Read DIOSPA QHELQACHISQ Quechua HECHOS 8 Bible Online

HECHOS 8 - DIOSPA QHELQACHISQ Quechua bible

HECHOS 8

¹Sauloqa Estebanta wañuchisqankutan allinpaq hap'irqan. Chay p'unchaymantapachan Jerusalén llaqtapi iglesiata sinchita qatiykachayta qallarirqanku. Chaymi llapanku Judea provinciantinman Samaria provinciantinman ch'eqechisqa karqanku, apostolkunallan kaqpi qhepakurqanku.

²Estebantataq Dios sonqo qharikuna wantuspa p'ampapurqanku, hinaspan paymanta mayta waqarqanku.

³Saulotaq iglesiata ch'inyachinanpaq, wasin-wasinta haykuspa, qharikunatapas warmikunatapas aysaspa carcelman churachirqan.

⁴Jerusalén llaqtamanta ch'eqechisqa iñiqkunan ichaqa hinantinta purirqanku Jesucristomanta allin willakuykunata willaspa.

⁵Felipetaq Samariapi huk llaqtaman uraykuspa paykunaman Cristomanta willarqan.

⁶Hinan runakunaqa Felipeta uyarispanku musphana milagrokuna ruwasqanta rikuspanku makilla tukuy sonqo uyarirqanku.

⁷Askha runakunata ñak'arichiq mana allin espiritukunan, paykunamanta sinchita qaparispa lloqsirqanku. Askha such'ukunapas wist'ukunapas qhaliyachisqan karqanku.

⁸Hinan chay llaqtapi anchata q'ochukurqanku.

⁹Chay llaqtapin huk qhari Simón sutiyoq karqan. Paymi ñawpamantaña layqa karqan. Layqakuyninkunawanmi Samaria llaqta runakunata musphachirqan: — Ñoqaqa atiyniyoq runan kani, nispa.

¹⁰Paytan llapa runa huch'uypas hatunpas maki uyariqku: — Kaymá Diospa hatun atiyninqa, nispanku.

¹¹Makillan paytaqa uyariqku, unaytaña layqakuyninkunawan paykunata musphachisqanrayku.

¹²Ichaqa Diospa qhapaqsuyunmanta allin willakuykunata Jesucristoq sutinmantawan Felipe willaqtinmi, runakunaqa iñispanku qharikunapas warmikunapas bautizachikurqanku.

¹³Kikin Simonpas iñillarqantaqmi, bautizachikuspataq Felipewan kuska kasharqan. Ancha musphana milagrokunatawan ruwasqanta rikuspataq Simonqa muspharqan.

¹⁴Jerusalén llaqtapi kaq apostolkunan Samaria runakunaq Diospa siminta chaskisqanta uyarispanku, paykunaman Pedrota Juantawan kacharqanku.

¹⁵Paykunan Samariaman chayaspa, iñiqkunapaq Diosmanta mañapurqanku Santo Espirituta chaskinankupaq.

¹⁶Manaraqmi mayqenninkumanpas Santo Espirituqa uraykamusqachu, Señor Jesuspa sutillanpiraqmi bautizasqa kasqaku.

¹⁷Chaymi Pedrowan Juanwan makinkuta paykuna pataman churaqtinku, Santo Espirituta chaskirqanku.

¹⁸Simontaq apostolkunaq makinku churasqanwan Santo Espirituta chaskiqta rikuspa, paykunaman qolqeta haywarqan:

¹⁹— Ñoqamanpas kay atiyta qoykuwaychis, pimanpas makiyta churaykuqtiy Santo Espirituta chaskinanpaq, nispa.

²⁰Hinaqtinmi Pedroqa payta nirqan: — ¡Qolqeykiqa supay wasimanmi q'epiykusunki, Diospa atiy qokuyninta qolqewan rantiyta yuyasqaykirayku!

²¹Kay atiyqa manan qanpaqchu, manan tupasunkipaschu, Diospa qayllanpi sonqoyki mana chanin kasqanrayku.

²²Kay mana allin yuyaykusqaykimanta Diosman kutirikuy, hinaspa Diosta rogakuy, ichapas sonqoykipi mana chanin yuyaykusqayki pampachasqa kanman.

²³Rikushaykin envidiosollaña kaspa huchaq watasqan kasqaykita, nispa.

²⁴Chaymi Simonqa nirqan: — Qankuna Señormanta mañaykapuwaychis, nisqaykichiskuna ama imapas chayamuwananpaq, nispa.

²⁵Pedrowan Juanwanmi Jesucristomanta willakuspankuña, Diospa simintapas yachachispankuña, Samaria runakunaq askha huch'uy llaqtankunapipas Jesucristomanta allin willakuykunata willaspanku Jerusalén llaqtaman kutipurqanku.

²⁶Señor Diospa angelninmi Felipeta nirqan: — Sayarispayki uray ladoman riy, Jerusalén llaqtamanta Gaza llaqtaman uraykuna ch'inneq ñanninta, nispa.

²⁷Chaymi Felipeqa rirqan. Rishaspataq Etiopía suyupi kamachikuq eunuco qhariwan tuparqan. Paymi karqan Etiopía suyupi reina Candaceq tesoreron umalli runa.

²⁸Paymi Jerusalén llaqtaman yupaychaq risqanmanta carretanpi tiyaykuspa kutipusharqan profeta Isaiaspa qelqasqanta leespa.

²⁹Santo Espiritun Felipeta nirqan: — Chay carretaman qayllaykuy, nispa.

³⁰Hinan Felipeqa qayllaykuspa profeta Isaiaspa qelqan leesqanta uyarirqan, chaymi nirqan: — ¿Entiendenkichu leesqaykita? nispa.

³¹Paytaq nirqan: — ¿Imaynatan entiendeyman mana pipas yachachishawaqtin? nispa. Hinaspan Felipeta valekurqan carretaman wichaspa paywan kuska tiyaykunanpaq.

³²Diospa Simin Qelqa leesqan cheqasmi kay hinata nirqan: “Wañuchinapaqmi oveja hina apasqa karqan, millman rutuqninpa qayllanpi upallakuq Cordero hinan paypas mana rimarirqanchu.

³³Huch'uyyaykukuqtinpas, manan chaninchayta ruwapurqankuchu, paytaqa kay pachapi wañuchirqankun, mirayninmantaqa ¿pitaq willakunman?” nispa.

³⁴Chaymi kamachikuq eunuco runaqa Felipeta nirqan: — Ama hinachu kay, willaykuway, ¿pimantan profetaqa kayta nin? ¿Pay kikinmantachu? Icha, ¿hukmantachu? nispa.

³⁵Hinaqtinmi Felipeqa chay qelqamantapacha qallarispa Jesusmanta allin willakuykunata payman willarqan.

³⁶Ñanta rishaspataq unuq kasqanman chayarqanku, hinan kamachikuq eunuco runaqa nirqan: — Kaypin unu kashan, ¿manachu bautizasqa kayta atiyman? nispa. [

³⁷Chaymi Felipeqa nirqan: — Tukuy sonqochus Jesuspi iñinki chayqa atinkin, nispa. Hinan nirqan: — Arí, iñinin Jesucristoqa Diospa Churin kasqanta, nispa.][1]

³⁸Kamachikuq eunuco runataq carretanta sayachinanpaq kamachirqan, hinaspa iskayninku unuman uraykurqanku, chaypin Felipeqa payta bautizarqan.

³⁹Unumanta lloqsimuqtinku hinataq, Señor Diospa Espiritunqa Felipeta aparikapurqan, chaymi kamachikuq eunuco runaqa manaña payta rikurqanchu, chaywanpas ancha kusisqan ripurqan.

⁴⁰Felipetaq ichaqa Azoto llaqtapi rikhurirqan, hinaspan llapan llaqtakunapi Jesucristomanta allin willakuykunata willaspa purirqan Cesarea llaqtaman chayanankama.