Read DIOSPA QHELQACHISQ Quechua HECHOS 6 Bible Online

HECHOS 6 - DIOSPA QHELQACHISQ Quechua bible

HECHOS 6

¹Chay p'unchaykunapin Jesuspi iñiqkunaqa askhayarqanku. Griego rimaq judío runakunan hebreo rimaq judío runakuna contra rimarqanku viudankuman sapa p'unchay yanapay rakiypi mana allintachu qosqankumanta.

²Hinaqtinmi chunka iskayniyoq apostolkunaqa lliw iñiqkunata huñuykuspa nirqanku: — Ñoqaykupaqqa manan chaninchu Diospa simin yachachiyta saqespa yanapay rakiypi llank'anaykuqa.

³Wawqe-panaykuna, qankuna ukhumanta qanchis qharikunata akllaychis, Santo Espirituwan hunt'a kaqkunata, yachayniyoqta, allin kawsaqta, hinaspa paykunata kay ruwaypi churananchispaq.

⁴Ahinapin ñoqaykuqa Diosmanta mañakuspallaña simintapas willaspallaña kasaqku, nispa.

⁵Llapankutaq chay nisqata allinpaq hap'irqanku, hinaspan Estebanta akllarqanku. Paymi allin iñiyniyoq Santo Espirituwan hunt'a karqan. Akllallarqankutaq: Felipeta, Procorota, Nicanorta, Timonta, Parmenasta, Antioquía llaqtamanta judío t'aqaman t'ikrakuq Nicolastawan.

⁶Paykunatan apostolkunaq qayllanman sayaykachirqanku, apostolkunataq Diosmanta mañakuspa paykuna pataman makinkuta churaykurqanku.

⁷Ahinapin Diospa siminmanta willakuyqa hinantinman chayaq, Jesuspi iñiqkunapas Jerusalén llaqtapi aswan-aswanta askhayarqan. Sacerdotekunapas askhan Jesuspi iñirqanku.

⁸Estebantaqa Diosmi saminchaykurqan atiyninwanpas hunt'aykurqan, chaymi payqa musphana milagrokunata runakuna ukhupi ruwarqan.

⁹Jerusalén llaqtapin karqan “Kacharisqakunaq” nisqa sinagogan, chaypin huñukuqku Cirene llaqtamanta, Alejandría llaqtamanta, Cilicia provinciamanta, Asia provinciamantawan judío runakuna. Paykunan Esteban contra hatarispa churanakurqanku.

¹⁰Ichaqa manan atipayta atirqankuchu allin yachaywan Santo Espirituq yanapayninwan Estebanpa rimasqanta.

¹¹Chaymi hukkunaman pagarqanku: Moisespa contranpi, Diospa contrapiwan mana allin simikuna rimaqtan uyariyku, nispa llullakunankupaq.

¹²Chay hinatan llaqta runakunata, kurak umalli runakunata, kamachikuy simita yachachiqkunatawan ch'aqwanankupaq tanqarqanku. Estebanman phawaykuspataq hap'irqospa umalli runakunaq huñunakuyninman aysarqanku.

¹³Chaypin llulla testigokunaqa nirqanku: — Kay runan Dios yupaychana ch'uya wasi contrata, kamachikuy simi contratawan millaykunata rimashallanpuni.

¹⁴Uyariykun: Chay Nazaret llaqtayoq Jesusmi Dios yupaychana wasita thuninqa, Moisespa qowasqanchis yachasqa ruwaykunatapas hukman t'ikranqa, niqta nispa.

¹⁵Hinaqtinmi umalli runakunaq huñunakuyninpi llapa tiyashaqkunaqa Estebanta allinta qhawaykuspa uyanta angelpa uyanta hina rikurqanku.