Read DIOSPA QHELQACHISQ Quechua HECHOS 11 Bible Online

HECHOS 11 - DIOSPA QHELQACHISQ Quechua bible

HECHOS 11

¹Judea provinciantinpi kaq apostolkunataq iñiqkunapiwan uyarirqanku mana judío runakunapas Diospa siminta chaskisqankuta.

²Pedro Jerusalén llaqtaman wichariqtintaq, iñiq judío runakunaqa paywan churanakuspa

³nirqanku: — ¿Imanaqtinmi mana judío runakunaqman rispayki paykunawan mikhumurqanki? nispanku.

⁴Hinaqtinmi Pedroqa lliw imakunachus sucedesqanta llapallanta willayta qallarirqan:

⁵— Ñoqan Jope llaqtapi kashaspay Diosmanta mañakuspa mosqoypi hina huk rikhuriyta rikurqani. Chay rikhuriypi huk hatun lliklla hina tawantin ch'ullpanmanta warkuykusqa hanaq pachamanta ñoqaq kasqayman uraykamushaqta rikurqani.

⁶Chayta allinta qhawaspaymi rikurqani kay pachapi kaq tawa chakiyoq animalkunata, salqa animalkunata, pampan suchuq animalkunata, phalaq animalkunatawan.

⁷Huk kunkatataq uyarirqani: Pedro, sayariy, kaykunata wañuchispa mikhuy, nishawaqta.

⁸Chaymi nirqani: — Señorníy, amapuni, manan hayk'aqpas mikhurqanichu mana mikhuna kaqtapas, qhelli kaqtapas, nispay.

⁹Hinan chay kunkaqa hanaq pachamanta huktawan nimuwarqan: Diospa ch'uyanchasqantaqa aman “qhelli” ninkichu, nispa.

¹⁰Chhaynatan kinsa kutita rikhurimurqan, hinaspan kaqta hanaq pachaman kutipurqan.

¹¹Chay ratopachan qorpachakusqay wasiman chayamurqanku Cesarea llaqtamanta ñoqaman kachamusqa kinsa runakuna.

¹²Hinan Santo Espirituqa niwarqan: Ama iskayrayaspa paykunawan riy, nispa. Ñoqawanmi kay soqta wawqekunapas rirqanku, hinaspan Cornelioq wasinman haykurqayku.

¹³Paytaq willawarqanku imaynatachus sayashaq angelta wasinpi rikusqanta, chay angelsi nisqa: Jope llaqtaman kachay, hinaspa Pedro sutiyoq Simonta pusachimuy.

¹⁴Paymi willasunkichis imaynatachus qanpas llapa familiaykipas qespichisqa kanaykichista, nispa.

¹⁵Rimayta qallariqtiytaq Santo Espíritu paykunaman uraykamurqan, imaynan ñoqanchismanpas ñawpaqta uraykamurqan hinata.

¹⁶Chaymi yuyarirqani Señor Jesuspa nisqanta, paymi nirqan: “Juanqa cheqaqtapunin unuwan bautizarqan, qankunan ichaqa Santo Espirituwan bautizasqa kankichis”, nispa.

¹⁷Ñoqanchismanqa Jesucristopi iñiqtinchismi Santo Espirituta qowarqanchis, chay hinaqa kikin Espiritullatataq paykunamanpas Dios qoshaqtinqa, ¿pitaq ñoqari kani Diosta hark'akunaypaq? nispa.

¹⁸Chayta uyarispataq Jerusalenpi kaq iñiqkunaqa upallakapurqanku, hinaspan Diosta hatunchaspa nirqanku: — ¡Chay hinaqa, mana judío runatapas Diosqa munanmi payman kutirikuspa wiñay kawsayniyoq kanankuta! nispa.

¹⁹Estebanta wañuchisqanku qhepatan iñiqkunata qatiykachaspa ch'eqechirqanku. Hinan wakinkuna chayarqanku Fenicia hap'iyman, Chipre islaman, Antioquía llaqtamanwan, judío runakunallaman Jesucristomanta willaspa.

²⁰Ichaqa wakin iñiqkunan Chipre islamanta Cirene llaqtamanta qharikuna karqanku, paykunan Antioquía llaqtaman chayaspa, mana judío runakunamanpas Señor Jesusmanta allin willakuykunata willallarqankutaq.

²¹Señor Diosmi anchatapuni paykunata yanaparqan, chaymi askha runa Jesuspi iñispa Diosman kutirikurqanku.

²²Chay willakuyta Jerusalén llaqtapi kashaq iglesia uyarispataq Bernabeta[3] kacharqanku Antioquía llaqtaman rinanpaq.

²³Paymi chay llaqtaman chayaspa, Diospa saminchasqanta rikuspa mayta kusikurqan, hinaspan llapankuta kallpacharqan Señorman hap'ipakuspa tukuy sonqo servinankupaq.

²⁴Bernabeqa sumaq runan karqan, allin iñiyniyoq, Santo Espirituwanpas hunt'a. Askha runakunataq Señorman hap'ipakurqanku.

²⁵Chaymantataq Bernabeqa Tarso llaqtata rirqan Saulota maskhamuq, tarimuspataq Antioquía llaqtaman pusamurqan.

²⁶Chaypin huk wata hunt'a iglesiawan huñunakuspa askha runata yachachirqanku. Antioquía llaqtapitaq Jesucristopi iñiqkunata chaymantapacha Cristiano nispa suticharqanku.

²⁷Chay p'unchaykunapin wakin profetakunaqa Jerusalén llaqtamanta Antioquía llaqtaman uraykurqanku.

²⁸Hukninkun karqan Agabo sutiyoq, paymi sayarispa Santo Espirituq yuyaychasqan kaspa kay pachapi manchay yarqay kananmanta willakusqa. Chay yarqaymi Roma rey Claudioq tiemponpi hunt'akurqan.

²⁹Chaymi Antioquiapi kaq iñiqkunaqa sapankanku imachus kapusqanman hina Judea provinciapi tiyaq wawqe-panakunaman yanapayta apachinankupaq rimanakurqanku.

³⁰Ahinatan ruwarqanku. Chay yanapaytan apachirqanku Bernabewan Saulowan Judeapi iñiqkuna ukhupi umalli runakunaman qonankupaq.