Read DIOSPA QHELQACHISQ Quechua GÁLATAS 2 Bible Online

GÁLATAS 2 - DIOSPA QHELQACHISQ Quechua bible

GÁLATAS 2

¹Chunka tawayoq watamantañan wakmanta Jerusalén llaqtata Bernabepiwan rirqani, Titotawan pusarikuspa.

²Rikhuriypi Dios niwaqtinmi Jerusalén llaqtataqa rirqani, hinaspan chaypi sapaqllapi huñurikuspayku allin reqsisqa umallikunaman willarqani mana judío runakunaman allin willakuykunata willasqaymanta. Chaytan willarqani ñawpaq llank'asqaypas kunan llank'ashasqaypas ama yanqa kananpaq.

³Ñoqawan kashaq Titopas mana judío runa kashaspa, qhari-kaynin señalasqa kananpaqqa manan kamachisqachu karqan.

⁴Llulla wawqekunan ichaqa mana piqpa yachasqallan haykumurqanku qhari-kayninkuta señalachikunankupaq kamachikuspa. Paykunaqa qhamiyaq hinan haykumurqanku Jesucristowan hukllachasqa kaspa libre kasqaykuta qhamiyanankupaq, hinaspa wakmanta kamachikuy simiman watawanankupaq.

⁵Chaywanpas manapunin paykunataqa chhikallantapas kasurqaykuchu, cheqaq allin willakuykuna qankunapaq mana waqllichisqa kananpaq.

⁶Chay allin reqsisqa umallikunaqa manan ima wak yachachikuytapas yachachisqayman yapaykurqankuchu. (Hinaña allin reqsisqa karqanku chaypas, manan ñoqapaqqa imananpaschu, Diosqa manan runakunaq rikch'ayninta qhawaspachu juzgan).

⁷Aswanmi, mana judío runakunaman allin willakuykunata willanaypaq Diospa churasqan kasqayta reqsiwarqanku, imaynan Pedropas judío runakunaman Cristomanta allin willakuykunata willananpaq churasqa karqan hinata.

⁸Judío runakunaq apostolnin Pedrota kallpachaq Diosllataqmi ñoqatapas mana judío runakunaq apostolnin kanaypaq kallpachawarqan.

⁹Chaymi allin reqsisqa umallikuna Jacobo, Pedro, Juanpiwan Diospuni kay llank'anata qowasqanta reparawaspanku, ñoqata Bernabetawan paña makinkuwan hap'iykuwarqanku huk sonqolla kashasqaykuta rikuchinapaq. Hinaspan niwarqanku: Allinmi, mana judío runakunaman willaq rinkichis chayqa, ñoqaykutaq judío runakunaman willamusaqku, nispa.

¹⁰Wakchakunata yuyarikunallaykumantan valekuwarqanku, chaytan ñoqaqa tukuy sonqopuni ruwarqani.

¹¹Antioquía llaqtaman Pedro chayamuqtinmi uyanpi anyarqani pantashasqanrayku.

¹²Jacoboq kachamusqan wakin runakuna manaraq chayamushaqtinmi, Pedroqa mana judío runakunawan kuska mikhurqan, chayamuqtinkutaq ichaqa mana judío runakunamanta t'aqakuspa anchhuripurqan judío t'aqa runakunata manchakusqanrayku.

¹³Chaymi wakin iñiq judío runakunapas Pedrowan kuska iskay uya kallarqankutaq, kikin Bernabepas chay iskay uya-kayninkuwan aysachikullarqantaq.

¹⁴Ichaqa allin willakuykunaq cheqaq yachachikuyninman hina mana allinta purisqankuta rikuspaymi, Pedrota llapa huñuykusqaq qayllanpi nirqani: Qanqa judío runa kashaspan, mana judío runa hinachu kawsashanki, ¿imanaqtintaq mana judío runakunatari tanqaykushanki judío runaman t'ikrakunankupaq? nispa.

¹⁵Ñoqanchisqa judío runakunan kanchis nacesqanchismantapacha, manan huchasapa mana judío runakunachu.

¹⁶Chaywanpas yachanchismi, runaqa manan kamachikuy simita hunt'asqanraykuchu chaninchasqaqa, aswanpas Jesucristopi iñisqanraykullan, ñoqanchispas Jesucristopin iñinchis, chay iñiyrayku chaninchasqa kananchispaq, manataq kamachikuy simita hunt'asqanchisraykuchu. Manan pipas kamachikuy simita hunt'asqanraykuqa chaninchasqachu kanqa.

¹⁷Ñoqanchischus Cristowan hukllachasqa kaspa Diospa chaninchawananchista maskhaspa, huchasapa kasqanchista reqsichikunchis chayqa, ¿chayraykuchu Cristoqa huchallikuq runaman tukuchipuwanchis? Manapunin.

¹⁸Imatapas thunisaq hinaspa wakmanta sayarichisaq chayqa, ñoqa kikiymi kamachikuy simi p'akiq kani.

¹⁹Ñoqataqa kamachikuy simin wañuchiwarqan, chaymi kamachikuy simipaqqa wañusqaña kani Diosllapaqña kawsanaypaq.

²⁰Cristowan kuska chakatasqañan kani, chaymi mana ñoqañachu kawsashani, aswanpas Criston ñoqapi kawsashan. Cuerpopi kunan kawsashaspayqa Diospa Churinpi iñispaymi kawsashani, paymi munakuwarqan, chaymi ñoqarayku wañurqan.

²¹Diospa khuyapayakuynintaqa manan pisichanichu, kamachikuy simita kasukuywanchus chaninchasqa-kay kanman chayqa, yanqapaqmi Cristoqa wañunman karqan.