Read DIOSPA QHELQACHISQ Quechua 1 CORINTIOS 1 Bible Online

1 CORINTIOS 1 - DIOSPA QHELQACHISQ Quechua bible

1 CORINTIOS 1

¹Ñoqa Pablon Diospa munayninman hina waqyasqa kani Jesucristoq apostolnin kanaypaq. Wawqe Sostenespiwanmi

²Corinto llaqtapi Diospa iglesianman qelqamuykichis. Qankunatan Diosqa Jesucristowan hukllachasqa kaqtiykichis paypaq t'aqaspa ch'uyata kawsanaykichispaq waqyarqasunkichis. Payqa waqyallarqantaqmi hinantinpi Jesucristota yupaychaqkunatapas. Señor Jesusqa paykunaqpas ñoqanchispapas Señorninchismi.

³Dios Yayanchis Señorninchis Jesucristopiwan anchata khuyapayasunkichis, thak-kaynintapas qosunkichis.

⁴Qankunamantaqa Diosniymanmi graciasta qonipuni, Jesucristopi Diospa sumaqta saminchasqasuykichismanta.

⁵Cristowan hukllachasqa kaspaykichismi tukuy imaymanapi qhapaqyachisqa karqankichis, tukuy rimayniykichispipas tukuy yachayniykichispipas.

⁶Ahinapin Cristomanta willakuy qankuna ukhupi allin takyachisqa karqan.

⁷Chay hinapin Diospa atiy qokuyninkunaqa mana imapas pisisunkichischu, Señorninchis Jesucristoq rikhurimunanta makilla suyashanaykichiskama.

⁸Diosmi p'uchukaykama allinta takyachisunkichis, Señorninchis Jesucristoq kutimunan p'unchaypi mana imamantapas huchachasqa kanaykichispaq.

⁹Diosqa hunt'aqpunin, paymi waqyarqasunkichis Churin Señorninchis Jesucristowan hukllachasqa kawsanaykichispaq.

¹⁰Wawqe-panaykuna, Señorninchis Jesucristoq sutinpin valekuykichis, llapallaykichis ch'ulla yuyaylla kanaykichispaq. Ama qankunapura t'aqanakuychischu, aswanpas huk-nisqalla, huk yuyaynillayoq, huk sonqollayoq kawsaychis.

¹¹Wawqe-panaykuna, chaytaqa nini qankuna ukhupi churanakuykuna kasqanta Cloepa familian willawaqtinmi.

¹²Wakinsi rimankichis: Ñoqaqa Pabloq t'aqanmi kani, nispa. Wakintaq: Ñoqaqa Apolospa t'aqanmi kani, nispa. Wakintaq: Ñoqaqa Pedroq t'aqanmi kani, nispa. Wakintaq: Ñoqaqa Cristoq t'aqanmi kani, nispa.

¹³¿Cristoqa t'aqasqachu kashan? ¿Pablochu qankunarayku chakatasqa karqan? Icha, ¿Pabloq sutinpichu bautizasqa karqankichis?

¹⁴Diosmanmi graciasta qoni mana mayqenniykichistapas bautizasqaymanta. Aswanpas Crispota Gayollatawanmi bautizarqani.

¹⁵Chay hinaqa, manan pipas: Ñoqaqa Pabloq sutinpi bautizasqan kani, ninmanchu.

¹⁶Bautizallarqanitaqmi Estefanasta familiantapas, chaymantaqa manan pitapas bautizasqayta yuyanichu.

¹⁷Cristoqa manan bautizaqtachu kachamuwarqan, aswanpas allin willakuykunata willanaypaqmi, ichaqa manan yachaysapa simikunawan rimanaypaqchu, Cristoq cruzpi wañusqan ama yanqayachisqa kananpaq.

¹⁸Chinkayman riqkunapaqqa mana yuyayniyoq-kaymi Cristoq cruzpi wañusqanmanta willakuyqa, ñoqanchis qespichisqakunapaqmi ichaqa chay willakuyqa Diospa atiynin.

¹⁹Diospa Simin Qelqan nin: “Yachaysapakunaq yachaynintan yanqayachisaq, yuyaysapakunaq yuyaynintan waqllichisaq”, nispa.

²⁰¿Maytaq chay yachaysapari? ¿Maytaq chay yachachiqri? ¿Maytaq kay pacha kaqkunamanta tapunakuqpas? Diosmi kay pacha yachaytaqa mana yuyayniyoq kayman t'ikrarqan.

²¹Diosqa yachayniyoq kaspan runakunaq kikinkuq yachayninkuwan payta reqsinankuta hark'arqan, aswanmi yuyaykurqan willasqayku allin willakuykunapi iñiqkunata qespichiyta, kay pacha runakunapaq mana yuyayniyoq-kayman rikch'akun chay willakuy chaypas.

²²Judío runakunaqa milagrokunatan mañakunku, Grecia runakunataq yachayta maskhanku.

²³Ñoqanchismi ichaqa chakatasqa Cristomanta willakunchis, chay willakuymi judío runakunapaqqa misk'ana, mana judío runakunapaqtaq mana yuyayniyoq-kay.

²⁴Diospa waqyasqankunapaqmi ichaqa judío runaña mana judío runaña kaqtinpas Cristoqa Diospa atiynin, Diospa yachaynin.

²⁵Diospa ruwasqantan runakunaqa “mana yuyayniyoqmi, mana kallpayoqmi” ninku, ichaqa chay mana yuyayniyoq-kaymi runakunaq yachayninmantaqa aswan yachaysapa, chay mana kallpayoq-kaypas runakunaq kallpanmantaqa aswan kallpasapa.

²⁶Wawqe-panaykuna, yuyariychis imayna kashaqtachus Diospa waqyasqasuykichista. Runaq yuyaykusqanman hinaqa pisillan qankunamantaqa yachayniyoqkunapas, allin reqsisqakunapas, allichachaq runakunapas karqankichis.

²⁷Aswanmi Diosqa akllarqan kay pacha runakunaq pisichasqan runakunata, yachaysapa runakunata p'enqachinanpaq, kay pachapi pisi kallpapaq qhawasqa runakunata akllarqan, kallpasapa runakunata p'enqachinanpaq.

²⁸Diosqa kay pachapi wakchapaq qhawasqa runakunata, pisichasqa runakunata, mana imapaq serviq runakunatawanmi akllarqan, runaq allinpaq hap'isqan runakunata mana valeqman tukuchinanpaq.

²⁹Ahinapi Diospa ñawpaqenpi ama pipas hatunchakunanpaq.

³⁰Qankunataqa kikin Diosmi Cristo Jesustawan hukllacharqasunkichis, hinaspan payqa Cristota churapuwanchis yachayninchis kananpaq. Cristoraykun Diospa chaninchasqan, ch'uyanchasqan, huchamanta kacharichisqan kanchis.

³¹Chay hinaqa, Diospa Simin Qelqaq nisqanman hinapas: “Hatunchakuyta munaqqa Señor Diospa ruwasqanwan hatunchakuchun”.