Read DIOSPA QHELQACHISQ Quechua ROMANOS 9 Bible Online

ROMANOS 9 - DIOSPA QHELQACHISQ Quechua bible

ROMANOS 9

¹Cristopi iñispaymi cheqaqta rimani, manan llullakunichu. Concienciaypas Santo Espirituq yuyaychasqanmi cheqaq rimashasqayta sut'itapuni willawan.

²Sinchi llakisqan kashani, sonqoypin waqashani.

³Ñoqa kikiymi munayman ñakasqa kayta, Cristomanta t'aqasqa kaytapas, llaqtamasiy judío runakunata yanapaykunayrayku.

⁴Paykunaqa Diospa adoptasqa wawankuna Israelpa mirayninmi kanku, paykunamanmi Diosqa qhapaq-atiyninta rikuchirqan, paykunawantaqmi Diosqa rimanakurqanpas, paykunamanmi qorqan kamachikuy simitapas, Diosta imayna yupaychaytapas yachachirqan, paykunan Diospa prometesqankunatapas chaskirqanku.

⁵Paykunan ñawpa taytanchiskunaq miraynin kanku, paykuna miraymantan Cristopas runa-kayninman hinaqa nacemurqan. Paymi lliwpa Qollanan Diosqa, ¡wiñay-wiñaypaq yupaychasqa kachun! Amén.

⁶Chayta nispaqa manan: Diosqa prometekusqankunata mana hunt'aqmi, nishanichu, aswanmi nishani ñawpa taytanchis Israelpa mirayninkunaqa manan llapanchu Diospa akllasqan kanku,

⁷manallataqmi Abrahampa miraynin kasqankuraykuchu llapankupas paypa wawanpuni kanku, nispa. Aswanpas Diosmi Abrahamta nirqan: “Isaac churiykimantan mirayniyki kanqa”, nispa.

⁸Chay hinaqa, aychaman hina naceqkunaqa manan Diospa wawankuna kayta atinchu, aswanpas Diospa prometesqanman hina naceqkunallan Abrahampa cheqaq wawankunaqa kanku.

⁹Kay hinatan Diosqa Abrahamman prometerqan: “Kunan hina tiempotan kutimusaq, warmiyki Sarataq qhari wawayoq kanqa”, nispa.

¹⁰Manataqmi chayllachu, Rebecaq iskaynin churinkunaqa ch'ulla taytallayoqmi karqan, paymi ñawpa taytanchis Isaacqa karqan.

¹¹Ichaqa wawakuna manaraq naceshaspa, allintapas mana allintapas manaraq ruwashaqtinkun, (Diospa yuyaykusqanman hina akllakusqanqa kashallanpuni, paymi runaq ruwasqanta mana qhawaspalla munasqanman hina waqyaspa pitapas akllakun)

¹²Rebecatan Diosqa nirqan: “Kurakkaqmi sullk'akaqta servinqa”, nispa.

¹³Qelqaqa nillantaqmi: “Jacobtan munakurqani, Esautataq cheqnikurqani”, nispa.

¹⁴Chay hinaqa, ¿imanisuntaq? ¿“Diosqa manan chaninchu” nisunchu? ¡Manapunin imaynamantapas!

¹⁵Diosmi Moisesta nirqan: “Pitachus khuyapayaytapas munani chaytan khuyapayasaq, pitachus llakipayaytapas munani chaytan llakipayasaq”, nispa.

¹⁶Chay hinaqa, Diosqa runakunataqa akllan khuyapayaspallanmi, manan runakuna munaqtinkuchu nitaq kallpachakuqtinkupaschu.

¹⁷Chaymi Qelqapi Diosqa Egipto reyta nin: “Qanpi atiyniyta rikuchinaypaqpunin reyta churarqayki, lliw runakunaman ñoqamanta kay pachantinpi willasqa kananpaq”, nispa.

¹⁸Chay hinaqa, pitachus khuyapayayta munan chaytan Diosqa khuyapayan, pitachus sonqonta rumiyachiyta munan chaytan rumiyachinpas.

¹⁹Niwankichispaschá: Chay hinaqa, ¿imanaqtintaq Diosqa runata huchachan? nispa. Chayri, ¿pitaq Diospa munaynin contra sayarinman?

²⁰¿Pitaq qanri kanki Dioswan churanakunaykipaq? T'uru mankaqa ruwaqninta ninmanchu: ¿Imanaqtinmi khaynata ruwawarqanki? nispa.

²¹Manka ruwaqqa atiyniyoqmi ima munasqanta t'urumanta ruwananpaq. Kikin t'urumantan ruwan hukta sumaq waqaychana mankata, huktataq sapa p'unchay apaykachana mankata.

²²Diosqa phiñakuynintapas atiynintapas reqsichiyta munaspan phiñakuyninwan muchuchinapaq kaq runakunata ancha pacienciawan hinallata qhawasharqan. ¿Imanisunmantaq chaymanta?

²³Kaqllataqmi Diosqa ancha sumaq-kayninta rikuchiyta munaspa ñoqanchistapas khuyapayawarqanchis. ¿Imanisunmantaq chaymanta? Ñawpaqmantañan wakichiwarqanchis payman rikch'akuq sumaqpuni kananchispaq.

²⁴Chay hinatan Diosqa waqyawarqanchis, wakinta judío runakunamanta wakintataq mana judío runakunamanta.

²⁵Profeta Oseaspa qelqasqanpipas ninmi: “Mana llaqtaytan llaqtaymi nisaq, mana munakusqaytan munakusqaymi” nisaq, nispa.

²⁶Nillantaqmi: “Qankunaqa manan llaqtaychu kankichis nisqa cheqaspin, kawsaq Diospa wawankuna nisqa kankichis”, nispa.

²⁷Isaiaspas Israel runakunamantaqa nirqanmi: “Israelpa miraynin lamar-qocha aqo hina askhaña kanqa chaypas, puchuqllanmi qespichisqa kanqa.

²⁸Señor Diosqa usqhayllan kay pachantinpi simintaqa hunt'anqapuni”, nispa.

²⁹Isaiasqa ñawpaqtapas nillarqantaqmi: “Tukuy-atiyniyoq Señor Dioschus mirayninchista mana puchuchinmanchu karqan chayqa, Sodoma llaqta hinan kasunman karqan, Gomorra llaqtamantaq rikch'akusunmanpas karqan”, nispa.

³⁰Chay hinaqa, ¿imanisuntaq? Kaytan nisunchis: Chaninchayta mana maskhaq mana judío runakunan Diospi iñispa chaninchasqa karqanku.

³¹Ichaqa Israel runakunan kamachikuy simita maskharqanku, chayta hunt'aspa Diospa chaninchasqan kanankupaq, manataqmi chaytaqa tarirqankuchu.

³²¿Imanaqtintaq mana tarirqankuchu? Mana iñiywan maskhasqankuraykun, aswanpas ruwaykunawan maskhasqankuraykun. Chaymi misk'ana rumi nisqapi misk'akurqanku.

³³Diospa Simin Qelqan nin: “Sionpin churani misk'ana rumita, Sionpin churani urmana qaqata, paypi iñiqqa manan p'enqaypichu kanqa”, nispa.