Read DIOSPA QHELQACHISQ Quechua HECHOS 15 Bible Online

HECHOS 15 - DIOSPA QHELQACHISQ Quechua bible

HECHOS 15

¹Chay p'unchaykunan Judea provinciamanta Antioquía llaqtaman wakin runakuna uraykamurqanku, hinaspan iñiqkunata yachachirqanku: — Manachus Moisespa kamachikuy siminman hina qhari-kayniykichis qarachata señalakunkichis chayqa, manan Diosqa qespichisunkichischu, nispanku.

²Chaymi Pabloqa Bernabepiwan paykunawan sinchita churanakurqanku, hinan iñiqkunaqa Pablota Bernabeta wakinninkutawan akllarqanku, chay churanakuymanta Jerusalén llaqtapi apostolkunawan umalli runakunawan ima rimanakamunankupaq.

³Hinaspan iglesiaqa paykunata kacharparirqan, chaymi rirqanku Fenicia hap'iyninta Samaria provinciantawan mana judío runakunaq Diosman kutirikusqankuta iñiqkunaman willaspa. Chaymi llapan iñiqkunaqa anchata kusikurqanku.

⁴Jerusalén llaqtaman chayaqtinkun iñiqkuna, apostolkuna, umalli runakunapiwan paykunata sumaqta chaskirqanku. Hinan kachasqakunaqa willarqanku lliw imaymanata paykunawan Diospa ruwasqanta.

⁵Ichaqa fariseokunaq t'aqanmanta iñiqkunan sayarispa nirqanku: — Mana judío kaq iñiqkunataqa qhari-kayninku qarachata señalanapunin, hinaspa Moisespa kamachikuy siminta hunt'anankupaq kamachina, nispanku.

⁶Chaymi apostolkunaqa umalli runakunapiwan huñunakurqanku chay churanakuymanta rimanankupaq.

⁷Unaytaña churanakuqtinkutaq Pedroqa sayarispa paykunata nirqan: — Wawqeykuna, yachankichismi riki unay tiempoña qankuna ukhumanta Diospa akllakuwasqanta, ñoqa willaqtiy Jesucristomanta allin willakuykunata mana judío runakuna uyarinankupaq, hinaspa iñinankupaq.

⁸Runakunaq sonqon reqsiq Diosmi paykunamanpas Santo Espirituta qorqan, ahinapin ñoqanchista hina paykunata chaskisqanta sut'incharqan.

⁹Diosqa ñoqanchistapas paykunatapas kaqtakamallan munakuwanchis, chaymi paypi iñiqtinku sonqonkutapas ch'uyancharqan.

¹⁰Kunanri, ¿imaraykutaq Diosta wateqankichis, ñawpa taytanchiskunaqpas ñoqanchispapas mana hunt'ay atisqanchis kamachikuyta iñiqkunaman hunt'anankupaq kamachispa?

¹¹Ñoqanchisqa yachanchispunin Señor Jesuspa khuyapayakuynillanwan Diospa qespichisqan kasqanchista, chay hinallataqmi paykunapas qespichisqa kanku, nispa.

¹²Chaymantataq Bernabewan Pablowan willakurqanku may hatun milagrokunata señalkunatawan mana judío runakuna ukhupi Dios paykunawan ruwasqanmanta, hinan llapanku ch'inlla uyarirqanku.

¹³Paykuna rimayta tukuqtinkutaq Jacoboqa nirqan: — Wawqeykuna, uyariwaychis:

¹⁴Simonmi willakunña imaynatachus Diosqa mana judío runakunamanta paypaq runakunata akllakuspa chayllaraq paykunata yuyarikusqanta.

¹⁵Chaywantaqmi profetakunaq nisqanpas tupan. Diospa Simin Qelqan nin:

¹⁶“Chay qhepatañan kutimusaq, wakmantan Davidpa mirayninta sayarichisaq, wasi thunikuqtin perqaq hinan wakmanta hatarichisaq

¹⁷wakin runakunapas maskhawanankupaq, sutiywan sutichasqa llapan wak suyu runakunapas maskhawanankupaq. Tukuy chaykunata ruwaq ñoqa Señor Diosmi chaytaqa nini.

¹⁸Ñawpamantañan chaykunataqa reqsichirqani”, nispa.

¹⁹Chayraykun ñoqaqa yuyaykuni Diosman kutirikuq mana judío runakunataqa amaña musphachisunchischu.

²⁰Aswanpas paykunaman qelqasunchis idolokunaman haywasqa mikhunata ama mikhunankupaq, qhelli huchapi ama purinankupaq, seq'osqa aychatapas yawartapas ama mikhunankupaq.

²¹Moisespa kamachikuy simintaqa ñawpa tiempomantañan sapanka llaqtapi yachachinku, sapa samana p'unchaypitaq sinagogakunapipas leenku, nispa.

²²Chaymi apostolkunaqa, umalli runakunapiwan, llapa iglesiapiwan yuyaykurqanku paykuna ukhumanta qharikunata akllaspa Pablotawan Bernabetawan kuskata Antioquía llaqtaman kachanankupaq. Hinaspan akllarqanku umalli qharikuna Barsabás sutiyoq Judasta Silastawan.

²³Chay qhepatan apanankupaq kay hinata cartata qelqarqanku: Ñoqayku iñiq-masiykichis apostolkunan, umalli runakunan, Antioquía llaqtapi, Siria provinciapi, Cilicia provinciapi kaq mana judío wawqe-panakunata napaykamuykiku.

²⁴Yachaykun wakinniyku mana kamachishaqtiyku qankunaman hamusqanta. Paykunan yachachikuyninkuwan pantachispa iskayrayachirqasunkichis. [Kamachisunkichistaq qhari-kayniykichis qarachata kuchuqakuychis, Moisespa kamachikuy siminta hunt'aychis, nispa.][5]

²⁵Chaymi huk-nisqalla huñukuspayku allinta yuyaykurqayku, wakin qharikunata akllaspa, munasqanchis Bernabetawan Pablotawan kuskata qankunaman kachamuyta.

²⁶Paykunaqa Señorninchis Jesucristoq sutinraykun wañuytapas mana manchakurqankuchu.

²⁷Chaymi Judasta Silastawan kachamuykiku, paykunapas chay hinallatataq simipi willanasuykichispaq.

²⁸Santo Espiritumanpas ñoqaykumanpas allinmi rikch'akuwanku qankunaman ama ima sasatapas kamachinaykupaq, aswanpas kaykunallatan hunt'anaykichistaqa munayku:

²⁹Aman idolokunaman haywasqa mikhunata mikhunkichischu, aman seq'osqa aychatapas yawartapas mikhunkichischu, aman qhelli huchapipas purinkichischu. Chaykunamantachus cuidakunkichis chayqa allintan ruwankichis. Allillanpuni kashaychis, nispa.

³⁰Hinaspan tawantin kamachisqa qharikunaqa, Antioquía llaqtaman uraykurqanku, chaypin iñiqkunata huñuykuspa cartata haywarqanku.

³¹Chayta leespankutaq iñiqkunaqa sonqonku tiyaykuqtin kusikurqanku.

³²Judaspas Silaspas profeta kaspankun, allin-allinta rimaykuspa iñiqkunata sonqochaspa kallpacharqanku.

³³Chaypi unay p'unchaykunaña kasqankumantan iñiqkunaqa: — Sumaqllaña kutipuychis, nispa kacharparipurqanku. [

³⁴Silastaq ichaqa chaypi qhepakurqan.][6]

³⁵Pablotaq Bernabepiwan Antioquía llaqtapi qhepakurqanku, chaypin paykunapas askha iñiqkunapiwan yachachispa Señor Jesucristomanta willarqanku.

³⁶Pisi p'unchaykuna qhepatataq Pabloqa Bernabeta nirqan: — Kutisunchis Señor Jesucristomanta willamusqanchis lliw llaqtakunapi wawqe-panakunata watukamuq, imaynachá kashankupas, nispa.

³⁷Hinan Bernabeqa Marcos sutiyoq Juanta paykunawan pusayta munarqan.

³⁸Pablotaq ichaqa mana pusayta munarqanchu, Panfilia hap'iymantapacha paykunamanta t'aqakuspa llank'ayninkupi mana puriysisqanmanta.

³⁹Paykunaqa sinchita churanakuspankun t'aqanakurqanku, chaymi Bernabeqa Marcosta pusarikuspa Chipre islata barcopi ripurqan.

⁴⁰Pablotaq Silasta akllakurqan, hinan iñiqkunaqa khuyapayakuq Señorpa makinman hap'iykachirqanku, chaymi puririrqanku.

⁴¹Hinaspan iglesiakunata kallpachaspa Siria provincianta Cilicia provincianta purirqanku.