Read DIOSPA QHELQACHISQ Quechua HECHOS 19 Bible Online

HECHOS 19 - DIOSPA QHELQACHISQ Quechua bible

HECHOS 19

¹Apolos Corinto llaqtapi kashaqtinmi Pabloqa orqo-orqonta purispa Efeso llaqtaman chayarqan. Chaypi wakin iñiqkunawan tupaspa,

²paykunata nirqan: — ¿Iñispaykichisqa chaskirqankichischu Santo Espirituta? nispa. Paykunataq nirqanku: — Manapunin uyarillarqaykupaschu Santo Espirituq kasqantaqa, nispa.

³Chaymi Pabloqa nillarqantaq: — ¿Imayna bautismopitaq bautizachikurqankichis? nispa. Paykunataq nirqanku: — Juanpa yachachisqanman hinan bautizachikurqayku, nispanku.

⁴Pablotaq nirqan: — Juanqa yachachirqan huchata saqepuspa Diosman kutirikuspa bautizachikuytan. Juanqa runakunatapas nillarqantaqmi: “Qhepayta hamuq Señor Jesuspi iñiychis”, nispa.

⁵Chayta uyarispankutaq Señor Jesuspa sutinpi bautizasqa karqanku.

⁶Makinta paykunaman Pablo churaykuqtintaq Santo Espirituqa paykunaman uraykamurqan, hinan wak rimaykunapi rimarqanku profetizarqanku ima.

⁷Llapan qharikunataq chunka iskayniyoq hina karqan.

⁸Pabloqa judío runakunaq sinagoganman haykuspanmi kinsa killantin mana manchakuspa rimarqan, Diospa qhapaqsuyunmanta willaspa, paykunata iñichiyta munaspa.

⁹Wakintaq sonqonkuta rumiyaykachikuspa mana iñiyta munaspa askha runaq qayllanpi Jesucristopi iñiymanta mana allinta rimarqanku. Chaymi Pabloqa paykunamanta t'aqakuspa iñiqkunata wakman pusarqan, Tiranno sutiyoq runaq yachachinan wasipi sapa p'unchay yachachimunanpaq.

¹⁰Chay hinan karqan iskay watantin, chaymi Asia provinciapi llapan judío runakunapas mana judío runakunapas Señor Jesusmanta willakuyta uyarirqanku.

¹¹Diosqa Pablowanmi mana rikusqa milagrokunata ruwachirqan.

¹²Chaymi Pabloman tupaykuq pañuelokunatapas p'achakunatapas onqosqakunaman apaqtinku, onqoyniyoqkunaqa qhaliyarqanku, kaqllataq mana allin espiritukunapas lloqsirqanku.

¹³Wakin judío runakunan mana allin espiritukunata qarqospa hinantinta puriqku, paykunan runakunamanta mana allin espiritukunata qarqoyta munaspa Señor Jesuspa sutinta hoqarispa nirqanku: — Pabloq willakusqan Jesuspa sutinpin kamachiykichis: ¡Lloqsiychis paymanta! nispa.

¹⁴Judío runakunaq umalli sacerdote Escevaq qanchis churinkunan chaytaqa ruwaqku.

¹⁵Chayta niqtinkun chay mana allin espirituqa kutichirqan: — Jesustaqa reqsinin, Pablopas pichus kasqantaqa yachanin. Qankunari, ¿pitaq kankichis? nispa.

¹⁶Hinan mana allin espirituq hunt'aykusqan runaqa paykunaman phawaykuspa llapankuta maqaspa atiparqan, chaymi paykunaqa sinchi k'irisqa q'alallaña chay wasimanta ayqerqanku.

¹⁷Chayta yachaspanmi Efeso llaqtapi judío runakunapas mana judío runakunapas llapallanku anchatapuni mancharikurqanku. Ahinapin Señor Jesusta hatuncharqanku.

¹⁸Chaymi iñiqkunaqa askha hamurqanku manaraq iñiq kashaspa millay ruwasqankuta sut'ita willakuspa.

¹⁹Kaqllataq wakin iñiqkunapas layqakunanku libronkuta apamuspa llapankuq qayllanpi kanaykurqanku, paykunan ñawpaqqa layqa kasqaku. Chay kanasqa librokunaq precionmi karqan phisqa chunka waranqa jornal qolqe.

²⁰Ahinapin Señor Jesusmanta willakuyqa hinantinman mast'arikurqan, askhapunitaq iñirqankupas.

²¹Chaykuna qhepatan Pabloqa sonqonpi yuyaykurqan Macedonia provincianta Acaya provinciantawan purispaña Jerusalén llaqtaman rinanpaq: — Chaymantaqa Roma llaqtatapas risaqpunin, nispa.

²²Hinaspan yanapaqnin Timoteota Erastotawan Macedoniaman kacharqan, paytaq huk tiempota Asia provinciapi qhepakurqan.

²³Chay tiempopin sinchipuni ch'aqway karqan Jesucristopi iñiymanta.

²⁴Demetrio sutiyoq qolqe takaq runan Artemisa[7] diosa yupaychana wasiq rikch'aynin wasichakunata qolqemanta ruwaspa sinchitapuni ganaqku ruwaq-masinkunapiwan.

²⁵Chaymi Demetrioqa llank'aq-masinkunata chay oficiopi llank'aqkunatawan huñuykuspa nirqan: — Wiraqochaykuna, yachanchismi, kay llank'asqanchiswanmi allinta ganakushanchis.

²⁶Ichaqa rikushankichismi uyarishankichismi kay Pabloq rimasqanta. Paymi nin: Runaq ruwasqanqa manan dioschu, nispa. Chaytaqa manan Efeso llaqtallapichu nin, aswanpas yaqa Asia provinciantinpin askha runakunataña iñirqachispa pantachishan.

²⁷Chay hinaqa, llank'ananchismi qollupunman, Artemisa diosaq yupaychana wasinmi pisichasqa kanman, mentasqa kayninpas chinkapunmanmi. Yachanchis hinapas Artemisa diosataqa Asia provinciantinpipas, kay pachantinpipas llapallan yupaychanku, nispa.

²⁸Chaykunata uyarispataq paykunaqa k'arak phiñasqa qaparkacharqanku: — ¡Hatunmi Efeso llaqta runakunaq diosan Artemisaqa! nispanku.

²⁹Hinaqtinmi llaqtantin ch'aqwarqanku, hinaspan Pabloq puriqmasin Macedonia llaqtayoq Gayota Aristarcotawan hap'irqospa huñukunanku cheqasman huk-nisqalla aysarqanku.

³⁰Pablopas munarqanmi runakunaq kasqanman rispa rimapayayta, ichaqa iñiqkunan payta hark'arqanku.

³¹Asia provinciapi kamachikuq wakin amigonkunapas Pabloman kachallarqankutaq huñukunanku cheqasman ama rikhurinanpaq valekuspanku.

³²Chaykamataq huñukunanku cheqaspi hatun ch'aqway karqan, wakinmi hukta rimaspa qaparirqanku, wakintaq huk-hinata rimaspa qaparirqanku, yaqa llapantaq mana yacharqankuchu imaraykuchus huñunakusqankuta.

³³Hinan judío runakunaqa tanqaspalla Alejandrota runakunaq ñawpaqenman horqorqanku. Runakunaqa yuyarqankun Alejandroq rimaykuy munasqanta. Alejandrotaq upallanankupaq makinwan señascharqan defiendekunanpaq.

³⁴Judío runa kasqanta reqsispataq ichaqa, llapallanku huk kunkalla yaqa iskay horata hina qaparkacharqanku: — ¡Hatunmi Efeso llaqta runakunaq diosan Artemisaqa! nispanku.

³⁵Chay llaqtaq umalli qelqaqninmi runakunata upallachispaña nirqan: — Llaqtamasiykuna, llapa runan yachan Efeso llaqtaq hatun diosan Artemisaq yupaychana wasinta waqaychaq kasqanchista, hinallataq hanaq pachamanta uraykamuq rikch'ayninta waqaychaq kasqanchistapas.

³⁶Mana negay atina kashaqtinqa upallakunaykichismi, amataq imatapas hawan-ukhuntaqa ruwaychischu.

³⁷Kay runakunataqa apamunkichis manan yupaychana wasita suwakusqanmantachu, manallataq diosaykichis contra rimasqanmantachu.

³⁸Chay hinaqa, Demetrioqchus llank'aq-masinkunapiwan pitapas quejakunan kan chayqa, kanmi juezkunapas llaqta kamachiqkunapas, chaypi sapankanku quejanakuchunku.

³⁹Imatawanpas quejakunkichis chayqa, juzgana huñunakuypin sut'inchasqa kanqa.

⁴⁰Kunan p'unchay ch'aqwaymantaqa paqtan Roma suyu soldadokuna huchachawasunman, kay huñunakuymanta tupapakunanchispaq mana imapas kaqtin, nispa.

⁴¹Chayta nispataq llapa runata wasinkuman kachapurqan.