Read DIOSPA QHELQACHISQ Quechua ROMANOS 2 Bible Online

ROMANOS 2 - DIOSPA QHELQACHISQ Quechua bible

ROMANOS 2

¹Chayrayku, qanqa pipas kakuy, hukkunata huchachaspaykiqa qan kikiykitan huchachakunki, qanpas chay huchachasqayki runakuna hinallataqmi ruwashanki, chaymi manaña ima nispapas tupapakuyta atiwaqchu.

²Yachanchismi chay hina ruwaq runakunataqa cheqaq-kayman hinan Diosqa huchachanqa.

³Chay hina ruwaq runakunata huchachaq kashaspayki qanpas chay hinallatataq ruwashanki chayqa, ¿Diospa huchachayninmantaqa ayqekuyta yuyankichu?

⁴Icha, ¿pisichankichu Diospa mana tukukuq sumaq sonqo-kayninta, muchukuq sonqo-kayninta, pacienciantapas? ¿Manachu reparanki Diospa sumaq sonqo-kayninqa payman kutirichiqniyki kasqanta?

⁵Qanqa rumi sonqo kaspaykin Diosman mana kutirikuspayki ñak'ariy p'unchaypaq phiñakuyta qan kikiykipaq huñushanki, chaypachan Diosqa phiñakuspa chanintapuni huchachanqa,

⁶maychus ruwasqanman hinataqmi sapankamanpas pagapunqa.

⁷Wakinmi allinkaqllatapuni ruwaspa, hatunchayta, yupaychayta, mana wañuq-kaytawan munanku, chaykunamanmi Diosqa wiñay kawsayta qonqa.

⁸Wakintaq ichaqa paykunallapaq kawsaspa cheqaq-kayta mana kasuspa mana chaninta ruwashallanku, paykunamanmi Diosqa k'arak phiñakuyninta chayachinqa.

⁹Llapan mana chanin ruwaqkunapaqmi ñak'ariypas llakikuypas kanqa, ñawpaqtaqa judío runakunapaq, chaymantataq mana judío runakunapaqpas.

¹⁰Llapa allinkaq ruwaqkunatan ichaqa Dios qhapaqchanqa, hatunchanqa, thak-kaytapas qonqa, ñawpaqtaqa judío runakunaman chaymantataq mana judío runakunamanpas.

¹¹Diosqa manan mayqen runamanpas sayapakunchu.

¹²Moisespa kamachikusqan simita mana yachaspa huchallikuqkunaqa, mana chay kamachikuyta reqsispallan wañupunqaku. Moisespa kamachikusqan simita yachashaspa huchallikuqkunan ichaqa chay kamachikuy simiman hina huchachasqa kanqaku.

¹³Manan kamachikuy simita uyariqkunachu Diospa qayllanpiqa chaninchasqa kanku, aswanpas Diospa kamachikuy siminta hunt'aqkunallan chaninchasqa kanku.

¹⁴Mana judío runakunaqa Diospa kamachikuy siminta manan yachankuchu. Chaywanpas sonqonkuq yuyaychasqan kaspan Diospa kamachikuy siminta hunt'anku, chayta ruwaspan paykuna kikinkupaq kamachikuy simi kanku, manaña Diospa kamachikuy siminta yachanku chaypas.

¹⁵Kawsayninkupin rikuchinku kamachikuy simi sonqonkupi qelqasqa kasqanta. Kikinkuq conciencianmi chaytaqa willan, chaymi kikinkuq yuyayninkupuni paykunataqa “huchan” ninqapas, “manan huchachu” ninqapas.

¹⁶Chay hinaqa, Jesucristomanta allin willakuykunata willasqayman hinan Diosqa taripay p'unchaypi runakunaq sonqollankupi yuyaykusqankuta Jesucristowan huchachachinqa.

¹⁷Qanqa: Judío runan kani, nispaykin Moisespa kamachikuy siminman hap'ipakunki, Diosniykimantapas alabakunki,

¹⁸munaynintapas yachanki, kamachikuy simitaq yachachisunki imapas aswan allinkaqta akllakunaykipaq.

¹⁹Qanqa yuyankin ñawsakunata allin pusaq kasqaykita, laqhayaqpi kaqkunapaqtaq k'anchay kasqaykita,

²⁰mana yuyayniyoqkunata yuyaychaq kasqaykita, wawakunata yachachiq kasqaykita. Chay hinatan qanqa yuyaykunki Diospa kamachikuy siminpi llapa yachaytapas cheqaq-kaytapas tarisqaykirayku.

²¹Chhaynaqa, hukkunata qan yachachishaspaykiqa, ¿manachu qan kikiykita yachachikunki? “Manan suwakunachu” nishaspachu, ¿suwakushanki?

²²“Manan wasanchanachu” nishaspachu, ¿wasanchashanki? Idolokunata cheqnikushaspachu, ¿ídolo yupaychana wasimanta imatapas suwakushanki?

²³Diospa kamachikuy siminman hap'ipakushaspachu, ¿kamachikuy simita p'akispa Diosta p'enqayman churanki?

²⁴Diospa Simin Qelqapin nin: “Qankuna hawan mana judío runakunaqa Diosta k'aminku”, nispa.

²⁵Kamachikuy simita hunt'aqtiykiqa allinmi qhari-kayniykipi señalasqa kayniykiqa, kamachikuy simita p'akiqtiykin ichaqa qhari-kayniykipi señalasqa kayqa mana imapaqpas valenchu.

²⁶Chayraykun qhari-kaynin mana señalasqa runa kamachikuy simita hunt'an chayqa, ¿manachu Diospa qayllanpiqa qhari-kaynin señalasqa runa hina kapunqa, manaña señalasqachu karqan chaypas?

²⁷Chhaynaqa, cuerponpi mana señalasqa kashaspa kamachikuy simita hunt'aqmi qanta huchachasunki, kamachikuy simita yachashaspa qhari-kayniykipas señalasqa kashaqtin mana kasukusqaykimanta.

²⁸Manan cheqaq judío runachu hawa sonqolla kaqqa, rikunallapaq qhari-kaynin señalachikuqpas manallataqmi cheqaq señalasqachu.

²⁹Aswanpas cheqaq judío runaqa tukuy sonqomanta kaqmi, señalasqa kayninpas Santo Espirituq ch'uyanchasqan sonqoyoq-kaymi, manan kamachikuy simiman hina ruwayllachu. Chay hina runataqa manan runachu alaban, aswanpas Diosmi alaban.