Read DIOSPA QHELQACHISQ Quechua 1 CORINTIOS 16 Bible Online

1 CORINTIOS 16 - DIOSPA QHELQACHISQ Quechua bible

1 CORINTIOS 16

¹Iñiqkunata yanapanapaq ofrendamantan tapukamuwarqankichis. Imaynan Galacia provinciapi iglesiakunata kamachirqani chay hinata ruwaychis.

²Sapa semana qallariy p'unchaypi sapankaykichis qolqeta t'aqaychis, imaynatachus tarisqaykichisman hina, hinaspa chayta wasiykichispi waqaychankichis, ahinapi ñoqa chayamuqtiy qolqeta mana huñushanaykichispaq.

³Mayqenkunachus chaypaq hina kaqkunatataq akllankichis. Chayamuspaymi paykunata cartantinta Jerusalén llaqtaman kachasaq, yanapay qosqaykichis ofrendata apanankupaq.

⁴Ñoqa rinay kaqtinpas ñoqawanmi paykunaqa rinqaku.

⁵Hamuspayqa Macedonia hap'iynintan hamusaq, ahinaqa chayamusqaykichismi Macedonianta purisqay qhepata.

⁶Yaqapaschá qankunawan qheparikusaq, ichapas paray tiempota chaypi qhepakuyman, chaymantataq yanapaykuwankichisman maymanchus purinayman riqtiy.

⁷Kunanqa manan pasarqoq tumpallachu rikuyta munaykichis, aswanpas huk tiempotan Señor munaqtinqa qankunawan qhepakusaq.

⁸Ichaqa, kay Efeso llaqtapin Pentecostés Fiestakama qhepakusaq.

⁹Allinta llank'anaypaqmi kusapuni kashan, hinaña contraypi kaqkuna askhapuni kashan chaypas.

¹⁰Timoteo chayamusunkichis chayqa, sumaqta rikuychis wasinpi hina mana manchakuspa qankunawan kananpaq, paypas ñoqa hinallataqmi Señorpa llank'ananpi llank'ashan.

¹¹Chayrayku, ama pipas Timoteota pisipaq hap'ichunchu, aswanpas sumaqta payta kacharparimpuychis, ñoqaman hamunanpaq, wakin wawqekunapiwanmi payta suyashani.

¹²Apolos wawqenchistaqa anchatan valekurqani huk wawqekunapiwan watukuq hamunasuykichispaq, ichaqa manan kunanqa hamuyta munanraqchu, tiempon kaqtinñan hamunqa.

¹³Makilla kashaychis, iñiypi allinta sayaychis, qhari hina puriychis, allinta kallpachakuychis.

¹⁴Tukuy imatapas ruwaspaykichisqa munakuywan ruwaychis.

¹⁵Wawqe-panaykuna, yachankichisñan, Acaya hap'iypi ñawpaq iñiqkunaqa Estefanaspa familian kasqanta, hinallataq iñiq wawqe-panakunata tukuy sonqo yanapashasqankutapas.

¹⁶Chay hinaqa valekuykichismi, paykuna hina llapa yanapakuqkunatapas llank'aqkunatapas kasunaykichista.

¹⁷Anchatan kusikuni Estefanaspa, Fortunatoq, Ahaycoq chayamusqankumanta, paykunan rantiykichispi yanapawarqanku.

¹⁸Sonqoytan kawsarichiwarqanku, hinallataq sonqoykichistapas kawsarichirqan. Chayrayku, chay hina runakunataqa allinta rikuychis.

¹⁹Asia provinciapi kaq iglesiakunan napaykamusunkichis. Aquilapas Priscapas, paykunaq wasinpi huñukuq iglesiapas anchatapunin Señorpa sutinpi napaykamusunkichis.

²⁰Kaypi llapan wawqe-panakunan napaykamusunkichis. Hukkuna hukkunawantaq ch'uya much'aykuywan napaykunakuychis.

²¹Ñoqa Pablon kay napaykuyniytaqa makiywanpuni qelqamuykichis.

²²Pipas Señor Jesucristota mana munakuqqa, ñakasqa kachun. ¡Señorqa Hamushanñan!

²³Señor Jesucristoq saminchaynin qankunawan kachun.

²⁴Jesucristopi munakuyniytan llapallaykichisman apachimuykichis.