Read DIOSPA QHELQACHISQ Quechua 1 CORINTIOS 13 Bible Online

1 CORINTIOS 13 - DIOSPA QHELQACHISQ Quechua bible

1 CORINTIOS 13

¹Ñoqa rimayman runakunaq rimayninkunata, angelkunaq rimayninkunatapas, manataq munakuyniy kanmanchu chayqa, chanlán niq fierro hina otaq chin-chin niq platillo hinallan kayman.

²Profetizaytapas atiyman, tukuy pakasqa yachaykunatapas yachayman, tukuy imaymanatapas yachayman, iñiyniypas ancha hatun kanman orqokunata wak cheqasman astachinaykamaraq, ichaqa manataq munakuyniy kanmanchu chayqa, manan imapaschu kayman.

³Tukuy kaqniykunata wakchakunaman rakiyman, cuerpoytapas ruphachinapaq hap'iykachikuyman, manataq munakuyniy kanmanchu chayqa, manan imapaqpas serviymanchu.

⁴Pipas munakuqqa muchukuqllan, sumaq sonqollan, munakuqqa manan envidiakunchu, manan k'ankaykachanchu, manan hatunchakunchu,

⁵manan mana ruwanakunatachu ruwan, manan payllapaq kanantachu munan, manan phiñakunpachachu, manan sientepakunchu,

⁶manan mana chanin kaqmantachu kusikun, aswanpas cheqaqkaqmantan kusikun.

⁷Munakuqqa tukuy imatan muchun, tukuy imatan creen, tukuy imatan suyakun, tukuy imapin pacienciakun.

⁸Munakuyqa wiñaypaqmi. Profetizaykunan ichaqa tukukapunqa, mana yachasqa simi rimaykunapas manan kanqañachu, yachaypas tukukapunqan.

⁹Wakillantan yachanchis, wakillantan profetizanchispas.

¹⁰Hunt'asqataña yachaqtinchismi ichaqa, chay wakillan yachasqanchis tukukapunqa.

¹¹Huch'uyllaraq kashaspayqa wawa hinan rimarqani, yuyaykurqani, unancharqanipas. Takyasqa runaña kaspaymi ichaqa, wawa hina kasqaytaqa saqerqani.

¹²Kunanqa espejopi hina ayphallataraqmi rikushanchis, chay p'unchay chayamuqtinmi ichaqa sut'ita uya-uyapura rikusunchis. Kunanqa wakillantaraqmi yachani, chay p'unchay chayamuqtinmi ichaqa hunt'asqatapuni yachasaq, imaynan ñoqata reqsiwanku hinata.

¹³Chay hinaqa, kashallanpunin iñiypas, suyakuypas, munakuypas, ichaqa chaykunamanta aswan chaniyoqqa munakuymi.