Read DIOSPA QHELQACHISQ Quechua ROMANOS 7 Bible Online

ROMANOS 7 - DIOSPA QHELQACHISQ Quechua bible

ROMANOS 7

¹Kamachikuy simita yachaq wawqe-panaykuna, qankunaqa allintan yachankichis kamachikuy simiqa kawsanankamalla runata kamachisqanta.

²Casarasqa warmiqa qosan kawsanankamallan kamachikuy simiwan qosanman hukllachasqa kashan, qosan wañukapuqtinmi ichaqa chay hukllachaqnin kamachikuy simimanta kacharisqaña kapun.

³Chay hinaqa, huk warmichus qosan kawsashaqtin wak qhariyoq kanman chayqa, “wasanchaq warmi” nisqan kanqa. Qosan wañukapuqtinmi ichaqa chay kamachikuy simimantaqa kacharisqaña kapunqa, wak qosayoqña kanqa chaypas manan “wasanchaq warmi” nisqañachu kanqa.

⁴Ahinallataqmi qankunapas, wawqe-panaykuna, Cristoq cuerponwan hukllachasqa kaspa kamachikuy simipaq wañurqankichis, wak qosayoqña kapunaykichispaq. Wañusqanmanta kawsarimpuq Cristowan hukllachasqañan kashankichis allinta ruwaspa Diosllapaqña llank'ananchispaq.

⁵Sonqonchispa munasqallanman hina kawsashaqtinchisqa kamachikuy simin cuerponchista millaykunata ruwananpaq tanqarqan, chaytaqmi wañuyman aysawarqanchis.

⁶Kunanmi ichaqa, watawaqninchis kamachikuy simipaq wañuspa kamachikuy simimanta kacharichisqaña kapunchis, ahinapin Santo Espirituq yanapasqan mosoq kawsaypi Diosta servishanchis, manañan ñawpa qelqasqa kamachikuy simiman hinañachu servishanchis.

⁷Chay hinaqa, ¿imanisunchistaq? ¿Kamachikuy simiqa huchachu? ¡Manapunin imaynamantapas! Kamachikuy simi mana kaqtinqa manan hucha kasqanta yachaymanchu karqan. Manallataqmi yachaymanchu karqan imachus munapayay kasqantapas, manachus kamachikuy simi: “Aman runamasiykiq kaqninta munapayankichu”, nispa ninman karqan chayqa.

⁸Huchan ichaqa kamachikuy simita yuyarichiq tumpalla tukuy mana allin munapayayta sonqoypi rikch'arichirqan. Kamachikuy simi mana kaqtinqa huchaqa wañusqan.

⁹Ñawpaqmi ñoqaqa kamachikuy simita mana yachaspa kawsasharqani, kamachikuy simita yachaqtiymi ichaqa ñoqapi hucha kawsarirqan, hinan wañupurqani.

¹⁰Ahinapin tarirqani kawsanaypaq kaq kamachikuy simiqa wañuchiwaqniy kasqanta.

¹¹Huchaqa kamachikuy simita yuyarichiq tumpallan q'otuwarqan, chay kikin kamachikuy simiwanmi wañuchiwarqanpas.

¹²Chay hinaqa, kamachikuy simiqa ch'uyapunin, sapanka kamachisqa simiqa ch'uyan, chaninmi, allinmi.

¹³Chayri, ¿chay allinkaqchu ñoqaq wañunaypaq kapurqan? ¡Manapunin imaynamantapas! Aswanqa huchan wañuchiwarqan, huchapuni kasqanta rikuchikunanpaq. Chay kamachikuy simiman hap'ipakuspan ñoqata wañuchiwarqan. Ahinapin kamachikuy simiqa huchaq sinchi mana allinpuni kasqanta rikuchin.

¹⁴Yachanchismi Diospa kamachikuy siminqa espiritual kasqanta, ñoqan ichaqa aycha runalla kani, huchaq kamachin kanaypaq vendesqa.

¹⁵Manan entiendenichu imatachus ruwashasqaytaqa, imatachus munasqaytaqa manan ruwanichu, aswanpas mana munasqaytan ruwani.

¹⁶Mana munasqaytachus ruwani chayqa, kamachikuy simiq allin kasqantan “allinmi” nini.

¹⁷Chay hinaqa, manan ñoqañachu chay ruwaqqa kani, aswanpas ñoqapi kashaq huchan chaytaqa ruwan.

¹⁸Ñoqaqa yachanin sonqoypa munaynillanman hina kawsaqtiyqa, ñoqapi manapuni ima allinpas kasqanta. Allinkaq ruwaytaqa maytan munani, ruwaytan ichaqa mana atinichu.

¹⁹Allinkaq ruway munasqaytaqa manan ruwanichu, aswanpas cheqnisqay mana allinkaqtan ruwani.

²⁰Mana munasqayta ruwaspayqa manan ñoqañachu chay ruwaqqa kani, aswanpas ñoqapi kashaq huchan chaytaqa ruwan.

²¹Chay hinaqa, kaytan tarini: allinkaqta ruwayta munashaqtiy mana allinkaq ñoqapi kashasqanta.

²²Sonqoypiqa Diospa kamachikuy siminwanmi kusikuni.

²³Cuerpoypin ichaqa wak kamachikuq kasqanta reparakuni, chayqa huchan. Chay huchaqa munayniypa contranmi hatarin, hinaspan cuerpoypi kaq kamachikuqman hap'iykachiwan.

²⁴¡Ay, ñoqa runamanta! ¿Pitaq kay wañuyman aysaqniy cuerpomanta kacharichiwanqa?

²⁵Manan pipas, aswanqa Diosllapunin Señorninchis Jesucristowan kacharichiwan. Chaymantan Diosman graciasta qoni. Chay hinaqa, ñoqa kikiymi yuyayniywan Diospa kamachikuy siminta kasuni, aychaywantaqmi huchaq kamachikusqanta kasuni.