Read DIOSPA QHELQACHISQ Quechua JUAN 4 Bible Online

JUAN 4 - DIOSPA QHELQACHISQ Quechua bible

JUAN 4

¹Fariseokunan uyarisqaku: Juanpa yachachisqankunaqa pisiyashanmi, Jesusmi yachachisqakunata askhayachishan bautizashantaq, nisqata.

²(Kikin Jesusqa manan bautizarqanchu, aswanpas yachachisqankunallan).

³Fariseokunaq chay rimasqanta yachaspan Jesusqa Judeamanta lloqsispa Galileaman kutipurqan.

⁴Samaria provinciantapunin pasanan karqan.

⁵Hinaspan Samariapi Sicar nisqa llaqtaman chayarqan, Jacobpa José churinman chakrata qosqan qayllaman.

⁶Chaypin Jacobpa p'uytun nisqa karqan. Chawpi p'unchay hinaña kashaqtinmi Jesusqa purimusqanpi sayk'usqa kaspa p'uytu patapi tiyaykurqan.

⁷Chayllamanmi Samaria llaqtayoq warmi unu aysakuq hamurqan, paytan Jesusqa nirqan: — Unuta ukyarichiway, nispa.

⁸Yachachisqankunataqmi llaqtata rirqanku mikhunata rantimuq.

⁹Chaymi Samaria warmiqa payta nirqan: — ¿Imaynataq qanri judío runa kashaspa ñoqamanta unuta mañakuwanki, Samaria warmi kashaqtiy? nispa. (Judío runakunaqa Samaria runakunaq ukyasqanpiqa manan ukyaqkuchu).

¹⁰Hinan Jesusqa payta nirqan: — Diospa qonasuykitachus yachawaq, “ukyarichiway” niqniykitapas reqsiwaqtaq chayqa, qanchari paymanta mañakuwaq, paytaq kawsay unuta qosunkiman, nispa.

¹¹Chaymi warmiqa nirqan: — Wiraqocha, manamá imawan aysanaykipas kanchu, p'uytupas ukhutaq. ¿Maymantataq chay kawsay unutaqa qowankiman?

¹²¿Kurakchu kanki Jacob ñawpa taytaykumanta? Paymi kay p'uytuta saqewarqanku, kaymantan paypas wawankunapas uywankunapas ukyarqanku, nispa.

¹³Jesustaq payta nirqan: — Pipas kay unuta ukyaqqa wakmantan ch'akichikunqa.

¹⁴Ñoqa qosaq chay unuta ukyaqmi ichaqa manaña hayk'aqpas ch'akichikunqachu, aswanmi ñoqa qosaq chay unuqa phullpumuq unu pukyu hina paypi kanqa, wiñay kawsaytataq qonqa, nispa.

¹⁵Chaymi warmiqa nirqan: — Wiraqocha, chay unuta qoykuway, amaña ch'akichikunaypaq, nitaq kaykama unu aysakuq hamushanaypaqpas, nispa.

¹⁶Hinan Jesusqa nirqan: — Phaway, qosaykita waqyarqamuy, nispa.

¹⁷Warmitaq nirqan: — Manan qosayqa kanchu, nispa. Hinan Jesusqa nirqan: — Allintan ninki: Manan qosayqa kanchu, nispayki.

¹⁸Phisqa qhariyoqmi karqanki riki, kunan qanwan tiyaqqa manan qosaykichu, chaytaqa cheqaqtan ninki, nispa.

¹⁹Chaymi warmiqa nirqan: — Wiraqocha, profetamá qanqa kasqanki.

²⁰Kay orqopin ñawpa taytaykuqa Diosta yupaycharqanku, qankunataq “Jerusalén llaqtapin yupaychananchisqa” ninkichis, nispa.

²¹Jesustaq payta nirqan: — Warmi, creeway, tiempon chayamushan, manan kay orqopichu, manallataq Jerusalén llaqtapipaschu Yayata adoranaykichis.

²²Qankunaqa mana entiendesqaykichistan yupaychankichis, ñoqaykun ichaqa pitachus reqsisqaykuta yupaychayku. Judío runakunamantan qespichiqqa hamun.

²³Ichaqa hamushaq tiempon chayarqamunña, chaymi, kunan cheqaq yupaychaqkunaqa Yayata yupaychanqaku Diospa Espiritunpa yanapasqan, Diospa kayninman hinapuni, Yayaqa chay hina yupaychaqkunatan munan payta yupaychanankupaq.

²⁴Diosqa Espiritun, payta yupaychaqkunaqa espiritupi cheqaq-kaypiwanmi yupaychanankupuni, nispa.

²⁵Warmitaq nirqan: — Yachanin Cristo nisqa Mesiaspa hamunanta, paymi hamuspa lliw imaymanata sut'inchawanqaku, nispa.

²⁶Hinan Jesusqa nirqan: — Ñoqa rimapayaqniykin chay Mesiasqa kani, nispa.

²⁷Chay raton yachachisqankunaqa hamurqanku, hinaspan warmiwan rimasqanmanta muspharqanku, ichaqa manan mayqenpas warmita nirqanchu: ¿Imatan munanki? nispa. Manallataq Jesustapas nirqanchu: — ¿Imatan paywan rimashanki? nispapas.

²⁸Hinaqtinmi warmiqa p'uyñunta saqerparispa llaqtata rirqan, hinaspan runakunaman willamurqan:

²⁹— Hamuychis, lliw ruwasqaykunata niwaqniy runata rikumuychis. ¿Manachu payqa Cristo kanman? nispa.

³⁰Chaymi llaqtamanta lloqsispa Jesuspa kasqanman rirqanku.

³¹Chaykamataq yachachisqankunaqa Jesusta rogarqanku: — Yachachikuq, mikhuykuy, nispanku.

³²Jesustaq ichaqa yachachisqankunata nirqan: — Ñoqaq mikhunayqa qankunaq mana reqsisqaykichis mikhunan kashan, nispa.

³³Chaymi yachachisqankunaqa ninakurqanku: — ¿Pipaschá mikhunata payman apamurqan? nispanku.

³⁴Jesustaq paykunata nirqan: — Mikhunayqa kachamuwaqniy Yayaq munayninta ruwaspa paypa ruwananta hunt'anaymi.

³⁵Qankunan ninkichis: Tawa killaraqmi ichhuypaqqa kashan, nispa. Ñoqataq niykichis: Chakrakunata allinta qhawariychis, ichhunapaqmi poqosqaña kashan.

³⁶Ichhuqqa Diosmantan pagota chaskin, hinaspan ruruta hina wiñay kawsaypaq huñun, ahinapin t'akaqpas ichhuqpas kuska kusikunqaku.

³⁷Chay hinapin: Hukmi t'akan, huktaq ichhun, nisqa rimayqa cheqaqpuni.

³⁸Mana llank'asqaykichismanmi ichhumunaykichispaq kacharqaykichis, hukkunan llank'arqanku, qankunataq llank'asqankuman haykurqankichis, nispa.

³⁹Chay llaqtapi Samaria runakunan Jesuspi askha iñirqanku: Lliw ruwasqaykunatan niwan, nispa warmiq willakusqanrayku.

⁴⁰Chaymi Samaria runakunaqa Jesusman hamuspa paykunawan qhepakunanpaq rogakurqanku. Hinan payqa chaypi iskay p'unchayta qhepakurqan.

⁴¹Jesuspa siminta uyarispataq aswan askha iñirqanku.

⁴²Chaymi warmita nirqanku: — Manañan qanpa nisqallaykiwanchu Jesuspi iñiyku, kikiykun uyarimuyku, hinaspan yachayku payqa cheqaqpuni runakunata Qespichiq Cristo kasqanta, nispa.

⁴³Iskay p'unchay qhepatataq chaymanta lloqsispa Jesusqa Galilea provinciaman rirqan.

⁴⁴Kikin Jesusmi willakusqa, profetaqa llaqtanpi pisichasqa kasqanta.

⁴⁵Galileaman chayaqtintaq chaypi kaqkunaqa Jesusta chaskirqanku, Jerusalén llaqtaman rispa fiestapi paypa imaymana ruwasqanta rikusqankurayku.

⁴⁶Jesusqa wakmantan Galileapi kaq Caná llaqtaman rirqan, unumanta vinoman tukuchisqan llaqtaman. Chaykamataq Capernaúm llaqtapi reypa huknin oficialninpa churin onqosharqan.

⁴⁷Chay oficialmi Judeamanta Galileaman Jesuspa chayasqanta yachaspa Jesusman rirqan, hinaspan rogakurqan Caná llaqtamanta Capernaumman uraykuspa wañunayashaq churinta qhaliyachimunanpaq.

⁴⁸Chaymi Jesusqa payta nirqan: — Manachus musphana milagrokunatapas rikunkichis chayqa, manan ñoqapi iñiwaqchischu, nispa.

⁴⁹Reypa oficialnintaq payta nirqan: — Ama hinachu kay, riykapuway wasiyta, manaraq churiy wañurqoshaqtin, nispa.

⁵⁰Hinan Jesusqa nirqan: — Ripuy, churiykiqa kawsashanmi, nispa. Chaymi oficialqa Jesuspa nisqanta creerqan, hinaspan ripurqan.

⁵¹Wasinman kutipushaspataq kamachinkunawan tuparqan, hinan willarqanku: — Churiykiqa kawsashanmi, nispa.

⁵²Hinan oficialqa paykunata tapurqan ima horastachus qhaliyasqanta. Paykunataq nirqanku: — Qayna p'unchay doce wasapayta hinan fiebre onqoyqa thanirqapurqan, nispa.

⁵³Chaymi taytaqa repararqan chay horasta: Churiykiqa kawsashanmi, nispa, Jesuspa nisqanta, chaymi payqa llapa familiantin Jesuspi iñirqan.

⁵⁴Chay iskaykaq milagrotan Jesusqa ruwarqan Judeamanta Galileaman kutispa.