Read DIOSPA QHELQACHISQ Quechua ROMANOS 16 Bible Online

ROMANOS 16 - DIOSPA QHELQACHISQ Quechua bible

ROMANOS 16

¹Cencrea llaqtapi kaq iglesiapi diaconisa pananchis Febeta allintapuni qhawarinaykichistan valekuykichis.

²Señorpa sutinpi payta chaskiykuychis iñiypi wawqe-panakuna imaynatachus ruwananta hina. Imata necesitaqtinpas yanapaykuychis, payqa askha iñiqkunatan yanaparqan, hinallataq ñoqa kikiytawanpas.

³Jesucristota serviypi llank'aysiwaqniy Priscata qosan Aquilatawan napaykapuwaychis.

⁴Paykunaqa ñoqaraykun yaqa wañurqankupas, chaymi maytapuni “gracias” nini, ichaqa manan ñoqallachu, aswanpas mana judío runakuna ukhupi kaq llapan iglesiakunapas “gracias” nillankutaqmi.

⁵Hinallataq paykunaq wasinkupi huñukuq iglesiatapas napaykapuwaychis. Ancha munakusqay Epenetotapas napaykapuwaychis, paymi Asia provinciapiqa ñawpaqta Cristopi iñirqan.

⁶Mariatapas napaykapuwaychis, paymi qankunapaq anchata llank'arqan.

⁷Llaqtamasiy Andronicotapas Juniastawan napaykapuwaychis, paykunaqa ñoqawan kuskan preso karqanku, paykunaqa ñoqamanta ñawpaq iñiqkunan karqanku, apostolkuna ukhupipas allin reqsisqan kanku.

⁸Señorpi munakusqay Ampliasta napaykapuwaychis.

⁹Jesucristota serviypi llank'aysiwaqninchis Urbanota, munasqay Estaquistawan napaykapuwaychis.

¹⁰Cristoq allinpaq hap'isqan Apelesta napaykapuwaychis, hinallataq Aristobuloq familiantapas.

¹¹Llaqtamasiy Herodionta napaykapuwaychis. Narcisoq wasinpi kaq iñiqkunata napaykapuwaychis.

¹²Señorpaq llank'aq pananchis Trifenata Trifosatawan napaykapuwaychis. Munasqay panay Persidata napaykapuwaychis, payqa sinchitan Señorpaq llank'arqan.

¹³Señorpaq allin llank'aq Rufota napaykapuwaychis, hinallataq mamantapas, payqa ñoqaqpas mamay hinan karqan.

¹⁴Kaqllataq Asincritota, Flegonteta, Hermesta, Patrobasta, Hermasta, paykunawan kashaq wawqe-panakunatawan napaykapuwaychis.

¹⁵Hinallataq Filologota, Juliata, Nereota, panantawan, Olimpasta, paykunawan llapan kashaq iñiqkunatawan napaykapuwaychis.

¹⁶Ch'uya much'aykuywan napaykunakuychis. Cristoq llapa iglesiankunan napaykamusunkichis.

¹⁷Wawqe-panaykuna, anchatan valekuykichis yachasqaykichis yachachikuy contra yachachiqkunamanta cuidakunaykichispaq, paykunan iñiqkunata t'aqanachin hinaspa iñiyninkupi misk'achin. Chayrayku paykunamantaqa karunchakuychis.

¹⁸Chay hina runakunaqa manan Señorninchis Jesucristotachu servinku, aswanpas paykunaqa wiksallankumantan afanakunku, hinaspa sumaq simikunawan luylupayaspa pisi yachayniyoqkunaq sonqonta suwanku.

¹⁹Qankunaq Diosta kasukusqaykichistaqa lliwmi yachanku, chaymi anchata kusikuni. Allin kaqpaqqa yachayniyoq kanaykichistan munani, mana allin kaqpaqtaq ichaqa ama.

²⁰Thak-kayta qoq Diosmi usqhaylla Satanasta atipaspa chaki sarunaykichisman churanqa. Señorninchis Jesucristo sumaqta saminchasunkichis.

²¹Llank'aqmasiy Timoteon napaykamusunkichis, hinallataq llaqtamasiy Luciopas, Jasonpas, Sosipaterpas napaykamusunkichis.

²²Pabloq qelqaqnin ñoqa Terciopas Señorpa sutinpi napaykamuykichis.

²³Ñoqata qorpachawaqniy Gayon napaykamusunkichis, paypa wasinpin iglesiaqa huñukun. Hinallataq llaqta tesorero Erastopas, wawqe Cuartopas napaykamusunkichis. [

²⁴Señorninchis Jesucristo llapaykichista sumaqta saminchasunkichis. Amén.][4]

²⁵Kunanqa, ¡yupaychasun Diosta! Paymi qankunata allinta takyachisunkichis, allin willakuyniykunaman hina, Jesucristoq yachachikuyninman hina. Chayqa tupanmi wiñay-wiñay tiempomantaña Diospa ch'inlla pakasqan yachayta sut'inchasqawan.

²⁶Chay pakasqa yachaymi kunanqa profetakunaq qelqasqankunawan ancha allin sut'inchasqa kapun, hinallataq wiñay Diospa kamachisqanman hina llapa suyukunaman willasqa kapun, paykunaq Diospi iñispa kasukunankupaq.

²⁷¡Pay sapallan yachayniyoq Diosta Jesucristoq ruwasqanrayku wiñay-wiñaypaq yupaychasun! Amén.