Read DIOSPA QHELQACHISQ Quechua 2 CORINTIOS 4 Bible Online

2 CORINTIOS 4 - DIOSPA QHELQACHISQ Quechua bible

2 CORINTIOS 4

¹Diosmi khuyapayawaspanku kay llank'anata qowarqanku, chayraykun mana hayk'aqpas pisi kallpayaykuchu.

²Aswanpas wikch'upuykun pakapi ruwasqakunatapas p'enqay ruwasqakunatapas, manataqmi q'otuspachu puriyku, manallataq Diospa simintapas waqllichiykuchu, aswanmi Diospa qayllanpiqa cheqaq kaqllatapuni rimayku. Ahinapin llapa runaq conciencianman ñoqayku kikiykuta reqsichikuyku.

³Allin willakuykuna willasqaykuchus pakasqallaraq kashan chayqa, chinkayman rishaqkunallapaqmi pakasqa kashan.

⁴Chay mana iñiqkunaq yuyaynintan kay pacha kamachiq diosqa tutayachin, lliphlli-kayniyoq Cristomanta allin willakuykunaq k'anchayninta mana rikunankupaq. Cristoqa Diospa rikch'ayninpunin.

⁵Ñoqaykuqa manan kikiykumantachu willakuyku, aswanpas Jesucristopuni Señorqa kasqantan willayku. Ñoqaykumantataq Jesuspa munakuynin hawa kamachiykichis kasqaykuta willayku.

⁶Kamashaspanmi Diosqa nirqan: “Laqhayaqpi k'anchay k'anchachun”, nispa. Paymi sonqonchispi k'anchayninta k'anchachirqan, Diospa lliphlli-kayninta Jesucristoq uyanpi reqsinanchispaq.

⁷T'uru mankakuna hinaña kashayku chaypas, chay chaniyoq illaqa ñoqaykupin kashan, chay hatun atiyqa mana ñoqaykuqchu kasqanta rikuchinaykupaq, aswanpas Diospa kasqanta rikuchinaykupaq.

⁸Imaymana sasachakuypin kayku ichaqa manan atipasqachu kayku. Iskayrayaspaykupas manan sinchi llakisqachu kayku,

⁹qatiykachawaqtinkupas manan Diospa saqerparisqanchu kayku, maqawaqtinkupas manan wañuykuchu.

¹⁰Maytaña rispaykupas cuerpoykupi ñak'arispan apashayku Jesuspa wañusqanta, ahinapi Jesuspa kawsasqanpas cuerpoykupi rikuchisqallataq kananpaq.

¹¹Ñoqaykuqa kawsashaspapas, Jesusraykun wañuchinapaq churasqallapuni kashayku, Jesuspa kawsashasqantapas wañuq cuerpoykupi rikuchinaykupaq.

¹²Ahinapin ñoqaykuqa wañuywan kuskalla kashayku, qankunataqmi astawan kawsayta tarinkichis.

¹³Diospa Simin Qelqan nin: “Iñirqanin, chayraykun rimanipas”, nispa. Chay hinallatataqmi ñoqaykupas iñiyku, chayraykullataqmi rimaykupas.

¹⁴Señor Jesucristota kawsarichimpuq Diosmi ñoqaykutapas Jesustawan kuskata kawsarichimpuwanqaku, hinaspa qankunatawan kuskata paypa qayllanpi rikhurichiwanqaku.

¹⁵Tukuy chaykunaqa qankunaq allinniykichispaqmi karqan, ahinapi Diospa saminchayninta askhata chaskispanku, askha runallataq graciasta qospanku Diosta hatunchanankupaq.

¹⁶Chayraykun mana pisipaykuchu, aycha cuerpoykuña mawk'ayapushan chaypas, espirituykuqa p'unchaymanta-p'unchaymi aswanta mosoqyashan.

¹⁷Kay pachapi ñak'ariyninchisqa tukukapuqllan, ichaqa chay ñak'ariymi ancha hatun wiñaypaq q'ochukunanchisman tukupushan, chaywan tupachisqaqa manan imapaschu ñak'ariyninchisqa.

¹⁸Ñoqaykuqa manan rikukuq kaqkunatachu qhawayku, aswanpas mana rikukuq kaqkunatan, rikukuq kaqkunaqa pisi tiempollapaqmi, mana rikukuq kaqkunan ichaqa wiñay-wiñaypaq.