Read DIOSPA QHELQACHISQ Quechua 2 CORINTIOS 5 Bible Online

2 CORINTIOS 5 - DIOSPA QHELQACHISQ Quechua bible

2 CORINTIOS 5

¹Yachanchismi kay aycha cuerponchis wasi hina thunikapuqtinqa, hanaq pachapi Diospa wakichipuwasqanchis wasi wiñaypaq kapuwasqanchista, chay wasiqa manan runaq ruwasqanchu.

²Arí, kaypi kawsashaspaqa llakipakushanchismi, hanaq pacha cuerpoyoq-kaytan munaykushanchis.

³Chay cuerpon p'acha hina p'istuykuwasunchis, ahinapin mana q'alallachu kasunchis.

⁴Chay hinallataqmi aycha cuerpopi kawsashaspaqa llakiq ñit'isqan llakipakushanchis. Manan aycha cuerponchis chinkachiytaqa munasunmanchu, aswanpas hanaq pacha cuerpoyoq kaytan munasunman. Chay hinapin wañuq cuerponchista wiñay kawsay hap'ikapunqa.

⁵Diosqa chaypaq nisqatapuniñan ruwawarqanchis, Santo Espiritutataq chaskinanchis señal kananpaq qowarqanchis.

⁶Chaymi mana iskayrayaspa kawsashanchis. Yachanchismi aycha cuerpopi kawsananchiskamaqa, manaraq Señorwan kuskachu kashasqanchista.

⁷Purishanchisqa Diospi iñispan, manan payta rikusparaqchu.

⁸Manan iskayrayanchispaschu, aswanmi munasunman kay aycha cuerpomanta t'aqakuyta, hinaspa Señorwan kuska kashayta.

⁹Chaymi kay cuerpopi kaspapas Señorwan kuska kaspapas Señorllatapuni kusichiyta munashanchis.

¹⁰Llapallanchismi Cristoq juzganan qayllapi rikhurisunchis, sapankanchis kawsashaspa allin kaqtapas mana allin kaqtapas ruwasqanchisman hina chaskinanchispaq.

¹¹Chayraykun ñoqaykuqa Señorta manchakuspa runakunata iñichiytapuni munayku, ichaqa Diosmi yachanña imaynachus kasqaykuta, suyakushanitaqmi qankunapas imaynachus kasqaykuta sonqoykichispi yachanaykichista.

¹²Manan huktawanchu qankunaman reqsichikamuykiku, aswanpas ñoqaykumanta kusikunaykichispaqmi chaykunataqa nimuykiku. Ahinapin qhawarinallapaq hatunchakuq runakunaman kutichiyta atinkichis, paykunaqa manan sonqopi kaqwanchu hatunchakunku.

¹³Waq'a hina kayku chayqa Diospaqmi kayku, allin yuyayniykupi kayku chaypas qankunapaqmi kayku.

¹⁴Cristoq munakuyninpunin kawsayninchispiqa anchata kallpachawanchis, Cristoq ñoqanchisrayku wañusqanta yachaspaqa, yachallanchistaqmi ñawpa kawsayninchispaq llapallanchis wañupusqanchista.

¹⁵Llapapaqmi Cristoqa wañurqan, kawsaqkuna amaña paykuna kikinkupaq kawsanankupaq, aswanpas paykunarayku wañuspa kawsarimpuq Cristopaqña kawsanankupaq.

¹⁶Chayraykun ñoqaykuqa kunanmanta qhepamanqa manaña pimantapas runa yuyayman hinachu yuyayku, ñawpaqmi Cristomantapas runa yuyayman hina yuyarqayku, kunanqa manañan hinatachu paymantaqa yuyayku.

¹⁷Chay hinaqa, pipas Cristowan hukllachasqa kashan chayqa, mosoq kamasqa runañan kapun, ñawpa kaqkunaqa chinkapunñan, tukuy imapas mosoqyachisqañan kapun.

¹⁸Tukuy chaykunataqa Diosmi ruwarqan, paymi pay kikinwan Cristoq ruwasqanwan ñoqaykuta allipunachiwarqanku, hinaspa llapa runata paywan allipunachinaykupaq churawarqanku.

¹⁹Diosqa Cristopin kasharqan runakunata pay kikinwan allipunachispa, runakunaq huchankunata mana qhawarispalla. Ñoqaykutataq allipunachiy simita willanaykupaq churawarqanku.

²⁰Chay hinaqa, Cristoq rantinpi willanaykupaq churasqan kayku, Diospas ñoqaykuwan valekushasunkichisman hina, Cristoq sutinpin qankunata valekuykiku: Dioswan allipunaychis, nispa.

²¹Cristoqa manan imapipas huchallikurqanchu, ichaqa ñoqanchis hawan Diosqa Cristoman huchanchista q'epichirqan, ahinapin ñoqanchisqa Cristowan hukllachasqa kaspa Diospa chanin-kayninta chaskinchis.