinpi iñiqqa manan huchachasqachu, paypi mana iñiqmi ichaqa huchachasqaña, Diospa sapan Churinpi mana iñisqanrayku.

¹⁹Kaykunamantan Diosqa huchachanqa: K'anchaymi kay pachaman hamurqan, runakunataq laqhayaqta aswanta munakurqanku k'anchaymantaqa, ruwasqanku mana allin kasqanrayku.

²⁰Pipas mana allinkaqta ruwaqqa k'anchaytan cheqnikun, manataq k'anchayman hamunchu, ruwasqankuna mana sut'inchasqa kananpaq.

²¹Cheqaqkaqta ruwaqmi ichaqa k'anchayman hamun, ahinapin ruwasqankunata k'anchay sut'inchanqa Diospa yanapasqan kasqanta yachakunanpaq, nispa.

²²Chay qhepatan Jesusqa yachachisqankunapiwan Judea ladoman rirqan, chaypi paykunawan qhepakuspataq runakunata bautizarqan.

²³Juanpas bautizallarqantaqmi Salim qaylla Enonpi, askha unu chaypi kasqanrayku. Runakunan rispa bautizachikurqanku.

²⁴Juanqa manaraqmi carcelpi wisq'asqachu karqan.

²⁵Juanpa wakin yachachisqankunataq ch'uyanchakuymanta judiomasinku runawan tapunakurqanku.

²⁶Juanman rispataq nirqanku: — Yachachikuq, Jordán mayu inti lloqsimuy ladopin huk runa qanwan karqan, paymantan qanqa willawarqankiku, kunanqa paymi bautizashan, llapallataqmi payman rishanku, nispa.

²⁷Hinan Juanqa nirqan: — Manan runaqa imatapas chaskiyta atinmanchu Dios payman mana qoqtinqa.

²⁸Qankuna kikiykichismi uyariwarqankichis: Manan ñoqachu Cristoqa kani nisqayta, aswanpas paypa ñawpaqenta Diospa kachamusqallanmi kani, nispa.

²⁹Casarakuypiqa noviollan noviayoqqa, novioq amigontaq paypa rimasqanta uyarispa anchatapuni q'ochukun, chay hinan ñoqapas anchatapuni q'ochukushani.

³⁰Payqa aswan-aswan reqsisqan kanan, ñoqataqmi pisi reqsisqallaña kanay, nispa.

³¹Hanaq pachamanta hamuqqa lliwpa qollananmi, kay pachamanta kaqqa kay pachallamantan, kay pacha kaqkunallamantataq rimanpas. Hanaq pachamanta hamuqmi ichaqa lliwpa qollanan.

³²Payqa imachus rikusqantan uyarisqantan willakun, manataqmi pipas willakusqantaqa chaskinchu.

³³Willakusqanta chaskiqmi ichaqa, Diospa nisqanta cheqaqpaq hap'in.

³⁴Diospa kachamusqanqa Diospa siminkunatan riman, Diosqa Espiritunta mana mich'akuspan payman qon.

³⁵Yayaqa Churintan munakun, chaymi lliwta qorqan pay kamachikunanpaq.

³⁶Churipi iñiqqa wiñay kawsayniyoqmi, Churipi mana iñiyta munaqmi ichaqa chay kawsayman mana haykunqachu, aswanmi Diospa phiñakuynin paypaqqa kaqlla kashan, nispa.