Read DIOSPA QHELQACHISQ Quechua 2 CORINTIOS 11 Bible Online

2 CORINTIOS 11 - DIOSPA QHELQACHISQ Quechua bible

2 CORINTIOS 11

¹¡Loqhe-kayniyta asllata muchuriwaychis! Arí, muchurillawaychispuni.

²Imaynan Diosqa mayta sientiwanchis, chay hinan ñoqapas qankunamanta mayta sientiykichis, huk qosallamanmi casarakunaykichispaq prometechirqaykichis, huk ch'uya doncella sipasta hinan Cristoman entregayta munaykichis.

³Ichaqa manchakushanin, imaynan mach'aqwayqa yachaysapa kayninwan Evata q'oturqan, chay hinata qankunatapas Cristota cheqaqtapuni ch'uya munakuyniykichismanta imaynapipas waqllichinasuykichismanta.

⁴Pipas hamuspa ñoqaykuq mana willasqayku wak Jesusmanta willaqtinqa chaskirqankichismi, cheqaq espiritumantapas wak espiritutaqa chaskillankichistaqmi, chaskirqankichisña chay allin willakuykunamantapas wak willakuytaqa hinallata chaskispan muchunkichis.

⁵Ñoqaqa manan chay allinnin apostolkunamantaqa imapipas pisichu kani.

⁶Mana sumaq rimakuqña kani chaypas, yachayniypiqa manan hinachu kani, chaytan tukuy imapi sapa kuti qankunaman reqsichikurqayku.

⁷Icha, ¿huchallikunichu ñoqa kikiy huch'uyyaykukuspa, qankuna hatunchasqa kanaykichispaq Diosmanta allin willakuykunata mana qolqellapaq willaspay?

⁸Wakin iglesiakunaq qolqentan qechurqani, qankunata servinaypaq pagota chaskikuspa.

⁹Qankunawan kashaqtiy pisiwaqtinpas, manan mayqentapas gastachirqaykichischu. Pisiwaqniytaqa Macedoniamanta hamuq wawqekunan qowarqanku. Ñoqaqa makillan yuyasharqani qankunata ama gastachinaypaq, kunanpas makillapunin yuyashani.

¹⁰Cristoq cheqaqkaynin ñoqapi kasqanraykun rimani, manan pipas Acaya hap'iynintinpi kay alabakuyniytaqa upallachiwanmanchu.

¹¹¿Imanaqtintaq chay hinata rimani? Icha, ¿qankunata mana munakuspachu? ¡Diosmi yachan anchatapuni qankunata munakusqaytaqa!

¹²Chay apostolkunan llank'asqankumanta alabakuspa ninku: Pablo hinan llank'ashayku, nispa. Chaymi ñoqaqa ñawpaq hina mana qolqeta chaskisqaykichischu, ama chay hinata rimashanankupaq.

¹³Chaykunaqa llulla apostolkunan, llullakuspa llank'aqkunan, Cristoq apostolninman tukuqkunan kanku.

¹⁴Chay hina kasqanqa manan musphanapaqchu, kikin Satanaspas k'anchashaq angelmanqa tukunmi.

¹⁵Chayraykun Satanasta serviq runakunaq chanin ruwaqman tukusqanqa mana musphanapaqchu. Ichaqa p'uchukayninkun ruwasqankuman hina kanqa.

¹⁶Huktawanmi nini: Ama pipas loqhe kasqaypaqqa hap'iwachunchu. Loqhe kasqayta yuyaspaykichisqa, uyariwaychis loqhe hina rimasqayta, ñoqapas huk chhikanta hatuncharikunaypaq.

¹⁷Chay hinata hatunchakuspaqa manan rimashani Señorpa rimasqanta hinachu, aswanpas loqhe hinallan.

¹⁸¡Runa yuyayman hinaqa askhan hatunchakunku, ñoqapas hatunchakusaqyá!

¹⁹Qankunaqa yachaysapataq kankichis chayqa, loqhekunataqa kusisqan uyarinkichis.

²⁰Arí, qankunaqa kusatamá muchunkichis servichikuqniykichista, qechuqniykichista, munaychakuqniykichista, uyaykichispi saqmaqniykichistapas.

²¹Arí, chaypaqqa pisi kallpapunin karqayku, arí, chaymantan p'enqakushayku. Pipas qhariykachaqtinmi ichaqa, loqhe hina rimaspa ñoqapas qhalichakullasaqtaq.

²²¿Hebreo runakunachu kanku? Ñoqapas Hebreo runan kani. ¿Israel runakunachu kanku? Ñoqapas Israel runan kani. ¿Abrahampa mirayninchu kanku? Ñoqapas Abrahampa mirayninmi kani.

²³¿Cristoq kamachinkunachu kanku? Ñoqaqa aswanraqmi paykunamantaqa kani, arí, kaytaqa loqhe hinan rimashani. Paykunamantaqa astawanraqmi llank'arqani, paykunamantaqa askha kutitan carcelkunapi wisq'asqa karqani, paykunamantaqa aswan suq'asqan karqani, paykunamantaqa aswan askha kutin yaqa wañurqani.

²⁴Judío runakunan phisqa kutita suq'awarqanku kinsa chunka isqonniyoq makita.

²⁵Kinsa kutitan k'aspiwan waqtawarqanku, huk kutitan ch'aqewarqanku, kinsa kutitan barco tikraykukuqtin muchurqani, huk tutatawan huk p'unchaytawanmi lamar-qochapi tikraykusqa karqani.

²⁶Hinantinman purisqaypin mayukunapas yaqa apawarqan, suwakunapas yaqa ch'utiwarqan, llaqtamasiy runakunapas yaqa wañuchiwarqan, mana judío runakunapas yaqa wañuchiwarqan. Sinchi sasachakuykunapin rikukurqani llaqtapipas, ch'inneqpipas, lamar-qochapipas, iñiqman tukuq runakuna ukhupipas.

²⁷Sinchitan llank'arqanipas sayk'urqanipas. Askha kutin mana puñusqa karqani, yarqaytapas ch'akiytapas muchurqani. Askha kutin mana k'ata mikhusqa karqani, chiritapas, mana p'achayoq kaytapas muchurqani.

²⁸Tukuy chaykunamanta astawanqa llapa iglesiakunamanta sapa p'unchay yuyariqtiymi llaki ñit'iykuwan.

²⁹Pipas pisi kallpayaqtinqa, ñoqapas pisi kallpayallanitaqmi. Pipas huchaman urman chayqa, ñoqan muchuni p'enqasqa kayta.

³⁰Hatunchakunaychus kan chayqa, pisi kallpayoq kasqaymantan hatunchakusaq.

³¹Wiñay-wiñaypaq yupaychana Señorninchis Jesucristoq Yayan Diosmi yachan mana llullakusqayta.

³²Damasco llaqtapi kashaqtiymi, rey Aretaspa churasqan kamachikuqqa Damasco llaqta punkukunaman guardiakunata churarqan presota hap'iwanankupaq.

³³Hinaqtinmi llaqta perqa ventananta huk canastapi warkuykuspa uraykachiwarqanku, ahinapin chay kamachikuqpa hap'iwananmanta ayqerqani.