Read DIOSPA QHELQACHISQ Quechua EFESIOS 6 Bible Online

EFESIOS 6 - DIOSPA QHELQACHISQ Quechua bible

EFESIOS 6

¹Wawakuna, tayta-mamaykichista Señorpi iñiqkuna hinapuni kasukuychis, chaymi chaninqa.

²Diospa Simin Qelqan nin: “Taytaykitapas mamaykitapas respetankin”, nispa. Chay ñawpaqkaq promesayoq kamachikuymi nin:

³“Ahinapin allillan kanki, kay pachapipas unayta kawsanki”, nispa.

⁴Qankunapas, tayta-mamakuna, wawaykichista ama phiñachiychischu aswanpas kasuchikuspa uywaychis, Señormanta yachachispa.

⁵Kamachikuna, kay pachapi patronniykichista kasuychis, respetowan, manchakuywan sut'in rimaq kaywan, Cristotapas servishawaqchis hina.

⁶Ama runakunaq rikunallantaqa ruwaychischu, paykunawan allin kayta munaspalla, aswanpas Cristoq kamachinkuna hinapuni, Diospa munayninta tukuy sonqo ruwaychis.

⁷Sonqopas-sonqo llank'aychis, Señorta serviq hinapuni, ama runakunata serviq hinallachu.

⁸Yachankichismi kamachi kaspapas mana kamachi kaspapas, sapanka runan allinta ruwasqanman hina Señormanta chaskinqa.

⁹Qankunapas, patronkuna, chay hinallatataq kamachiykichiskunapaq ruwaychis, amaña astawan manchachiychischu. Yachankichismi, qankunaqpas paykunaqpas hanaq pachapi Señorniykichisqa ch'ullalla kasqanta, payqa manan pimanpas sayapakunchu.

¹⁰Chaymantapas, wawqe-panaykuna, Señorpi kallpachakuychis paypa atiyniyoq kallpanwan.

¹¹Diospa qosqan llapallan tupapakuna p'achawan churakuychis, saqraq q'otukuq yuyayninkuna contra qaqata sayanaykichispaq.

¹²Manan runawanchu maqanakunchis, aswanpas kamachikuqkunawanmi, atiyniyoqkunawanmi, kay laqhayaq pachapi kamachikuqkunawanmi, hanaqkunapi kaq mana allin espiritukunawanmi.

¹³Chayrayku, Diospa qosqan llapallan tupapakuna p'achawan churakuychis, mana allin p'unchaypi allinta tupapakunaykichispaq, hinaspa tukuypi wakichikuspaña qaqata sayanaykichispaq.

¹⁴Allintapuni sayashaychis, cheqaq-kaywan chumpiwan hina allin chumpiykusqa, chanin-kaywan fierro unkuwan hina churaykusqa.

¹⁵Usut'asqa soldado hina listolla kashaychis thak-kay allin willakuykunata usqhaylla willamunaykichispaq.

¹⁶Astawanraqqa iñiyniykichista hark'apakuna escudota hina hap'iychis, chaywanmi saqraq llapa rawrashaq wach'isqankunatapas thasnuyta atinkichis.

¹⁷Diospa qespichiyninwanpas cascowan hina churakuychis umaykichista hark'ananpaq, hinallataq Santo Espirituq espadantapas hap'iychis, chay espadaqa Diospa Simin Qelqan.

¹⁸Diosmanta sapa p'unchay mañakuychis tukuy rogakuywan valekuywan, Santo Espirituq yanapasqan. Chaypaqtaq rikch'ashallaychispuni, mana p'itiyta llapallan iñiqkunapaq Diosmanta mañapuspaykichis.

¹⁹Ñoqapaqpas mañapuwaychis, Diosninchispa qelqanmanta rimariqtiy yanapawananpaq, allin willakuykunaq pakasqa yachaynintapas mana manchakuspa willanaypaq.

²⁰Diosmi Cristoq rantinpi churawarqan chay allin willakuykunata willanaypaq, chay hawan kunanpas preso kashani. Mañakuychis, rimanayta hinapuni mana manchakuspa allin willakuykunata willanaypaq.

²¹Señorpa llank'ananpi hunt'aq munakusqanchis wawqe Tiquicon lliwta willasunkichis imaynachus kashasqaymantapas tukuy llank'ashasqaymantapas.

²²Chaypaqpunin paytaqa kachamushaykichis, imaynachus kashasqaykuta willanasuykichispaq, ahinapi qankunata kallpachanasuykichispaqwan.

²³Dios Yayanchis Señorninchis Jesucristopiwan thak-kaytapas iñiywan munakuytapas wawqe-panakunaman qosunkichis.

²⁴Señorninchis Jesucristota mana hayk'aq tukukuq munakuywan llapallan munakuqkunapaq Diospa saminchaynin kachun.