Read DIOSPA QHELQACHISQ Quechua HECHOS 28 Bible Online

HECHOS 28 - DIOSPA QHELQACHISQ Quechua bible

HECHOS 28

¹Hallp'a pataman lloqsispaykuñan yacharqayku chay islaqa “Malta” nisqa kasqanta.

²Chaypi tiyaqkunataq khuyapayawaspanku sumaqta rikuwarqanku. Chaymi para chayaqtin chirisqanrayku ninata hap'ichispa q'oñikunaykupaq llapaykuta pusaykuwarqanku.

³Pablo llant'ata pallamuspa ninaman churaykuqtin, picaq mach'aqway nina rawraymanta ayqespa, makinman wank'irqokurqan.

⁴Hinan chay islapi tiyaqkunaqa picakuq mach'aqwayta makinpi wank'isqata rikuspa ninakurqanku: — Kay runaqa runa wañuchiqpunin kanman, chaymi lamar-qochamantaña qespikun chaypas, “Chanin-Kay” nisqa diosaqa mana munanchu kawsananta, nispanku.

⁵Ichaqa Pablon makinman wank'ikuq mach'aqwayta ninaman chhaphchiykurqan, manataq imanasqallapaschu karqan.

⁶Paykunataq Pablota qhawasharqanku: — Kunallanmi punkirinqachus wañusqachus wikch'ukunqapas, nispa. Unayta suyashaqtinku mana imapas kaqtintaq, huk-hinataña yuyaykuspa nirqanku: — Kay runaqa huk diosmi kanman, nispa.

⁷Maypichus kasharqayku chay qayllapi hallp'aqa islapi umalli runa Publio sutiyoqpa hallp'anmi karqan, paymi wasinpi sumaqta chaskiykuwaspanku kinsa p'unchay qorpachawarqanku.

⁸Chaypachan Publioq taytanqa fiebre onqoywan disenteriapiwan onqosqa puñunapi kasharqan, paymanmi Pabloqa watuykukuq haykurqan, hinaspan Diosmanta mañakuspaña makinta churaykuspa qhaliyachirqan.

⁹Chayta yacharqospan islapi tiyaq wakin onqoyniyoqkunapas hamurqanku. Hinan qhaliyachisqa karqanku.

¹⁰Chaymi paykunaqa askha regalokunata qoykuwarqanku, hinaspan puririshaqtiyku tukuy imaymanata barcoman churaykapuwarqanku.

¹¹Chay islapi kinsa killa kasqaykumantañan Alejandría llaqtamanta hamuq barcopi ripurqayku. Chay barcoqa paray tiempo pasanankaman chaypi kasharqan. Barcoq ñawpaqenpitaq “Mellizo” nisqa diosninkuq rikch'ayninkuna llaqllasqa karqan.

¹²Siracusa llaqtaman chayaspataq, chaypi kinsa p'unchayta qheparqayku.

¹³Chaymanta qocha cantonta muyurimuspa, Regio llaqtaman chayarqayku. Qhepantin p'unchay uray wayra wayramuqtintaq iskay p'unchaymanta Puteoli llaqtaman chayarqayku.

¹⁴Chaypi wawqe-panakunawan tupaqtiykutaq valekuwarqanku qanchis p'unchayta paykunawan qhepakunaykupaq. Chaymantataq Roma llaqtaman rirqayku.

¹⁵Roma llaqtapi tiyaq iñiqkunaqa ñoqaykumanta uyarispankun Apio Foro llaqtakama aypamuwarqanku, wakintaq “Kinsa Tambo” nisqakama. Pablotaq paykunata rikuspa Diosman graciasta qorqan, hinaspan kallpachakurqan.

¹⁶Roma llaqtaman chayaqtiykutaq, kamachikuqkunaqa Pablota, pay cuidaq soldadotawan sapaqpi tiyananpaq saqellarqanku.

¹⁷Kinsa p'unchaymantataq Pabloqa judío umalli runakunata waqyachimurqan. Huñukamuqtinkutaq paykunata nirqan: — Wawqeykuna, ñoqaqa manan imatapas llaqtanchis contrapas, ñawpa taytanchiskunaq costumbren contrapas ruwarqanichu. Chaywanpas Jerusalén llaqtapin llaqta-masinchiskuna Roma suyu kamachikuqkunaman presota hap'ichiwarqanku.

¹⁸Chaymi kamachikuqkunaqa allinta tapuwaspaña ñoqapi mana ima huchachaypas wañunaypaq hina kaqtin kacharipuyta munawarqanku.

¹⁹Ichaqa judío runakuna ñoqa contra rimaqtinkun Roma rey Cesarpa juzgawanantapuni mañakurqani, chaywanpas manan imamantapas llaqta-masinchiskunata huchachanaypaqchu.

²⁰Chayraykun waqyachimurqaykichis qankunawan tupaykuspa rimanaypaq. Israel suyuq suyakuyninraykun kay cadenawan watasqa kashani, nispa.

²¹Chaymi paykunaqa nirqanku: — Ñoqaykuqa manan ima cartatapas Judea hap'iymantaqa contraykipi chaskiykuchu, manataqmi mayqen judiomasinchis hamuqpas qanmantaqa imatapas mana allintaqa willakunchu, manan rimarillankupaschu.

²²Chaywanpas imatachus yuyaykusqaykitan uyariyta munayku. Yachaykun chay t'aqa contra hinantinpi rimasqankuta, nispa.

²³Chaymanta rimanankupaqmi huk p'unchayta akllarqanku, chaymi Pabloq chayakusqan wasiman aswan askha hamurqanku. Paykunamanmi p'unchay-ch'isiyaqta yachachirqan Diospa qhapaqsuyunmanta willaspa. Chay hinatan Moisespa kamachikuy siminta profetakunaq qelqasqanta sut'inchaspa, Jesuspi iñichiytapuni munarqan.

²⁴Hinaqtinmi wakinqa Pabloq nisqankunata allinpaq hap'irqanku, wakintaq ichaqa mana creerqankuchu.

²⁵Chaymi paykunapura yuyayta mana tupachispa ripushaqtinku Pabloqa nirqan: — Allintan Santo Espirituqa profeta Isaiaswan ñawpa taytanchiskunaman nirqan:

²⁶“Phaway kay runakunata nimuy: Anchataña uyarishaspapas manan entiendenkichischu, allintaña qhawashaspapas manan reparankichischu.

²⁷Kay runakunaq sonqonqa rumiyasqan, ninrinkupas roqt'uyasqan, ñawinkupas ñawsayasqan, ñawinkuwan mana rikunankupaq, ninrinkuwan mana uyarinankupaq, sonqonkuwan mana entiendenankupaq. Ahinapin ñoqaman mana kutirikamuwanqakuchu, manataq qhaliyachisqapaschu kanqaku”, nispa.

²⁸Chay hinaqa, yachaychis, kunanmantaqa Diospa qespichiyninqa mana judío runakunamanmi willasqa kanqa, paykunan ichaqa uyarinqaku, nispa. [

²⁹Chayta niqtintaq judío runakunaqa lloqsirqanku, paykunapura manchayta churanakuspa].[11]

³⁰Pabloqa arriendakusqan wasipin iskay watantin tiyarqan, chaypin chaskirqan llapan payta watukamuqkunata.

³¹Pabloqa mana manchakuspan Diospa qhapaqsuyunmanta willarqan, Señor Jesucristomantapas yachachirqan, manataq pipas paytaqa hark'arqanchu.