Read DIOSPA QHELQACHISQ Quechua ROMANOS 4 Bible Online

ROMANOS 4 - DIOSPA QHELQACHISQ Quechua bible

ROMANOS 4

¹¿Imanisunchistaq ñawpa taytanchis Abrahammanta? ¿Imatataq payqa tarirqan?

²Ruwasqankunawanchus Abraham chaninchasqa kanman karqan chayqa, atinmanmi alabakuyta, ichaqa manan Diospa qayllanpiqa.

³Diospa Simin Qelqan nin: “Abrahammi Diospi iñirqan, chaymi payqa chaninchasqa karqan”, nispa.

⁴Llank'aqpa pagonqa manan regalo hina qosqachu, aswanpas manumanta pagasqa hinan.

⁵Pipas llank'asqankunapi mana hap'ipakunchu, aswanpas huchasapata chaninchaq Diospi iñin chayqa, iñiynin hawan Diosqa chay runata chaninchapun.

⁶Chay hinatan Davidpas rimarqan mana ima ruwasqanraykulla Diospa chaninchasqan runaqa kusisamiyoq kasqanta. Paymi nirqan:

⁷“Kusisamiyoqmi mana chanin ruwasqankumanta pampachasqaña runakunaqa, kusisamiyoqmi huchankupas qonqasqaña runakunaqa,

⁸kusisamiyoqmi Diospa mana huchachasqan runaqa”, nispa.

⁹¿Chay kusisamiyoq kayqa qhari-kaynin señalasqa kaqkunallapaqchu? Icha, ¿mana señalasqa kaqkunapaqwanchu? Abrahammi iñisqanrayku Diospa chaninchasqan karqan ninchis chayqa,

¹⁰¿hayk'aqtaq chaninchasqari karqan? ¿Qhari-kaynin señalasqa kaqtinñachu? Icha, ¿manaraq señalasqa kashaqtinchu? Manan qhari-kaynin señalasqa kaqtinñachu, aswanpas manaraq señalasqa kashaqtinmi payqa chaninchasqaña karqan.

¹¹Abrahamqa manaraq señalasqa kashaspanmi Diospi iñisqanrayku chaninchasqa karqan, chayta sut'inchananpaqmi señalachikurqan sello hina kananpaq. Ahinapin Abrahamqa qhari-kaynin mana señalasqa kashaspa llapa iñiqkunaq taytan kapun, paykunatapas Diosmi chaninchan.

¹²Abrahamqa qhari-kaynin señalasqa runakunaqpas taytallantaqmi, paykunaqa manan señalasqallachu, aswanpas imaynan Abrahamqa manaraq qhari-kaynin señalasqa kashaspa iñirqan, chay hinata iñispan paykunapas kawsallankutaq.

¹³Diosmi kay pachata herenciata hina chaskinanpaq Abrahamman mirayninmanwan prometerqan, manan kamachikuy simita hunt'aspachu chaskirqan, aswanpas iñisqanraykun Diospa chaninchasqan kaspa chaskirqan.

¹⁴Kamachikuy simita hunt'aqkunallachus herencia chaskiq kanman chayqa, yanqapaqchá iñiypas Diospa prometesqanpas kanman.

¹⁵Kamachikuy simiqa Diospa phiñakuynintan runakunaman chayachin, kamachikuy simiq mana kasqanpin ichaqa kamachikuy simi p'akiypas mana kanchu.

¹⁶Chhaynaqa, iñiyraykun Diospa prometesqanqa qosqa karqan mana imaraykulla kananpaq, ahinapin Abrahampa llapa mirayninman prometesqaqa qaqata sayanqa. Diospa prometesqanqa manan kamachikuy simita kasuqkunallapaqchu, aswanpas Abraham hina llapa iñiqkunapaqwanmi. Paymi llapanchispa taytanchisqa.

¹⁷Diospa Simin Qelqan nin: “Askha suyukunaq taytan kanaykipaqmi churayki”, nispa. Chay hinapin payqa iñisqan Diospa qayllanpi llapanchispa taytanchis. Diosqa wañusqakunata kawsarichiqmi, mana kaqkunatapas rimarispalla paqarichiqmi.

¹⁸Abrahamqa manaña suyakunapaq hina kaqta iñispanmi suyakurqan. Ahinapin askha suyukunaq taytan kapurqan: “Sinchi askhan mirayniyki kanqa”, nispa Diospa nisqanman hina.

¹⁹Abrahamqa manan iñiyninpi pisiyarqanchu pachak watayoq hinaña kashaspapas, cuerponta wañusqata hina qhawashaspapas, warmin Saraq manaña wachakunanta yachashaspapas.

²⁰Diospa prometesqanpiqa manan iskayrayarqanchu, manallataq pisicharqanpaschu, aswanmi iñiypi kallpachakuspa Diosta yupaycharqan.

²¹Abrahamqa cheqaqllatañan hap'irqan, Diosqa prometesqanta hunt'ananpaq atiyniyoq kasqanta.

²²Chaymi Diospa Simin Qelqaqa nin: “Payqa chaninchasqan karqan”, nispa.

²³Chay “chaninchasqan karqan” niq simikunaqa manan Abrahamllapaqchu qelqasqa karqan,

²⁴aswanpas ñoqanchispaqwanmi qelqasqa karqan. Señorninchis Jesusta kawsarichimpuq Diospi iñiqtillanchismi Diosqa chaninpaq hap'iwanchis.

²⁵Jesusmi huchanchiskunarayku wañupuwarqanchis, hinaspan chaninchasqa kananchispaq kawsarimpurqan.