Read DIOSPA QHELQACHISQ Quechua 2 CORINTIOS 3 Bible Online

2 CORINTIOS 3 - DIOSPA QHELQACHISQ Quechua bible

2 CORINTIOS 3

¹Chaykunata nispaykuqa, ¿kikiykutachu wakmanta reqsichikusaqku? Manan. Icha, ¿hukkuna hinachu reqsichikuy cartataraq qankunaman haywanayku? Icha, ¿qankunamantachu reqsichikuy cartata mañakunayku? Manan,

²aswanpas qankuna kikiykichismi reqsichikuy cartaykuqa kankichis, sonqoykupi qelqasqa llapa runakunaq reqsisqan leesqan ima.

³Qankunaqa ñoqaykuq qosqayku Cristoq sut'i cartanmi kankichis, manan tintawan qelqasqachu, aswanpas kawsaq Diospa Espiritunwanmi, manan p'alta rumipi qelqasqachu, aswanpas runaq sonqonpi qelqasqan.

⁴Chaykunataqa niyku Cristoq ruwasqanrayku Diospi confiakuspaykun.

⁵Manan ñoqayku kikiykumanta imatapas ruwayta atiq kasqaykuraykuchu, aswanpas atiq kasqaykuqa Diosmantan hamun.

⁶Payllataqmi mosoq rimanakuypi servinaykupaq atiyta qowarqanku, manan qelqasqa kamachikuypichu, aswanpas Santo Espiritupin. Qelqasqa kamachikuyqa wañuchinmi, Santo Espiritun ichaqa kawsachin.

⁷Moisespa qelqasqan kamachikuy simiqa p'alta rumipi seq'esqan karqan. Moisespa uyanqa anchatapunin k'ancharirqan, chaymi Israel runakunaqa paypa uyanta mana qhawayta atirqankuchu sinchita lliphllikisqanrayku, chaywanpas chay lliphllikiyqa pisiyapusharqanmi. Wañuchiq kamachikuy simi ancha atiywan k'ancharisqan hawan,

⁸aswantaraq k'ancharin Santo Espirituq apamuwasqanchis mosoq rimanakuymanta willakuyqa.

⁹Huchachaq kamachikuy simichus anchata k'ancharirqan chayqa, ¡aswantaraqmi k'ancharin mosoq rimanakuyqa! Chay hawan Diosqa chaninchawanchis.

¹⁰Kamachikuy simiqa atiyniyoqmi ñawpaqqa karqan, mosoq rimanakuypa atiyninwan tupanachisqaqa manan imapaschu kapun.

¹¹Chay pisi tiempollapaq kaq kamachikuy atiyniyoq karqan chayqa, aswan atiyniyoqraqmi wiñaypaq mosoq rimanakuyqa.

¹²Chaymi chay hina suyakuyniyoq kaspa mana manchakuspa willayku.

¹³Manan Moisés hinachu ruwayku, payqa huk qatawanmi uyanta pakakurqan, Israel runakuna chay chinkapushaq lliphlli-kaypa tukukapusqanta ama rikunankupaq.

¹⁴Ichaqa paykunaq yuyayninkun tutayaykurqan, chaymi kunan p'unchaykama ñawpa rimanakuy qelqata leespa mana entiendenkuchu qatawan hina pakasqalla kashasqanrayku. Chay qataqa Cristollawanpunin horqokuyta atikun.

¹⁵Chaymi kunan p'unchaykamapas Moisespa qelqankunata leespaqa manapuni sut'itachu entiendenku, chay qata pakashasqanrayku.

¹⁶Pipas Señorman kutirikuqtinmi ichaqa, chay qataqa horqosqa kanqa.

¹⁷Señorqa Espiritun. Maypichus Señorpa Espiritun kashan chaypin runakunapaq kacharichisqa kayqa kashan.

¹⁸Chay hinaqa, llapanchismi mana pakasqa uyayoq kaspanchis espejo hina Señorpa lliphlli-kayninwan k'ancharinchis. Señorqa Espiritun, paymantan lliphlli-kayqa k'anchamun, chay lliphlli-kayninmi ñoqanchistaqa t'ikrashawanchis Señorman rikch'akuq kananchispaq, ahinapin ñoqanchisqa aswan-aswanta lliphlli-kayninwan k'ancharinchis.