Read DIOSPA QHELQACHISQ Quechua EFESIOS 2 Bible Online

EFESIOS 2 - DIOSPA QHELQACHISQ Quechua bible

EFESIOS 2

¹Ñawpaqqa qankunan mana chanin kayniykichispi huchaykichispiwan wañusqa kasharqankichis.

²Chay tiempopin huchakunapi purirqankichis, kay pachaq purisqanta qatikuspa, wayrapi atiyniyoq espirituq kamachikusqanta kasukuspa, chay espiritun kunan kallpachashan Diosta mana kasukuqkunata.

³Ñoqanchispas llapanchismi ñawpaqqa chaykuna ukhupi kawsarqanchis, sonqonchispa millay munasqankunapi purirqanchis, cuerponchispa munayninta yuyaykuynintawan ruwaspa. Chayraykun runa-kayninchisman hina wakinkuna hinallataq Diospa muchuchinanpaqpuni karqanchis.

⁴Ichaqa Diosmi ancha hatun khuyapayakuyninpi anchatapuni munakuwarqanchis,

⁵chaymi huchanchiskunapi wañusqa kashaqtinchis, Cristowan kawsayta qowarqanchis. Chay hinaqa, Diospa khuyapayakuynillanwanmi qespichisqa kankichis.

⁶Cristowan kuskatan kawsarichimpuwarqanchis, chay hinallataqmi hanaq pachapipas Jesucristotawan kuskata tiyaykachiwarqanchis.

⁷Chaytan ruwarqan khuyapayakuyninqa may hatunpuni kasqanta hamuq tiempokunapi rikuchinanpaq, Jesucristopi munakuwaspanchismi chaytaqa rikuchiwarqanchis.

⁸Diospa khuyapayakuynillanwanmi iñiywan qespichisqa kankichis. Chaytaqa manan ima ruwasqaykichiswanpaschu ayparqankichis, aswanpas Diosmi chaytaqa qorqasunkichis.

⁹Qespikuyqa manan ima ruwaykunawanchu, ama pipas umata hoqarinanpaq.

¹⁰Diospa ruwasqanmi kanchis, paymi kamawarqanchis Jesucristowan hukllachasqa kaspa allinkunata ruwananchispaq, chaykunatan Diosqa ñawpaqmantaña wakichirqan chayman hina kawsananchispaq.

¹¹Qankunaqa manan judío runamanta naceqchu karqankichis, chaymi judío runakunaqa “qhari-kaynin mana señalasqakuna” nirqasunkichis, paykunataq “qhari-kayniyku señalasqan kayku” ninku, chayqa cuerpopi runaq ruwasqallanmi. Chay hinaqa, yuyariychis,

¹²ñawpaqqa mana Cristoyoqmi karqankichis, Israel llaqtayoq-kaymanta karunchasqa, Diospa rimanakuynintapas prometesqantapas mana yachaspa, kay pachapipas mana suyakuyniyoqmi, mana Diosniyoqmi kawsarqankichis.

¹³Qankunan ñawpaqqa Diosmanta karupi karqankichis, kunanmi ichaqa Jesucristowan hukllachasqa kaspa, Cristoq wañuspa yawar hich'asqanwan Diosman qayllaykachisqaña kashankichis.

¹⁴Criston allipunachiwaqninchisqa. Paymi judío runakunata mana judío runakunatawan allipunachispa ch'ullallaman tukuchirqan, perqa hina t'aqaq cheqninakuyta thunispa.

¹⁵Kamachikuy qelqapi unanchaykunata kamachikuykunatawanmi Cristoqa pay kikin wañuspan p'uchukachipurqan, hinaspa iskaynin llaqtamanta paywan hukllachasqa ch'ulla mosoq llaqtallataña paqarichipurqan. Ahinapin paykunata allipunachirqan.

¹⁶Cruzpi wañusqanwanmi Cristoqa iskaynin llaqtaq cheqninakuyninta p'uchukachispa huk cuerpollaman huñuykurqan. Ahinapin Dioswan allipunachirqan.

¹⁷Hamuspanmi Cristoqa allipunay allin willakuykunata willarqan, qankuna karupi kashaqkunamanpas qayllapi kashaqkunamanpas.

¹⁸Cristowanmi llapanchis judío runakunapas mana judío runakunapas huk kikin Santo Espiritullapi Yayaman qayllaykunchis.

¹⁹Chayraykun qankunaqa manaña wak llaqtayoqpaschu purikuqllapaschu kankichis, aswanpas Diospa ch'uya llaqtanwan llaqta-masintinmi kankichis, hinallataq Diospa ayllun runakuna ima.

²⁰Qankunaqa wasi hina sayarichisqan kankichis, apostolkunaq profetakunaq teqsi sayarichisqanpi, kikin Jesucristotaq esquina hap'iq teqsi rumi.

²¹Paypin llapa wasipas allin k'askanasqa sayarishan Señorpa tiyanan ch'uya wasi kananpaq.

²²Payllapitaqmi qankunapas kuska sayarichisqa kashankichis, Diospa Espiritunpa tiyanan wasi kanaykichispaq.