Read DIOSPA QHELQACHISQ Quechua ROMANOS 5 Bible Online

ROMANOS 5 - DIOSPA QHELQACHISQ Quechua bible

ROMANOS 5

¹Chhaynaqa, iñisqanchisrayku chaninchasqa kaspan Señorninchis Jesucristorayku Dioswan thak-kaypi kawsanchis.

²Paypi iñispallan Diospa sumaq chaskiykusqanqa kanchis. Chaypin qaqata sayashanchis, hinaspan kusikushanchis Diospa qhapaq k'anchayninpi kuska kananchista suyakuspa.

³Manan chayllachu, aswanpas ñak'ariykunapipas kusikullanchistaqmi. Yachanchismi ñak'ariykunaqa pacienciakunanchispaq kallpachawasqanchista.

⁴Pacienciakuspan allinpaq hap'isqa kanchis, allinpaq hap'isqa kaytaq suyakuyta yachachiwanchis.

⁵Suyakuyqa manan p'enqachiwanchischu, qowasqanchis Santo Espirituwan Diospa munakuynin sonqonchispi hunt'a kasqanrayku.

⁶Kikinchista qespikunanchispaq manapuni kallpayoq kashaqtinchismi Cristoqa tiemponpipuni wañurqan huchasapakunarayku.

⁷Huk chanin runaq rantinpi wañuyqa sinchi sasan, ichapaschá pillapas wañunman sumaq runaq rantinpiqa.

⁸Diosmi ichaqa munakuyninta rikuchiwanchis, huchasaparaq kashaqtinchis Cristoq wañupuwasqanchiswan.

⁹Chhaynaqa, Cristoq yawarninwanchus chaninchasqa kashanchis chayqa, astawanpunin payqa p'uchukay p'unchaypi Diospa phiñakuyninmanta qespichiwasunchis.

¹⁰Diospa awqan kashaqtinchistaq payqa Churinpa wañusqanwan sumaqta chaskiykapuwarqanchis chayqa, aswantaraqmi paywan allipunachisqaña kashaspanchisqa, kawsayninwan qespichisqa kasunchis.

¹¹Manan chayllachu, aswanpas Diospin kusikullanchistaq Señorninchis Jesucristo Dioswan allipunachiwasqanchismanta.

¹²Imaynan huk runallawan huchaqa kay pachapi qallarirqan, huchawantaq wañuypas rikhurirqan, chay hinallataqmi, wañuyqa llapa runaman chayarqan llapallan huchallikusqankurayku.

¹³Manaraq kamachikuy simi kashaqtinmi huchaqa kay pachapi kasharqanña, chaywanpas kamachikuy simi mana kaqtinqa manaraqmi runaqa huchachasqachu karqan.

¹⁴Wañuytaq ichaqa Adanpa[1] tiemponmanta Moisespa tiemponkama llapa runata munaychakurqan, manaña Adán hinachu kamachikuy simita p'akispa huchallikurqanku chaypas. Adanqa hamunan karqan chaypa rikch'aynillanmi karqan.

¹⁵Diospa qokuyninmi ichaqa mana Adanpa huchallikusqan hinachu karqan. Huk runaq huchallikusqan hawa askha runa wañurqan chayqa, sapallan Jesucristo runawan mana imaraykulla qespichiwaspanchisqa, astawanraqmi Diospa khuyapayakuyninqa askha runakunaq allinninpaq karqan.

¹⁶Diospa qokuyninqa manan chay huk runaq huchallikusqan hinachu karqan, ch'ulla huchallamantan Diosqa juzgaspa runakunata huchacharqan, ichaqa askha huchakunamantan Diosqa mana imaraykulla qospa runakunata chaninpaq hap'irqan.

¹⁷Ch'ulla runaq huchallikusqanraykuchus runakunata wañuy munaychakurqan chayqa, astawanraqmi Diospa mana imaraykulla chaninchasqan runakunaqa mosoq kawsaypi sapallan Jesucristoq ruwasqanrayku kamachikunqaku. Diosqa anchatapunin paykunata khuyapayarqan, qokuynintapas qorqan.

¹⁸Chhaynaqa, imaynan Adanpa huchallikusqanwan llapa runa huchachasqa karqanku, chay hinallataqmi Jesucristoq chanin ruwasqanwan llapa runa kawsanankupaq chaninchasqa karqanku.

¹⁹Imaynan ch'ulla runaq mana kasukusqan hawa, askha runa huchasapapaq hap'isqa kapurqanku, chay hinallataqmi ch'ulla runaq kasukusqan hawa askha runa chaninpaq hap'isqa kanqaku.

²⁰Kamachikuy simiqa churasqa karqan hucha astawan askhayananpaqmi, ichaqa hucha astawan rikhuriqtinmi, aswan hatunraq Diospa khuyapayakuyninqa karqan.

²¹Chaymi, imaynan huchaqa wañunapaq munaychakurqan, chay hinallataq Diospa khuyapayakuyninpas munaychakun. Ahinapin Diosqa runakunata chaninpaq hap'ispa wiñaypaq kawsachin Señorninchis Jesucristoq ruwasqanrayku.